Gísl sleppt í Írak

Bandarískum blaðamanni, Micah Geran, sem verið hefur í haldi mannræningja í Nassiríja í Írak, var sleppt úr haldi seint í gær. Honum var rænt þrettánda ágúst síðastliðinn og er hann sagður vel á sig kominn.

Olíuverð á svipuðu reiki

Olíuverð er á svipuðu reiki og fyrir helgi en seint á föstudag lækkaði það skyndilega um tæp níutíu sent, var 47,86 sent á fatið. Sérfræðingar töldu þá allar líkur á að verðið færi yfir fimmtíu dollara og segja þeir þá spá enn í gildi. Verðið hefur hækkað lítillega í morgun.

Málverka Munchs enn leitað

Enn hefur hvorki fundist tangur né tetur af ræningjunum sem gengu með tvö þekktustu málverk Edvards Munchs, Ópið og Madonnu, út úr listasafni hans í Ósló í gær. Ræningjarnir hafa heldur ekki haft samband til yfirvöld til að krefjast lausnargjalds, eins og búist var við.

Ísraelar byggja í landnemabyggðum

Ísraelar byggja nú hundrað ný heimili í landnemabyggðum á svæði Palestínumanna úti fyrir Jerúsalem. Framkvæmdirnar hafa valdið nokkurri ólgu meðal Palestínumanna sem sökuðu bandarísk stjórnvöld í gær um að ganga þvert á samþykktir um friðarferli í Miðausturlöndunum með því að samþykkja stækkun á landnemabyggðunum.

Olíuverð hækkar aftur

Olíuverð hækkaði í morgun eftir að hafa lækkað skyndilega um tæp níutíu sent skömmu áður en viðskiptum lauk á föstudag. Sérfræðingar töldu þá allar líkur á að verðið færi yfir fimmtíu dollara og segja þeir þá spá enn í gildi.

Meintur morðingi framseldur

Meintur morðingi Zorans Djindjic, forsætisráðherra Serbíu, verður framseldur frá Grikklandi til Serbíu von bráðar. Dejan Milenkovic var handtekinn í Þessalóniku á Grikklandi fyrr á þessu ári en hann er talinn lykilmaður innan mafíuhóps sem talinn er bera ábyrgð á morðinu á Djindjic.

Harka og ósvífni í kapphlaupinu

Harka og ósvífni er komin í forsetakapphlaupið í Bandaríkjunum. Hópar sem tengjast Bush forseta saka John Kerry um að ljúga til um hetjudáðir í Víetnamstríðinu og gefa í skyn að hann sé engin stríðshetja. Kerry segir þetta skítkast úr herbúðum forsetans.

Líklega góðkunningjar lögreglu

Lögreglan í Ósló er engu nær um felustað mannanna sem rændu tveimur þekktustu málverkum Edvards Munchs af safni í Ósló í gær. Þó er talið að ekki séu fagmenn á ferð heldur svokallaðir góðkunningjar lögreglu.

Moskan á valdi skæruliðanna

Barist er í nánd við Imam Ali moskuna í Najaf í Írak sem er enn á valdi Mehdi-skæruliðasveita Muqtada al-Sadrs. Nokkur óvissa hefur ríkt um hvernig ástandið í Najaf væri í raun og veru og á hvers valdi Imam Ali moskan væri.

Yfir 500 íbúðir verða reistar

Ísraelar reisa nú hundrað og tuttugu íbúðir í landnemabyggðum á landssvæðum Palestínumanna í nágrenni Jerúsalem. Samkvæmt heimildum Reuters-fréttastofunnar er stefnt að því að reisa yfir fimm hundruð íbúðir á svæðinu. Bandaríkjastjórn er sögð hafa veitt óformlegt leyfi fyrir þessu.

Vill réttarhöldin frá Bagdad

Bandarískur hermaður sem ákærður er fyrir pyntingar og kynferðislega niðurlægingu á írökskum föngum í Abu Ghraib fangelsinu hefur óskað eftir því að réttarhöldin verði færð frá Bagdad. Hermaðurinn, Charles Graner að nafni, segist ekki eiga möguleika á sanngjörnum réttarhöldum í íröksku höfuðborginni og bar þessa ósk því fram í dag.

Málverkin einhvers staðar í Ósló

Norska lögreglan telur að málverkunum sem stolið var úr Munch-safninu í Ósló í gær hafi verið komið fyrir einhvers staðar í borginni. Tveir vopnaðir menn höfðu útgáfur af frægustu verkum Munchs á brott með sér í gærmorgun, Ópinu og Madonnu. Tugir gesta voru í safninu á þessum tíma og hafa þeir gefið þann vitnisburð að mennirnir hafi borið sig klaufalega.

Þrettán Nepölum rænt í Írak

Þrettán nepölskum ríkisborgurum var rænt í Írak í dag að því er nepalska utanríkisráðuneytið tilkynnti fyrir stundu. Fólkið er allt starfsmenn jórdansks fyrirtækis og hafði verið sent á þess vegum til Íraks til að vinna. Að sögn nepalska utanríkisráðuneytisins var því rænt þegar það var að stíga upp í bifreið, stuttu eftir komuna til landsins. </font />

Fellibylur ógnar Taívan

Líkur eru á að fellibylur gangi yfir Taívan á næstu dögum með tilheyrandi flóðum og aurskriðum. Af þeim sökum hefur verið ákveðið að loka öllum skólum, fjármálamörkuðum og fyrirtækjum í höfuðborginni Taípei og fleiri stöðum í norðvesturhluta landsins á morgun.

Stór eiturlyfjabarón handtekinn

Mexíkóska lögreglan hefur handtekið eiturlyfjabarón þar í landi sem grunaður er um að standa fyrir smygli á u.þ.b. helmingi þess magns eiturlyfja sem smyglað er árlega til Bandaríkjanna frá Mexíkó.

Al-Sadr farinn frá Najaf

Muqtada al-Sadr er farinn frá Najaf. Reyndar segir lögreglustjórinn í borginni að hann hafi farið úr Imam Ali moskunni fyrir rúmri viku. Mehdi-hersveitir hans berjast samt áfram og hafa í dag tekist á við bandaríska og írakska hermenn í návígi. Sjónarvottar segja bardagana þá hörðustu síðan átök blossuðu upp í borginni fyrir þremur vikum.

Myndirnar ekki bannaðar

Myndir sem sýna bandaríska hermenn níðast á föngum í herfangelsum í Írak verða ekki bannaðar. Lögmenn hermannanna fóru þó fram á það við frumréttarhöld í Þýskalandi í dag.

Nýjar byggingar í landnemabyggðum

Stjórnvöld í Ísrael tilkynntu í gær að þau munu reisa rúmlega 500 byggingar á Vesturbakkanum, til viðbótar við þúsund nýbyggingar sem einnig munu rísa í landnemabyggðum. Þá kunngjörðu þau að smíði aðskilnaðarmúrsins ljúki ekki fyrr en árið 2005, ári á eftir áætlun. 

Bush fordæmir rógsherferð

George W. Bush Bandaríkjaforseti fordæmir sjónvarpsauglýsingar frá einkaaðilum sem gera lítið úr honum eða John Kerry, mótframbjóðanda sínum. Hann hvetur fólk til að láta af slíkum rógi og segir þetta slæmt fyrir kosningarnar.

Hörmungarnar í Darfúr gætu aukist

Farsóttir gætu aukið enn hörmungar flóttamanna frá Darfur-héraði í Súdan. Þrátt fyrir fögur fyrirheit um bætt ástand eru skæruliðasveitir stjórnvalda enn sagðar á kreiki í Darfur.

Dómsmálaráðherra sýnt banatilræði

Fjórir létust og átta særðust þegar dómsmálaráðherra Íraks var sýnt banatilræði. Sjálfsmorðsárás var gerð á bílalest ráðherrans í í Bagdad, en hann slapp ómeiddur. Hryðjuverkasamtök Jórdanans al-Zarqawi, hafa lýst sig ábyrg fyrir sprengingunni.

18 létust á útifundi í Bangladesh

Að minnsta kosti 18 léstust þegar sprengjur sprungu á útifundi í Bangladesh seint í gærkvöldi. Fyrrverandi forsætisráðherra landsins Hasina Wajed var í aðalhlutverki á fundinum og taliðað árásin hafi beinst að henni. Um 300 manns særðust í árásinni.

Enn kom til átaka í Najaf

Að minnsta kosti 40 létust í gær í við borgina Najaf þegar til átaka kom milli herskárra sjíta-múslima og bandarísks herliðs. Átökin áttu sér stað í nálægum bæ, Kufa, sem er einn af mörgum stöðum þar sem sjíta-múslimar sem eru stuðningsmenn róttæka herklerksins Moqtada al-Sadr, hafa gert uppreisn.

Ópi Munchs rænt

Málverkin, Ópið og Maddonna, sem rænt var úr Munch safninu í Osló í dag, eru svo þekkt að ómögulegt verður fyrir þjófana að selja þau, segja listasérfræðingar. Það er því talið líklegt að ræningjarnir muni fara fram á lausnargjald fyrir málverkin.

Lögreglan í viðbragðsstöðu

Írakska lögreglan er í viðbragðsstöðu komi til þess að írakski forsætisráðherrann krefjist þess að þeir taki Imam Ali moskuna í borginni Najaf með valdi. Enn hafa liðmenn uppreisnarklerksins Moqtada al-Sadr moskuna á sínu valdi.

Gyðingahatur færist í vöxt

Brennuvargar brenndu athvarf í gyðingahverfi í París í morgun, þá voru hakakrossar málaðir á veggi þess. Forseti Frakklands, Jacques Chirac, hefur fordæmt verknaðinn. Þetta er ein margra árása sem gerðar hafa verið á samfélag gyðinga að undanförnu.

Fyrsta þing Sómalíu í 13 ár

Fyrsta þing Sómalíu í 13 ár verður að öllum líkindum að veruleika í dag, þegar innsetning þess verður haldin í höfuðborg Kenya, Nairobi. Komist hefur verið að samkomulagi um 275 þingsæti en umræður hafa staðið í tvö ár milli stjórnmálaflokka.

25 létust í flugslysi

25 létust þegar flugvél flughersins í Venesúela, brotlenti vestur af Caracas. Talið er að slæmt veður hafi ollið slysinu. Þrír voru í áhöfn vélarinnar og 22 farþegar. Þegar björgunarlið kom á staðinn var enginn á lífi. Flugumferðarstjórar misstu samband við flugvélina síðdegis á laugardag, en vélin var að koma frá karabísku eyjunni La Orchila.

Þrír látast í launsátri

Starfsmaður frá Indónesíu og tveir Írakar, létust í launsátri í íröksku borginni Mosul í dag. Þá særðist maður frá Filipseyjum. Útlendingarnir tveir voru verktakar hjá erlendu fyrirtæki.

Mótmæla veru Bandaríkjahers

93 framámenn í samfélagi múslima, sem eru andvígir veru Bandaríkjahers í Írak, hafa hvatt múslima um heim allan að styðja andspyrnu gegn herjum Bandaríkjanna og bráðabirgðastjórn Íraka sem tók við völdum í júní.

Ræninginn talaði norsku

Mikið lið lögreglu rannsakar nú rán á málverkum sem stolið var af Munch safninu í Osló í dag. Málverkin eru margra milljóna virði og eru eftir Edward Munch. Lögregla rannsakar nú bæði safnið sjálft og svo flóttabíl ræningjanna sem fannst stuttu eftir ránið mannlaus.

Fyrstu réttarhöldin í Guantanamo

Fjórir af föngum Bandaríkjahers í Guantanamo á Kúbu koma fyrir herdómstól í vikunni. Þetta verða fyrstu réttarhöldin yfir föngum í Guantanamo.

Grunur um raðmorð

Breska lögreglan telur ýmislegt benda til þess að Amelie Delagrange, sem var myrt í London á fimmtudaginn, hafi verið fórnarlamb raðmorðingja.

Stálu Ópinu og Madonnu

Hinu fræga málverki Edvards Munch, Ópinu, var stolið frá Munch-safninu í Ósló í gær ásamt fleiri málverkum. Meðal þeirra var annað frægt verk eftir Munch, og heitir það Madonna. Tveir eða þrír vopnaðir menn gengu inn í safnið, hótuðu starfsfólki með byssum og fóru með málverkin út í bifreið sem beið fyrir utan safnið.

Afhenda Sistani moskuna

Liðsmenn Moqtada al-Sadr munu afhenda al-Sistani æðsta klerk sjíta, Ali moskuna í Najaf í Írak. Enn er á huldu hvar al-Sadr sjálfur heldur sig. Misvísandi fregnir berast þó enn af stöðu mála.

Höfðar mál gegn fangelsi

Bretinn Richard Reid, sem dæmdur var í lífstíðar fangelsi, fyrir að gera tilraun til að sprengja farþegaflugvél American Airlines, með sprengiefni sem hann kom fyrir í skóm sínum, hefur höfðað mál gegn bandarískum fangelsismálayfirvöldum.

Læknar sakaðir um pyntingar

Alvarlegar ásakanir um misþyrmingar gagnvart föngum eru settar fram í hinu virta læknatímariti Lancet, á hendur læknum og hjúkrunarfólks innan bandaríkjahers. Blaðið birtir upplýsingar úr gögnum frá stjórnvöldum sem gefa til kynna að heilbrigðisstarfsfólkið beri ábyrgð á slæmri meðferð fanga í Abu Graib fangelsinu í Írak, og hafi einnig gengið í skrokk á föngunum, líkt og fangaverðirnir.

Átök við borgina Hilla

Pólskur hermaður lést og sex aðrir slösuðust þegar bíll var sprengdur við bílalest hersveitarinnar við borgina Hilla í Írak. Þar með er tala látinna pólskra hermanna komin í 14 frá september þegar Pólland tók við stjórn átta þúsund manna alþjóðlegum her í Írak. Þetta var þriðja árásin á herliðið á skömmum tíma.

Vill banna auglýsingarnar

John Kerry, forsetaframbjóðandi demókrata, hefur lagt fram beiðni til bandarísku kosningastjórnarinnar, að banna auglýsingar sem birtar hafa verið í sjónvarpi þar sem köstuð er rýrð á feril hans sem hermanns í Víetnam stríðinu.

Tvær sprengjur í strandbæ

Tvær sprengjur sprungu í ruslagámum í tveimur strandbæjum á Norðvesturströnd Spánar fyrir um það bil klukkustund. Varað var við sprengjunum í símtali til dagblaðs í Baskalandi og staðhæft að aðkilnaðarsamtök Baska, ETA, bæru ábyrgð á þeim. Ekki er vitað hvort einhverjir hafi særst í sprengingunum.

Átök við Ali moskuna í morgun

Til átaka kom við Ali moskuna í Najaf í Írak í morgun, á milli Bandaríkjahers og Medi-hers sjítaklerksins Moqtadas al-Sadrs. Al-Sadr hefur gefið frá sér yfirráð yfir Imam Ali grafhýsinu, en Ali moskan er þó enn á valdi manna hans.

Fótboltallið Írak gagnrýnir Bush

Knattspyrnulið Íraka sem vann riðil sinn á Ólympíuleikunum, hefur gagnrýnt Bush Bandaríkjaforseta harðlega fyrir að nota liðið í auglýsingum fyrir kosningabaráttu sína. Margir liðsmenn eru Bush mjög reiðir og sagði einn þeirra að ef hann væri ekki á Ólympíuleikunum væri hann heima að berjast gegn bandaríska herliðinu.

Sprenging í Bangladesh

Að minnsta kosti fjórir létust í Bangladesh í dag þegar ein eða fleiri sprengjur sprungu við höfuðstöðvar helsta stjórnarandstöðuflokks landsins í höfuðborginni Dhaka á sama tíma og fyrrverandi forsætisráðherra landsins ávarpaði fund sem þar stóð yfir.

Fuglaflensuveiran finnst í svínum

Vísindamenn í Kína telja sig hafa fundið hina skæðu fuglaflensuveiru í svínum þar í landi, og segjast þeir hafa fundið hana á nokkrum bóndabæjum í Kína. Yfir 20 manns létust og um 200 milljónir fuglar voru drepnir, þegar fuglaflensufaraldur gekk yfir Asíu fyrr á þessu ári.

Starfslið SÞ ætti að fara

Starfsmannasamtök Sameinuðu þjóðanna telja að allt starfslið Sameinuðu þjóðanna í Afganistan eigi að yfirgefa landið þar sem þeim sé hætta búin. Líklegt þykir að starfsmenn Sameinuðu þjóðanna verði skotmörk þegar líður að kosningum í landinu í október. Þá verður kosinn nýr forseti, en ný stjórn verður kosin í apríl á næsta ári.