Laudrup: Villarreal verður að halda auðmýktinni

Michael Laudrup, nýráðinn þjálfari spænska liðsins Villarreal, segir að félagið verði að halda þeirri auðmýkt sem einkennt hefur leik liðsins síðustu ár til að geta náð góðum árangri í Evrópukeppni félagsliða á næsta tímabili.

Torres spilar sinn fyrsta leik í kvöld

Spænski framherjinn Fernando Torres hjá Liverpool spilar væntanlega sinn fyrsta leik með liðinu í kvöld þegar liðið mætir Werder Bremen í æfingaleik í Sviss. Torres á raunar við ökklameiðsli að stríða en þau eru ekki talin alvarleg. Til greina kemur að hann verði í framlínunni með öðrum nýjum framherja liðsins, Andriy Voronin.

Sættir í deilu ÍA og Keflavíkur

KSÍ hefur sent frá sér yfirlýsingu vegna umdeilds marks sem skorað var í leik ÍA og Keflavíkur í Landsbankadeildinni 4. júlí sl. Jafnframt kemur fram í að forystumenn félaganna rita með undirskrift sinni undir fullar sættir milli félaganna.

Geovanni til Manchester City

Manchester City gekk í dag frá samningi við brasilíska miðjumanninn Geovanni sem var með lausa samninga hjá Cruzeiro í heimalandi sínu. Geovanni þessi er 27 ára gamall og lék áður með Barcelona og Benfica. Hann á að baki fimm landsleiki og hefur skrifað undir eins árs samning við City. Hann er þriðji maðurinn sem Sven-Göran Eriksson kaupir til félagsins á einni viku auk þeirra Rolando Bianchi og Gelson Fernandes.

Giuly á leið til Roma

Franski útherjinn Ludovic Giuly hjá Barcelona er við það að ganga til liðs við Roma á Ítalíu. Þetta tilkynnti yfirmaður knattspyrnumála hjá Barcelona í dag. Giuly varð tvisvar Spánarmeistari með Barcelona en var settur á sölulista hjá félaginu í vor. Hjá Roma fær hann aftur tækifæri til að spila í Meistaradeildinni þar sem liðið hafnaði í öðru sæti í A-deildinni á síðustu leiktíð. Kaupverðið er sagt 4,5 milljónir evra.

Wilhelmsson orðaður við Bolton

Sænskir fjölmiðlar greina frá því í dag að enska úrvalsdeildarfélagið Bolton sé nú líklegast til að landa útherjanum Christian Wilhelmsson frá Nantes í Frakklandi. Landsliðsmaðurinn sænski náði sér aldrei á strik í Frakklandi en átti ágæta leiktíð sem lánsmaður með Roma á síðasta tímabili.

Cuper tekur við Betis

Hector Cuper, fyrrum þjálfari Inter og Valencia, var í gær ráðinn þjálfari spænska knattspyrnufélagsins Real Betis. Cuper er 51 árs gamall Argentínumaður og var síðast við stjórnvölinn hjá Mallorca. Hann hefur skrifað undir eins árs samning við Andalúsíufélagið, sem naumlega náði að bjarga sér frá falli á síðustu leiktíð.

Heinze sagður á leið til Liverpool

Argentínski varnarmaðurinn Gabriel Heinze stefnir á að verða fyrsti leikmaðurinn í 43 ár sem seldur er beint milli erkifjendanna Manchester United og Liverpool á Englandi. Sir Alex Ferguson segir að leikmaðurinn muni líklega fara frá United í sumar, en bresku blöðin segja þó að hann vilji ólmur losna við hann frá Englandi í stað þess að sjá hann fara til Liverpool. Heinze er sagður með klausu í samningi sínum sem leyfi honum að fara ef í hann kemur 6 milljón punda tilboð.

Anelka skoraði tvívegis í sigri Bolton

Nicolas Anelka var í stuði í dag þegar Bolton tryggði sér sæti í úrslitaleiknum í Friðarbikarnum í Suður-Kóreu með 2-1 sigri á Santander frá Spáni. Spænska liðið náði forystunni í fyrri hálfleik með marki Albendea, en Anelka skoraði tvö mörk á níu mínútna kafla í þeim síðari og tryggði Bolton sigurinn. Tottenham tók þátt í þessu móti fyrir hönd Englendinga í fyrra og sigraði á mótinu.

Chelsea ætlar að fara varlega með Cole

Jose Mourinho stjóri Chelsea, segir félagið ætla að fara mjög varlega með bakvörðinn Ashley Cole á næstu vikum eftir að varamaður hans Wayne Bridge meiddist á mjöðm og verður frá í tvo mánuði. Cole er sjálfur að stíga upp úr langvarandi meiðslum.

Flutningur í vændum hjá Everton?

Framkvæmdastjóri enska knattspyrnufélagsins Everton segir að félaginu standi til boða tilboð aldarinnar til að byggja nýjan leikvöll sem staðsettur yrði í Kirkby, nokkuð fyrir utan Liverpoolborg. Leikvangurinn yrði að stórum hluta fjármagnaður af Tesco verslunarkeðjunni og tæki 50-55,000 manns í sæti.

Inter kaupir tvo leikmenn

Ítalíumeistarar Inter Milan hafa styrkt hóp sinn enn frekar fyrir næstu leiktíð og nú hafa tveir Suður-Ameríkumenn bæst í hópinn sem er nú við æfingar í fjöllunum á Norður-Ítalíu. Þetta eru sóknartengiliðurinn Luis Jimenez frá Lazio sem er landsliðsmaður Chile og kólumbíski varnarmaðurinn Nelson Rivas frá River Plate í Argentínu.

Framtíð Drogba óráðin

Framherjinn Didier Drogba hefur látið í það skína í viðtölum að hann sé jafnvel að hugsa sér að fara frá Chelsea. Vitað er að hann er eftirsóttur af stórliðum Evrópu og í viðtali við The Sun í dag segir markaskorarinn framtíð sína óráðna með öllu.

United gerði jafntefli við japönsku meistarana

Manchester United spilaði í dag æfingaleik við japönsku meistarana í Urawa Reds og lauk leiknum með jafntefli 2-2. Darren Fletcher og Cristiano Ronaldo skoruðu mörk enska liðsins fyrir framan rúmlega 58,000 áhorfendur í Tókíó. Heimamenn jöfnuðu leikinn í 2-2 á 78. mínútu eftir að hafa náð forystu snemma leiks.

Beckham tæpur gegn Chelsea

Óvíst er hvort David Beckham geti spilað með LA Galaxy þegar það mætir Chelsea í æfingaleik á laugardaginn. Leiksins hafði verið beðið með mikilli eftirvæntingu í Bandaríkjunum því hann átti að vera frumraun Beckham með liði sínu LA Galaxy. Ökklameiðsli Beckhams hafa tekið sig upp að nýju og hefur hann lítið geta beitt sér á æfingum enn sem komið er.

Við lítum á þetta sem tapaðan leik

HK og Víkingur náðu bæði í langþráð stig í 2-2 jafntefli liðanna í Landsbankadeildinni í gær. Víkingar komust í 2-0 og fengu mörg færi til að skora fleiri mörk en HK sýndi mikinn karakter í að vinna sig aftur inn í leikinn og tryggja sér stigið.

Mido hugsanlega á leiðinni til Birmingham

Egypski framherjinn Mido, er á leiðinni til Birmingham frá Tottenham á láni í eitt ár. Þetta segir hann við vefsíðuna FilGoal í heimalandi sínu. Mido hefur færst aftar í goggunarröðinni hjá Tottenham vegna komu Darren Bent frá Charlton.

Aftaka hjá Blikum í Árbæ

Óhætt er að segja að fyrstu tíu mínútur leiks Fylkismanna og Breiðabliks hafi verið algerlega á skjön við það sem síðar kom. Fylkismenn byrjuðu betur og fór leikurinn að mestu fram á vallarhelmingi Blika. Þá fannst fyrirliðanum Arnari Grétarssyni, nóg komið og tók leikinn í sínar hendur.

Brassar eru komnir með fast tak á Argentínumönnum

Argentína náði ekki að fylgja eftir frábærri frammistöðu í Suður-Ameríkukeppninni og steinlá 3-0 fyrir Brasilíu í úrslitaleiknum.

Valsmenn færast nær meisturunum

Valsmenn galopnuðu baráttuna um Íslandsmeistaratitilinn með sínum þriðja sigurleik í röð í Landsbankadeildinni í gærkvöldi. Erkifjendurnir úr Fram láu í valnum í þetta skiptið en Valur er nú komið með 21 stig í öðru sæti deildarinnar, tveimur stigum minna en Íslandsmeistarar FH, sem hafa aðeins náð í fjögur stig í síðustu þremur leikjum.

Platini afhendir bikarinn

Það verður sjálfur forseti UEFA, Michel Platini, sem afhendur sigurlaunin í úrslitakeppni Evrópumóts undir 19 ára kvenna sem hefst hér á landi á morgun.

Húsleit hjá Newcastle, Portsmouth og Rangers í morgun

Lögreglan í Englandi gerði húsleit hjá þremur knattspyrnuliðum, Newcastle, Portsmouth og Rangers í morgun vegna gruns um spillingu. Lögreglan staðfestir að húsleitir hafi verið framkvæmdar í morgun, en tekur fram að málið tengist ekki skýrslu Stevens lávarðs.

Harewood í samningsviðræðum við Aston Villa

Enska Úrvalsdeildarliðið Aston Villa er í viðræðum við framherjann Marlon Harewood um hugsanlegan flutning leikmannsins til Villa frá West Ham. Þetta er staðfest á vefsíðu SkySports. Harewood hefur fengið leyfi til þess að yfirgefa West Ham þar sem hann er ekki í framtíðaráætlunum Alan Curbishley, framkvæmdastjóra liðsins.

Þrír leikir í Landsbankadeild karla í kvöld

Tíunda umferð Landsbankadeildar karla í knattspyrnu verður kláruð í kvöld með þremur leikjum. Fylkir fær Breiðablik í heimsókn, Víkingur mætir HK í Kópavogi og Fram tekur á móti Val í Reykjavíkurslag.

Madrid gerir tilboð í Robben

Real Madrid hefur lagt fram tilboð hollenska vængmannin Arjen Robben hjá Chelsea, samkvæmt umboðsmanni leikmannsins. Spænsku meistararnir hafa verið mikið orðaðir við Robben í sumar, og nú hafa þeir boðið 13,5 milljónir punda í leikmanninn.

Brasilía sigraði Argentínu í úrslitaleik Suður-Ameríkukeppnarinnar

Brasilía tryggði sér sigur í Suður-Ameríkukeppninni í kvöld með 3-0 sigri á Argentínu í úrslitaleik keppnarinnar. Julio Baptista og Daniel Alves skoruðu fyrir Brasilíu auk þess sem Roberto Ayala, varnarmaður Argentínu, varð fyrir því óláni að setja boltann í eigið net.

Jafntefli í Keflavík

Leik Keflavíkur og KR í Landsbankadeild karla var að ljúka með jafntefli, 1-1. Markalaust var í hálfleik, en Rúnar Kristinsson misnotaði vítaspyrnu fyrir KR í fyrri hálfleik. Símun Eiler Samuelsen kom heimamönnum yfir á 78. mínútu en Björgólfur Takefusa jafnaði fyrir KR-inga á 83. mínútu.

Guðjón tekur ekki til greina að leikur ÍA og Keflavíkur verði endurtekinn

Guðjón Þórðarson, þjálfari ÍA í Landsbankadeild karla í knattspyrnu, segir það ekki koma til greina að endurtaka umdeildan leik ÍA og Keflavíkur. Í leiknum skoraði Bjarni Guðjónsson umdeildasta mark sumarsins sem tryggði ÍA sigur á Keflavík.

Úrslitaleikur Copa America fer fram í kvöld

Brasilía og Argentína mætast í draumaúrslitaleik Suður-Ameríkubikarsins í kvöld. Dunga, þjálfari Brasilíu segir ljóst að Argentína sé sigurstranglegra liðið en Brasilíumenn ætli sér að spila með hjartanu.

Malouda byrjar vel hjá Chelsea

Florent Malouda spilaði sinn fyrsta leik fyrir Chelsea í gær og óhætt er að segja að hann hafi staðið sig með prýði. Í æfingaleik gegn Club America lenti Chelsea undir áður en Malouda skoraði glæsilegt mark á 75 mínútu. Níu mínútum síðar átti Malouda ágæta fyrirgjöf á fyrirliðann John Terry, sem tryggði Chelsea sigur með skallamarki.

Peter Crouch kostar 20 milljónir punda

Forráðamenn Liverpool hafa gefið það út að liðið muni ekki selja Peter Crouch fyrir minna en 20 milljónir punda. Þetta kemur í kjölfar þess að Aston Villa, Newcastle og Manchester City hafa lýst yfir áhuga sínum á leikmanninum.

Newcastle og Chelsea á eftir Cannavaro

Ensku Úrvalsdeildarliðin Chelsea og Newcastle eru nú að berjast um þjónustu Fabio Cannavaro hjá Real Madrid, en þessar fréttir koma í kjölfar þess að nýr þjálfari Real, Bernd Schuster, hefur sagt að ekki væri þörf fyrir Cannavaro lengur hjá liðinu.

Lið Mexíkó hirti bronsið

Mexíkó tryggði sér í kvöld þriðja sætið í Suður-Ameríkubikarnum með 3-1 sigri á Úrúgvæ. Úrúgvæ komst yfir í leiknum en Mexíkó jafnaði fyrir hlé. Tvö glæsileg mörk í seinni hálfleik gerðu út um leikinn og Mexíkómenn hirtu bronsið.

Mexíkó og Úrúgvæ keppa um bronsið í kvöld

Mexíkó og Úrúgvæ leika í kvöld um þriðja sætið í Suður-Ameríkubikarnum. Á morgun spila svo Brasilía og Argentína um gullið. Mexíkó tapaði 3-0 fyrir Argentínu í undanúrslitum en Úrúgvæ voru óheppnir að tapa fyrir Brasilíu í vítaspyrnukeppni í undanúrslitum. Leikurinn er sýndur beint á Sýn og hefst útsending klukkan 20:50.

Mancini orðaður við Liverpool

Liverpool eru orðaðir við kaup á Alessandro Mancini, leikmann Roma samkvæmt umboðsmanni leikmannsins, Gilmar Veloz. Mancini átti frábært tímabil með Roma á síðasta tímabili. Veloz segir að hann hafi talað við Rafa Benitez, framkvæmdastjóra Liverpool, en tekur það fram að engar samningsviðræður hafi átt sér stað á milli liðanna.

Skagamenn sóttu stig í Kaplakrikann

Leik FH og ÍA í Landsbankadeild karla var að ljúka. Leikurinn endaði 1-1. Tryggvi Guðmundsson kom FH yfir á 7. mínútu með marki úr vítaspyrnu. Það var svo Ellert Jón Björnsson sem jafnaði fyrir skagamenn á 79. mínútu.

Æfingaleikir ensku Úrvalsdeildarliðanna

Nokkur Úrvalsdeildarlið eru byrjuð að spila æfingaleiki til að stilla lið sín fyrir komandi átök í deildinni. West Ham, Arsenal, Liverpool, Portsmouth, Manchester City og Bolton sigruðu öll leiki sína í gær. Sven-Göran Erikson stjórnaði City til sigurs gegn Doncaster í fyrsta leik sínum sem framkvæmdastjóri.

Mourinho býst ekki við að kaupa fleiri leikmenn

José Mourinho segir að kaupin á Florent Malouda séu sennilega síðustu kaup Chelsea í sumar. Mourinho kvartaði sáran yfir að vera með of lítinn hóp á síðasta tímabili þegar mikið var um meiðsli innan liðsins, og því var búist við að hann myndi kaupa marga leikmenn í sumar.

U19: Styttist í Evrópumót kvennalandsliða

Nú eru aðeins fjórir dagar þar til Evrópumót kvennalandsliða undir 19 ára hefst hér á landi. Þetta er stærsta verkefni sem knattspyrnusamband Íslands hefur ráðist í. Opnunarleikur Íslands og Noregs verður í Laugardalnum á miðvikudaginn.

City kaupir Svisslending fyrir metupphæð

Enska Úrvalsdeildarliðið Manchester City hefur landað hinum efnilega Gelson Fernandes, 20 ára svissneskum miðjumanni. City keypti leikmanninn frá Sion fyrir 3,8 miljónir punda sem er met í svissnesku deildinni.

Fer Shevchenko aftur til A.C. Milan?

Eigandi Chelsea, Roman Abramovich, ætlar að tala við Andriy Shevchenko áður en ákveðið verður hvort að leikmaðurinn verði seldur aftur til A.C. Milan með miklu tapi. Shevchenko var keyptur til Chelsea frá Milan fyrir síðasta tímabil fyrir 30 milljónri punda.

David Beckham tók við Galaxy-treyju nr 23

Knattspyrnugoðið David Beckham og Victoria kona hans komu til Los Angeles í nótt. Beckaham tók við treyju númer 23 úr hendi forráðamanna knattspyrnufélagsins LA Galaxy á fréttamannafundi núna síðdegis.

Umboðsmaður: Ljungberg spilar ekki með öðru liði á Englandi

Freddie Ljungberg, miðjumaður Arsenal, fer ekki til annars liðs í Úrvalsdeildinni samkvæmt umboðsmanni hans, Claes Elefalk. Allt lítur út fyrir að leikmaðurinn sé á förum frá Arsenal í sumar og hafa lið Manchester City og Sunderland verið orðuð við leikmanninn.

Liverpool kaupir Babel

Liverpool hefur klófest hollenska landsliðsmanninn Ryan Babel frá Ajax og hefur hann skrifað undir fimm ára samning við félagið. Talið er að Liverpool pungi út 11,5 milljónum punda fyrir leikmanninn.

AZ Alkmaar býður Grétari Rafni nýjan samning

Hollenska liðið AZ Alkmaar hefur boðið íslenska landsliðsmanninum Grétari Rafni Steinssyni nýjan samning við félagið. Þetta sýnir að félagið ætli sér að halda Grétari í herbúðum liðsins, en enska úrvalsdeildarliðið Middlesbrough hefur verið á eftir honum.