Benayoun semur við Liverpool

Enska úrvalsdeildarfélagið Liverpool gekk í dag frá kaupum á ísraelska miðjumanninum Yossi Benayoun frá West Ham fyrir um 5 milljónir punda og hefur hann skrifað undir fjögurra ára samning við félagið. Benayoun er 25 ára gamall og hefur Rafa Benitez stjóri Liverpool verið lengi með augun á honum.

250.000 treyjur þegar pantaðar hjá LA Galaxy

Forseti bandaríska knattspyrnufélagsins LA Galaxy segir að stuðningsmenn liðsins hafi þegar pantað yfir 250.000 treyjur í kjölfar komu David Beckham til Los Angeles á morgun. Það er ekki síður áhugavert þegar tekið er tillit til þess að stuðningsmennirnir höfðu ekki séð hvernig nýju treyjurnar litu út áður en þeir pöntuðu þær.

Ajax samþykkir tilboð Liverpool í Babel

Hollenska félagið Ajax hefur nú loksins komist að samkomulagi við Liverpool um sölu á útherjanum Ryan Babel. Sagt er að kauvirðið sé 17 milljónir evra og að Babel muni skrifa undir fimm ára samning við enska félagið.

Beckham-hjónin keyptu upp fyrsta farrými

David og Victoria Beckham eru nú á Heathrow-flugvelli í Lundúnum þar sem þau hafa keypt upp allt fyrsta farrými í vélinni sem flytur þau til Los Angeles. Þar mun Beckham verða tilkynntur sem leikmaður LA Galaxy með mikilli viðhöfn á morgun. Sky sjónvarpsstöðin fylgist með hverju spori þeirra hjóna á leiðinni til Bandaríkjanna og nokkur seinkun hefur orðið á fluginu vestur um haf í dag.

Fowler í viðræðum við Sydney FC

Framherjinn Robbie Fowler er nú kominn til Ástralíu þar sem hann mun funda með forráðamönnum Sydney FC með það fyrir augum að semja við félagið. Fowler er með lausa samninga eftir að hann var látinn fara frá Liverpool í vor og gæti fetað í fótspor Dwight Yorke sem spilaði með ástralska liðinu um nokkurt skeið.

Sven-Göran lokkaði mig til City

Ítalski framherjinn Rolando Bianchi segir að það hafi verið knattspyrnustjórinn Sven-Göran Eriksson sem náði að lokka sig til Manchester City frá Reggina á Ítalíu. Framherjinn er nú í læknisskoðun á Englandi og skrifar undir samning við félagið strax að henni lokinni.

Alves vill ólmur fara til Chelsea

Umboðsmaður bakvarðarins Daniel Alves hjá Sevilla hefur farið þess á leit við félagið að það lækki verðmiðann á leikmanninum svo hann geti farið til Chelsea eins og hann óski sér. Alves vill ólmur ganga til liðs við ensku bikarmeistarana en Sevilla er sagt heimta 20 miljónir evra fyrir hann.

Sagna semur við Arsenal

Arsenal gekk í dag frá kaupum á varnarmanninum Bakari Sagna frá franska félaginu Auxerre fyrir óuppgefna upphæð. Sagna hefur skrifað undir langtíma samning við Arsenal og er sagður geta spilað flestar stöður í vörninni sem og á miðjunni. Hann er 24 ára gamall og hefur unnið sér sæti í franska landsliðinu þó hann hafi enn ekki fengið að spila leik.

Hertha samþykkir tilboð Tottenham í Boateng

Þýska knattspyrnufélagið Hertha Berlín hefur samþykkt 5 milljón punda kauptilboð Tottenham í miðjumanninn Kevin-Prince Boateng. Boateng þessi hefur verið í herbúðum Hertha síðan hann var sjö ára gamall og er í U-21 árs liði Þjóðverja. Sevilla hefur einnig verið á höttunum eftir Boateng.

Chivu verður áfram hjá Roma

Rúmenski landsliðsmaðurinn Cristian Chivu verður áfram hjá ítalska félaginu Roma eftir að varnarmanninum tókst ekki að semja við Real Madrid sem samþykkti að greiða fyrir hann 20 milljónir evra. Það er því ljóst að Chivu verður með lausa samninga hjá Roma á næstu leiktíð og getur þá farið frá félaginu án greiðslu.

Owen: Ég er ekki að fara frá Newcastle

Framherjinn Michael Owen ítrekar að hann sé ánægður í herbúðum Newcastle og hefur lofað stuðningsmönnum félagsins að hann fari ekki frá því eins og skrifað hefur verið um í bresku blöðunum.

Chris Baird til Fulham

Norður-Írski landsliðsmaðurinn Chris Baird gekk í dag í raðir Fulham í ensku úrvalsdeildinni frá Southampton. Baird hafði verið á leið til liðs við Sunderland fyrir 3 milljónir punda, en hann kaus heldur að ganga í raðir Fulham þegar félagið hækkaði tilboð sitt á síðustu stundu. Baird mun því spila undir stjórn fyrrum landsliðsþjálfara síns Lawrie Sanchez á næstu leiktíð.

Beckham á erfitt verkefni fyrir höndum

Brasilíska knattspyrnugoðsögnin Pele segir að David Beckham eigi erfitt verkefni fyrir höndum þegar hann hefur leik í MLS deildinni í Bandaríkjunum, en Beckham verður kynntur formlega sem nýr leikmaður LA Galaxy á morgun.

Messi með stórkostlegt mark í 3-0 sigri á Mexíkó

Argentínumenn tryggðu sér í nótt sæti í úrslitaleik Suður-Ameríkukeppninnar með 3-0 sigri á Mexíkóum í undanúrslitaleik. Leo Messi sannaði snilli sína enn eina ferðina með stórkostlegu marki. Ýtið á „Spila“ til að sjá myndir úr leiknum.

Real Madrid fær Dudek

Real Madrid hefur klófest pólska markvörðinn Jerzy Dudek frá Liverpool en þeir þurftu ekkert að borga fyrir leikmanninnn þar sem hann var með lausan samning. Real Madrid fengu hann til liðsins til þess að vera varamaður fyrir spænska landsliðsmarkvörðinn, Iker Casillas.

Heinze stoltur yfir áhuga Liverpool

Vinstri bakvörðurinn Gabriel Heinze hefur viðurkennt að hann sé stoltur yfir því að vera orðaður við Liverpool, en hann er líka spenntur yfir því að landsliðsfélagi hans hjá Argentínu, Carlos Tevez, sé hugsanlega á leið til Manchester United. Heinze skoraði í gær fyrsta mark Argentínu í 3-0 sigri á Mexíkó í undanúrslitum Suður-Ameríkukeppninni.

Blikar höfðu betur í grannaslagnum

Breiðablik, Keflavík og Fylkir urðu í kvöld síðustu liðin til að tryggja sér sæti í fjórðungsúrslitum Visa-bikarsins í knattspyrnu. Breiðablik lagði granna sína í HK 3-1 eftir framlengdan leik, Fylkir lagði Þór á Akureyri 4-1 og Keflvíkingar lögðu Þróttara 1-0 á Valbjarnarvelli.

Steve Coppell verður á Shellmótinu

ÍBV hefur ákveðið stytta Shellmótið á næsta ári um einn dag þannig að því ljúki á laugardegi í stað sunnudags en þess í stað þjappa dagskránni betur saman. Að sögn Einars Friðþjófssonar, framkvæmdastjóra Shellmótsins, er undirbúningur fyrir mótið sumarið 2008 þegar hafinn og hefur verið samið við Steve Coppell, knattspyrnustjóra Reading í ensku úrvalsdeildinni að vera heiðursgestur mótsins.

Hálfleikur í bikarnum

Nú hefur verið flautað til hálfleiks í þremur síðustu viðureignunum í 16-liða úrslitum Visa bikarsins og er staðan 1-0 í þeim öllum. Fylkir hefur yfir 1-0 gegn Þór á Akureyri með marki Vals Fannars Gíslasonar, Keflavík hefur yfir 1-0 gegn Þrótti R með marki Sigurbjörns Hafþórssonar og þá hefur HK yfir 1-0 gegn grönnum sínum í Breiðablik í Kópavogi með marki Kristjáns Halldórssonar.

Legia rekið úr Evrópukeppninni

Pólska liðið Legia frá Varsjá var í dag rekið úr Intertoto keppninni í knattspyrnu eftir að stuðningsmenn liðsins gerðu allt vitlaust á leik liðsins í Vilinius í Litháen á dögunum. Liði Vetra var dæmdur 3-0 sigur í leiknum og fer það áfram í keppninni og mætir Blackburn í næstu umferð.

Nedved áfram hjá Juventus

Tékkneski miðjumaðurinn Pavel Nedved hefur samþykkt að vera eitt ár í viðbót hjá Juventus ef marka má fregnir frá Tórínó í dag. Nedved er 34 ára gamall og sagðist líklega leggja skóna á hilluna í sumar ef hann fengi ekki veglega kauphækkun fyrir næsta ár.

Milan að bjóða 11 milljarða í Ronaldinho?

Spænska dagblaðið AS heldur því fram í dag að Silvio Berlusconi forseti AC Milan sé tilbúinn að greiða 89 milljónir punda fyrir brasilíska snillinginn Ronaldinho hjá Barcelona - eða um 11 milljarða íslenskra króna.

Wilhelmsson á leið í ensku úrvalsdeildina?

Sænski útherjinn Christian Wilhelmsson er nú sterklega orðaður við ensku úrvalsdeildina, en forseti Roma hefur tilkynnt að hann verði ekki áfram hjá félaginu. Wilhelmsson er leikmaður Nantes í Frakklandi en var í láni hjá Roma á síðustu leiktíð þar sem hann stóð sig prýðilega. Hann hefur nú verið orðaður við Manchester City á Englandi þar sem landi hans Sven-Göran Eriksson er orðinn knattspyrnustjóri.

Ken Bates kaupir Leeds aftur

Ken Bates verður áfram við stjórn hjá enska knattspyrnuliðinu Leeds United eftir að hafa unnið kapphlaupið um að kaupa liðið. Liðið féll úr næstefstu deild síðastliðið haust, eftir að hafa farið fram á greiðslustöðvun til að koma í veg fyrir gjaldþrot félagsins.

Nugent til Portsmouth

Enska úrvalsdeildarfélagið Portsmouth gekk í dag frá kaupum á enska landsliðsframherjanum David Nugent frá Preston fyrir 6 milljónir punda. Nugent hefur skrifað undir fjögurra ára samning við úrvalsdeildarfélagið og stóðst læknisskoðun í morgun. Hann er 22 ára gamall og vann sér sæti í enska landsliðinu á síðustu leiktíð þrátt fyrir að leika utan úrvalsdeildarinnar.

Englendingar mæta Rússum á gervigrasi

Leikur Englendinga og Rússa í E-riðli undankeppni EM í haust fer fram á gervigrasi. Þetta var tilkynnt í dag. Leikurinn fer fram miðvikudaginn 17. október og ekki þótti ráðlegt að reyna að spila hann á grasi eins og Guus Hiddink þjálfari Rússa hafði viljað. Luzhniki leikvangurinn tekur 84,000 manns í sæti og mun hýsa úrslitaleikinn í Meistaradeildinni á næstu leiktíð. Sá leikur verður þó spilaður á grasi.

Milito á leið til Barcelona

Forseti Barcelona lýsti því yfir í útvarpsviðtali í morgun að miðvörðurinn Gabriel Milito sé við það að ganga í raðir félagsins frá Real Zaragoza. Milito er 26 ára gamall landsliðsmaður Argentínu og hefur verið einn besti varnarmaður spænsku deildarinnar síðustu ár. Milito var nærri genginn í raðir Real Madrid árið 2003, en stóðst þá ekki læknisskoðun og því varð ekkert úr kaupunum.

Mourinho: Pressan er öll á United

Jose Mourinho vill lítið tjá sig um vasklega framgöngu keppinauta hans í Manchester United á leikmannamarkaðnum í sumar en segir að aukin umsvif félagsins í sumar geri ekkert annað en að auka pressuna á þá rauðu.

Sunderland að kaupa Chopra

Nýliðar Sunderland í ensku úrvalsdeildinni eru nú að leggja lokahönd á að ganga frá kaupum á framherjanum Michael Chopra frá Cardiff fyrir um 5 milljónir punda. Chopra spilaði um hríð með Newcastle og er 23 ára gamall. Hann skoraði 22 mörk fyrir Cardiff í Championship deildinni á síðustu leiktíð.

Úrvalsdeildin hótar West Ham

Breska sjónvarpið greinir frá því í morgun að enska úrvalsdeildin hafi nú hótað West Ham frekari refsingu í máli Carlos Tevez ef félagið fær ekki hverja einustu krónu af kaupverðinu - verði hann seldur til Manchester United.

Brasilía í úrslitaleikinn á Copa America

Núverandi Suður-Ameríkumeistarar Brasilíu misstu tvisvar niður forskot gegn Úrúgvæ í undanúrslitaleik Copa America í nótt en tryggðu sér að lokum sæti í úrslitum í vítakeppni. Staðan í leiknum var jöfn 2-2 eftir venjulegan leiktíma og því varð að grípa til vítakeppni.

Ég ber engan kala til Guðmundar Mete

Sextán liða úrslitum VISA-bikars karla lýkur í kvöld með þremur leikjum. Þór tekur á móti Fylki á Akureyri, Breiðablik og HK mætast í Kópavogsslag og svo tekur 1. deildarlið Þróttar á móti Keflavík. Í þeirri viðureign mætast á ný Hjörtur Hjartarson, leikmaður Þróttar, og Guðmundur Mete, leikmaður Keflavíkur.

Dramatískur Valssigur í Vesturbæ

Valsmenn tryggðu sér sæti í 8-liða úrslitum VISA-bikars karla eftir dramatískan sigur á KR-ingum í Vesturbænum. Vítaspyrnukeppni þurfti til að knýja fram úrslit en þar fóru heimamenn illa af ráði sínu. KR-ingar brenndu úr þremur vítaspyrnum á meðan Valsmenn skoruðu úr öllum sínum.

Sjö marka leikur á Eskifirði

Íslandsmeistarar FH, 1. deildarlið Fjölnis og 2. deildarlið Hauka komust í gær í átta liða úrslit VISA-bikars karla. Haukarnir slógu út úrvalsdeildarlið Fram í bráðabana í vítaspyrnurkeppni.

Skagamenn unnu Víkinga í framlengingu í gær

Sigurganga Guðjóns Þórðarsonar í bikarkeppninni heldur áfram en lið undir hans stjórn hafa unnið 20 leiki í röð í keppninni. Í gær lágu Víkingar, 2-1, fyrir ÍA í framlengdum leik. Skagamenn geta þakkað hinum 16 ára markverði, Trausta Sigurbjörnssyni, og Jóni Vilhelmi Ákasyni fyrir sigurinn.

Enginn úrskurður

Aganefnd og úrskurðar­nefnd KSÍ kom saman í gær en beðið var eftir úrskurði hennar um atburðina á Akranesi í síðustu viku þegar sauð upp úr milli Skagamanna og Keflvíkinga.

Hafþór fótbrotnaði

Hafþór Ægir Vilhjálmsson, miðjumaður Vals, lenti í hörðu samstuði við Ásgeir Örn Ólafsson, ungan miðjumann KR, strax á 7. mínútu leiksins í gær. Hafþór var borinn útaf og síðar fluttur af vellinum með sjúkrabíl. Við skoðun á sjúkrahúsi kom í ljós að Hafþór er fótbrotinn og verður frá keppni það sem eftir lifir sumars.

Robben: Samningaviðræðurnar ganga illa

Hollenski landsliðsmaðurinn Arjen Robben segir samningaviðræður sínar við Chelsea ganga illa. Nýr fimm ára samningur hefur verið á borðinu um nokkurt skeið en á meðan var Chelsea að ganga frá kaupum á öðrum útherja, Florent Malouda. Robben hefur því eðlilega verið sagður á förum frá Chelsea og hefur Real Madrid verið kallað líklegasta félagið til að landa honum.

Ljungberg í viðræðum við Fiorentina

Arsenal og Fiorentina eru nú í viðræðum um hugsanlega sölu enska félagsins á sænska landsliðsmanninum Freddie Ljungberg. Umboðsmaður leikmannsins segir Ljungberg hugsanlega til í að fara til Ítalíu ef hann fái ásættanleg kjör. Ljungberg hefur verið á mála hjá Arsenal í níu ár og er þrítugur.

Haukar sendu Fram út úr bikarkeppninni

Lið Hauka úr 2. deildinni gerði sér lítið fyrir og sló Framara út úr Visa-bikarnum í kvöld eftir framlengdan leik og vítakeppni. Staðan að loknum venjulegum leiktíma var 1-1 og 2-2 eftir framlengingu. Úrslitin réðust svo ekki fyrr en í bráðabana þar sem heimamenn fögnuðu sætum sigri á hærra skrifuðum andstæðingum sínum.

Kjartan hetja Valsmanna

Valsmenn tryggðu sér í kvöld sæti í 8-liða úrslitum bikarkeppninnar í knattspyrnu með sigri á KR eftir framlengingu og vítakeppni. Staðan var jöfn 1-1 að loknum venjulegum leiktíma þar sem Guðmundur Benediktsson skoraði fyrir Val en Tryggvi Bjarnason jafnaði fyrir KR. Kjartan Sturluson varði svo tvær vítaspyrnur KR-inga í vítakeppninni og tryggði sínum mönnum sigurinn.

Skagamenn í 8-liða úrslit

Skagamenn eru komnir í 8-liða úrslit Visa-bikarsins eftir 2-1 sigur á Víkingi á heimavelli sínum í kvöld. Arnar Sigurgeirsson kom gestunum yfir í leiknum á síðustu augnablikum fyrri hálfleiks en Andri Júlíusson svaraði fyrir ÍA í upphafi þess síðari. Það var svo gott einstaklingsframtak Jóns Vilhelms Ákasonar í síðari hálfleik framlengingar sem réði úrslitum.

Benayoun á leið til Liverpool

Liverpool hefur komist að samkomulagi um kaup á miðjumanninum Yossi Benayoun frá West Ham að sögn umboðsmanns leikmannsins. Breska sjónvarpið segir kaupverðið vera um 4 milljónir punda. Benayoun er 25 ára gamall og er fyrirliði ísraelska landsliðsins. Hann hefur verið hjá West Ham síðan árið 2005 þegar hann kom frá Racing Santander á Spáni fyrir 2,5 milljónir punda.

Fjölnir og FH komin í 8-liða úrslit

Fjölnismenn eru komnir í 8-liða úrslit Visabikarsins í knattspyrnu í fyrsta sinn eftir 4-3 sigur á Fjarðabyggð á Eskifirði í æsilegum leik. Þá eru Íslandsmeistarar FH komnir áfram eftir 3-0 sigur á ÍBV í Eyjum. Leikir Hauka og Fram, KR og Vals og svo ÍA og Víkings eru allir komnir í framlengingu eftir að staðan var jöfn 1-1 eftir 90 mínútur í þeim öllum.

Gríðarlegur tekjumunur í Evrópukeppnunum

Evrópumeistarar AC Milan fengu mestar tekjur fyrir þáttöku sína í Meistaradeildinni á síðasta tímabili en peningalistinn var tilkynntur af Knattspyrnusambandi Evrópu í dag. Milan bar sigurorð af Liverpool í úrslitaleik í vor og halaði inn tæpar 40 milljónir evra með góðu gengi sínu í keppninni.