Við lítum á þetta sem tapaðan leik

HK og Víkingur náðu bæði í langþráð stig í 2-2 jafntefli liðanna í Landsbankadeildinni í gær. Víkingar komust í 2-0 og fengu mörg færi til að skora fleiri mörk en HK sýndi mikinn karakter í að vinna sig aftur inn í leikinn og tryggja sér stigið.

Tvö mörk Víkinga á fyrsta á hálftímanum þýddu að nýliðarnir urðu að koma út úr skelinni og gera eitthvað því þetta var sannkallaður sex stiga leikur liða sem allt hafði gengið á afturfótunum hjá í undanförnum umferðum.

Magnús Gylfason var í banni og það virtist hafa mjög góð áhrif á Víkinga í upphafi leiks. Víkingar fengu vítaspyrnu eftir aðeins tólf mínútur. Sinisa Kekic skoraði af öryggi úr spyrnunni og bjó síðan til annað mark fyrir Viðar Guðjónsson 19 mínútum síðar. Það tók HK-menn nokkurn tíma að átta sig á stöðunni en undir lok hálfleiks náðu þeir ítrekað að skapa hættu í kringum aukaspyrnur Rúnars Páls Sigmundssonar. Finnbogi Llorens féll í teignum eftir eina slíka og Ólafur Valdimar Júlíusson skoraði af öryggi úr vítinu. HK var komið inn í leikinn.

Seinni hálfleikurinn var síðan opinn í báða enda og bæði lið voru dugleg í að skapa sér færi. HK-menn tóku meiri áhættu í leik sínum og færðu liðið framar á völlinn en Víkingar voru alltaf hættulegir í skyndisóknum sínum. Finnbogi Llorens jafnaði síðan leikinn með glæsilegum skalla eftir hornspyrnu Rúnars Páls Sigmundssonar og það sem eftir var leiksins gátu bæði lið skoraði sigurmarkið og tryggt sér öll stigin þó að færi Víkinga væru bæði fleiri og hættulegri. HK lék síðustu sjö mínúturnar manni færri eftir að Oliver Jaeger fékk sitt annað gula spjald.

„Við vorum gjörsamlega á hælunum í fyrri hálfleik og byrjuðum ekkert leikinn fyrr en þeir voru komnir 2-0 yfir. Við ræddum málin í hálfleik og það var allt annað að sjá okkur í seinni hálfleik. Við máttum ekki tapa þessum leik og það er gríðarlega mikilvægt fyrir okkur að tapa ekki fyrir Víking sem er að berjast við okkur í neðri hlutanum. Þetta var líka dýrmætt fyrir okkur sjálfa að sjá það að þó að við lendum undir og jafnvel 2-0 undir þá getum við komið til baka og fengið eitthvað út úr leikjunum," sagði Gunnleifur Gunnleifsson, fyrirliði HK.

„Við áttum að vinna þennan leik. Það var eins og við höfðum orðið saddir þegar við komumst 2-0 yfir og þá er skelfilegt að missa þetta niður. Þetta var fínn leikur í heildina hjá okkur. Við erum að gera góða hluti fram á við og erum búnir að breyta um stíl sem er að skapa okkur mikið af færum. Þetta eru mikil vonbrigði að missa þetta niður því við erum í mikilli keppni við HK og nú eru þeir ennþá tveimur stigum á undan okkur og því lítum við á þetta sem tap," sagði Grétar Sigurðarson, fyrirliði Víkinga.