Milljarðatjón vegna hryðjuverkalaga

Tjón íslenskra fyrirtækja vegna þeirrar ákvörðunar breska stjórnvalda að beita hryðjuverkalögum gegn íslandi árið 2008 er talið nema um fimm milljörðum króna.

Óvenjuleg veðurblíða á landinu

Óvenjumikil hlýindi voru á landinu öllu í dag. Hitin stóð í tveggja stafa tölu á öllum byggðum bólum, en einnig var hlýtt á hálendinu.

Þingfundi slitið

Þingfundi var slitið nú rétt fyrir klukkan sex. Þar með var 139. löggjafarþingi slitið. Nú fá þingmenn tveggja vikna frí frá karpi, en nýtt þing verður sett 1. október næstkomandi.

Alþingismenn í ham

Alþingi hefur fúnkerað sem vel smurð maskína í dag og afgreitt hvert frumvarpið á fætur öðru. Það sem af er degi hefur þingið afgreitt 18 frumvörp sem lög, en þingfundur hófst klukkan 9:30 í morgun. Það gerir að meðaltali rúmlega eitt frumvarp á hálftíma. Þingmenn stefna að því að afgreiða tvö frumvörp til viðbótar og slíta svo haustþingi.

Tvísýna um eyjasiglingar á morgun

Útlit er fyrir að fella þurfi allar ferðir Baldurs milli lands og Eyja niður á morgun vegna veðurs. Þorlákshöfn kæmi ekki til greina sem varahöfn. Því eru þeir sem þurfa að komast til og frá eyjum á morgun hvattir til að taka ferjuna í dag.

Ný lög um Stjórnarráð Íslands samþykkt

Frumvarp ríkisstjórnarinnar til laga um Stjórnarráð Íslands var samþykkt á Alþingi rétt í þessu með 28 atkvæðum gegn 14. Tveir þingmenn sátu hjá.

Enn skelfur Katla

7 jarðskjálftar hafa orðið við Kötlu það sem af er degi. Skjálftarnir hafa verið fremur litlir, sá stærsti 2,7 á richter. Veðurfræðingur á vakt segir ekki um óvenjulega virkni að ræða. Katla hafi töluvert hrist sig undanfarna mánuði og því ekki um óvenjulega virkni að ræða.

Jón Bjarnason segir skilyrði ESB víðtæk

Þau skilyrði sem Evrópusambandið setur Íslandi eru víðtækari en skilyrði annarra ríkja í aðildarviðræðum og ekki verður séð að slakað mikið sé á kröfum ESB vegna smæðar landsins eða þess að hér sé bændastéttin fámenn miðað við það sem gerist með milljónaþjóðum. Þetta segir Jón Bjarnason, sjávarútvegs- og landbúnaðarráðherra.

Dópaðir slást við slökkviliðið

Slökkvilið höfuðborgarsvæðisins var kallað út að íbúð við Njálsgötu vegna eldsvoða um hádegisbil í dag. Einn slökkviliðsbíll var sendur á staðinn.

Aukin fasteignakaup

Níutíu og átta samningum vegna fasteignakaupa var þinglýst á höfuðborgarsvæðinu í síðustu viku samanborið við sjötíu og tvo samninga á sama tíma í fyrra. Þetta kemur fram á vef Þjóðskrá Íslands. Heildarvelta nam rúmum tveimur komma sjö milljörðum króna og jókst um sjö hundruð milljónir milli ára.

Vítisenglum vísað frá

Norsk yfirvöld vísuðu þremur vítisenglum úr landi í gær þar á meðal einum Íslendingi. Mennirnir voru nýkomnir til landsins í tengslum við afmælisveislu norskra vítisengla. Íslendingurinn er þegar búinn að kæra ákvörðun norskra yfirvalda en hinir mennirnir voru frá Englandi og Frakklandi.

Nýr vígslubiskup vígður á morgun

Biskup Íslands, Karl Sigurbjörnsson, vígir sr. Kristján Val Ingólfsson til embættis vígslubiskups í Skálholtsumdæmi en vígslan fer fram í Skálholtsdómkirkju á morgun. Séra Kristján hlaut flest atkvæði í kjöri til vígslubiskups eða áttatíu atkvæði af hundrað fjörtíu og tveimur en kosið var á milli hans og Sigrúnar Óskarsdóttur, prests í Árbæjarkirkju. Kristján hefur gengt ýmsum störfum innan kirkjunnar frá því hann var vígður til prests árið 1974. Hann þjónar nú sem sóknarprestur á Þingvöllum og er verkefnisstjóri helgissiða og kirkjutónlistar á Biskupsstofu.

Tjón af völdum bresku hryðjuverkalaganna um 5 milljarðar

Skýrslu um áhrif bresku hryðjuverkalaganna var dreift á Alþingi í dag. Heildartjónið sem af lögunum hlaust er metið á bilinu 2 til 9 milljarðar króna, en líklegasta gildið er um 5 milljarðar.

Hafró segir hvalveiðarnar sjálfbærar

Í ástandsskýrslum Hafrannsóknarstofnunar kemur fram að þeir hvalastofnar sem Íslendingar veiða þola verulegar veiðar. Og eru veiðarnar vel innan við sjálfbær mörk. Ákvörðun Bandaríkjamanna að beita íslenska ríkið diplómatískum þvingunum vegna hvalveiða virðist ekki styðjast við vísindaleg rök.

Jóhanna segir sigurinn sinn

Jóhanna Sigurðardóttir, forsætisráðherra, segir sáttina um stjórnarráðsfrumvarpið hvorki vera sigur fyrir stjórnarandstöðuna né ósigur fyrir sjálfa sig. Ferill málsins sé þó til marks um að leggja eigi septemberþingið af.

Heimild til að framlengja gjaldeyrishöft lögfest

Frumvarp til laga um að Seðlabanki Íslands fái heimild til að framlengja gjaldeyrishöftin til ársins 2013 var samþykkt á Alþingi rétt í þessu með 30 atkvæðum gegn 13.

Össur mun styðja umsókn Palestínu

Össur Skarphéðinsson mun fyrir Íslands hönd styðja umsókn Palestínu um viðurkenningu um að landið sé sjálfstætt ríki. Þessu lýsti Össur yfir í ferð sinni til Gazasvæðisins síðastliðið sumar og aðstoðarmaður hans, Kristján Guy Burgess, staðfesti við fréttastofu.

Neyddir til að lenda vegna veikinda farþega

Flugvél Iceland Express á leið frá New York til Keflavíkur var í nótt neydd til að lenda í Goose Bay í Kanada vegna veikinda farþega. Líkur benda til þess að um mjög alvarlegt flogakast hafi verið að ræða.

Fjölskyldudagur Strætó í dag

Fjölskyldudagur Strætó er haldinn í dag. Markmið viðburðarins er að kynna starfsemi Strætó, en hann er hluti af Evrópskri samgönguviku sem nú stendur yfir. Fjölbreytt dagskrá verður við höfuðstöðvar Strætó bs. að Hesthálsi 14 milli klukkan 13:00-16:00.

Pétur Blöndal: Gjaldeyrishöftin eins og ópíum

Pétur H. Blöndal, þingmaður Sjálfstæðisflokksins, líkti gjaldeyrishöftunum við ópíum á þingfundi í dag. Hann lýsir sig andstæðan frumvarpi ríkisstjórnarinnar um framlengingu gjaldeyrishaftanna.

Flugfreyjur skrifa undir kjarasamning

Nýr kjarasamningur Flugfreyjufélags Íslands og Samtaka atvinnulífsins fyrir hönd Icelandair var undirritaður í húsakynnum Ríkissáttasemjara laust eftir miðnætti í gærkvöldi. Samningafundur hafði þá staðið frá því klukkan tíu í gærmorgun samkvæmt vef Morgunblaðsins.

Nóttin róleg hjá lögreglu

Nóttin var róleg hjá lögreglunni á landinu öllu. Á höfuðborgarsvæðinu gistu þrír menn fangageymslur lögreglunnar. Dælubílar slökkviliðsins voru ekki kallaðir út, en sjúkraflutningamenn fóru hins vegar í um þrjátíu útköll.

Geðlæknir metur litháísku móðurina sakhæfa

Litháísk kona, sem grunuð er um að hafa skilið andvana barn sitt eftir í ruslageymslu í júlí, er sakhæf samkvæmt niðurstöðu geðrannsóknar sem nú liggur fyrir. Endanleg ákvörðun um sakhæfi hennar er í höndum dómara að aðalmeðferð málsins lokinni.

Ráðherra efast um sjálfbærni hvalveiða

Íslensk stjórnvöld mótmæltu aðgerðum bandarískra stjórnvalda vegna veiða á langreyði á fundi með bandaríska sendiherranum. Össur Skarphéðinsson utanríkisráðherra segir að efast megi um að langreyðaveiðar séu sjálfbærar á meðan ekki sé markaður fyrir afurðirnar.

Vilja vísa tillögu um staðgöngumæðrun frá

Lagt hefur verið til á Alþingi að þingsályktunartillögu um skipun starfshóps sem semja á frumvarp um heimilun staðgöngumæðrunar í velgjörðarskyni verði vísað frá. Sigríður Ingibjörg Ingadóttir og Mörður Árnason, þingmenn Samfylkingarinnar, lögðu frávísunartillöguna fram í gær.

Gefið eftir í stóru málunum

Gjaldeyrishöft verða framlengd um tvö ár í stað fjögurra og vald til að ákvarða fjölda ráðuneyta og verkaskiptingu milli þeirra verður áfram á höndum þingsins en ekki forsætisráðherra. Þetta eru helstu breytingarnar sem gerðar voru á tveimur umdeildum frumvörpum ríkisstjórnarinnar í gær svo nást mætti sátt um að ljúka þingstörfum í dag. Vonast er til að hægt verði að slíta þingi síðdegis.

Launamunur kynja eykst meira hjá hinu opinbera

Óútskýrður launamunur kynjanna hefur aukist úr 9,1 prósenti í 13,2 á milli ára meðal félagsmanna SFR. Á sama tíma jókst óútskýrður launamunur hjá VR, stærsta stéttarfélagi landsins, úr 10,1 prósenti í 10,6 prósent.

Hryssur stórslasaðar eftir meintan níðing

Hryssa fannst sárkvalin og blæðandi, með illa útleikin kynfæri, í girðingu í Kjós um síðustu helgi. Hún hefur verið til aðhlynningar á Dýraspítalanum í Víðidal undanfarna daga. Önnur hryssa í sömu girðingu hafði áður verið færð undir læknishendur af sömu ástæðu. Eigendur hryssanna hafa kært athæfið til lögreglu.

Kaupin breyta verðmati á ósnortnu víðerni

Fyrirhuguð kaup kínverska kaupsýslumannsins Huang Nubo á Grímsstöðum á Fjöllum munu breyta verðmati á ósnortnu víðerni. Þetta segir Árni Páll Árnason, efnahags- og viðskiptaráðherra.

Eineltisfé verður deilt á alla skólana

Reykjavíkurborg er hætt í samstarfi við Olweus um eineltisáætlanir í grunnskólum. Sigrún Björnsdóttir hjá menntasviði Reykjavíkur segir að undanfarin ár hafi verkefnastjóri Olweus-áætlunarinnar á Íslandi fengið fasta 2,5 milljóna króna greiðslu fyrir að veita 21 grunnskóla í Reykjavík stuðning. Skólarnir hafi unnið gegn einelti í samræmi við áætlunina.

Pólitísk skylda segir Ingibjörg

Það var pólitísk skylda íslenskra stjórnvalda að taka á móti flóttakonum frá Írak vegna stuðnings íslenskra stjórnvalda við Íraksstríðið, að mati Ingibjargar Sólrúnar Gísladóttur, fyrrverandi utanríkisráðherra.

Flutti sömu ræðuna tvisvar - þingmenn endurtóku frammíköllin

„Við sátum þarna og hlustuðum á Jón Gunnarsson þegar ég uppgötvaði skyndilega að ég hafði heyrt þessa ræðu áður,“ segir Mörður Árnason, þingmaður Samfylkingarinnar, en hann segist hafa hlustað á Jón Gunnarsson, þingmann Sjálfstæðisflokksins í Suðurkjördæmi, flytja sömu ræðuna tvisvar í umræðum um Stjórnarráð Íslands.

Forseta Hells Angels á Íslandi vísað frá Noregi

"Ég var handtekinn í gær og mér hent í gæsluvarðhald. Svo var mér flogið frá Noregi til Íslands í dag,“ sagði Einar Marteinsson, forseti Vítisenglanna á Íslandi, en hann er einn af þremur Vítisenglum sem var snúið við í Noregi í gær af þrjúhundruð. Hinir voru frá Englandi og Frakklandi.

Fundu fallbyssukúlu í Malbikunarstöð og tóku röntgenmynd af henni

Starfsmenn Malbikunarstöðvarinn Höfða brugðust hárrétt við í gær við þegar þeir fundu ósprungna sprengju í vinnslunni hjá sér samkvæmt tilkynningu frá Landhelgisgæslunni.

Mikið um árekstra í rigningunni

Í dag og í gær hafa starfsmenn Áreksturs.is aðstoðað ökumenn , við að fylla út tjónaform, í meira en 50 árekstrum, sem orðið hafa á höfuðborgarsvæðinu.

Sextíu manns í vinnu við skriðjöklagöngur

Gönguferðir á skriðjökla með ferðmenn hafa stóraukist á síðustu árum. Kallað er eftir því að reglur verði settar til að tryggja öryggi. Um sextíu manns höfðu atvinnu af því í sumar að ganga með ferðamenn um íslenska skriðjökla og um fimmtán manns hafa orðið lifibrauð af skriðjöklum árið um kring, en þetta einn helsti vaxtarsprotinn í íslenskri ferðaþjónustu.

Helmingur bifhjóla í ólagi

Ástand bifhjóla virðist misgott ef marka má niðurstöður skyndiskoðunar sem lögreglan, í samvinnu við Umferðarstofu og skoðunarstöðvar, stóð fyrir í vikunni.

Hátt í 1700 leituðu á Vog

Alls fengu 1.676 manns innlagnarmeðferð hjá Sjúkrahúsinu Vogi á síðasta ári. Þetta kemur fram í svari velferðarráðherra við fyrirspurn Sigmundar Davíðs Gunnlaugssonar, formanns Framsóknarflokksins, á Alþingi. Skjólstæðingum sem þiggja innlagnarmeðferð hefur fækkað lítillega frá árinu 2007 en þá voru þeir 1800. Áætlað er að mun fleiri, eða 4000, sæki meðferð á dag- og göngudeild.

Hitti Ben Stiller: Þetta var bara geðveikt

"Þetta var mjög skemmtilegt og bara "made my day“ og alla mína daga núna,“ segir Dagný Ósk Hermannsdóttir, heimavinnandi húsmóðir á Stykkishólmi, sem hitti á stórleikarann Ben Stiller fyrr í dag.

Enn allt á huldu um milljónamæringinn

Hinn heppni íslenski Víkingalottóspilari sem vann 50 milljónir á miðvikudaginn hefur enn ekki gefið sig fram við Íslenska getspá. Þegar dregið var á miðvikudagskvöldið reyndust þrír heppnir spilarar vera með allar tölur réttar. Auk Íslendingsins var einn frá Noregi og einn frá Finnlandi. Íslendingurinn stálheppni keypti sér einnar raða miða í Jolla í Hafnarfirði og kostaði miðinn aðeins 50 krónur.

Sóttu veikan mann frá Vestmannaeyjum

Landhelgisgæslunni barst rétt fyrir klukkan eitt í dag beiðni, í gegnum Neyðarlínuna, frá lækni í Vestmannaeyjum um aðstoð þyrlu Landhelgisgæslunnar vegna manns sem slasaðist alvarlega í bænum. Vegna þoku er ekki hægt að lenda flugvél í Eyjum. Þyrla Landhelgisgæslunnar fór í loftið kl. 12:57 og lenti í Vestmannaeyjum rétt fyrir klukkan tvö. Flogið var með mannin rakleiðis á Landspítalann í Fossvogi þar sem hann fékk aðhlynningu.

Ben Stiller kominn til Stykkishólms

Stórstjarnan Ben Stiller er nú kominn í Stykkishólm en hann birti fyrir stundu færslu á Twitter-síðu sinni þess efnis. Í morgun var hann á staddur á Austurlandi og ferðast hann því hratt á milli staða.

Breytingar líklegast gerðar á stjórnarráðsfrumvarpinu

Líklegt er að gerðar verði breytingar á frumvarpinu um stjórnarráðið þannig að forsætisráðherra mun ekki einn og sér geta stjórnað því hvaða ráðuneyti eru starfandi hverju sinni. Samkvæmt heimildum Vísis er verið að vinna að nýrri útfærslu á þessu ákvæði þannig að forsætisráðherra mun þurfa að bera tillögu um ráðherraskipan undir Alþingi með þingsályktunartillögu. Þingfundur hófst að nýju klukkan um klukkan korter í þrjú en hann hefur tafist mikið í dag vegna ágreinings um þau málefni sem þarf að ljúka á þessu þingi.

Tveir Ítalir fara yfir Friðarsúluna

Tveir menn frá ítalska fyrirtækinu Space Cannon eru staddir hér á landi vegna viðhalds á Friðarsúlunni í Viðey. Kostnaður Reykjavíkurborgar er um sextíu þúsund krónur vegna dvalar þeirra hér á landi.

Hjúkrunarheimili byggð í Reykjanesbæ og á Ísafirði

Ríkisstjórnin samþykkti í morgun að heimila velferðarráðherra og fjármálaráðherra að ganga til samninga við Reykjanesbæ um byggingu 60 rýma hjúkrunarheimilis og við Ísafjarðarkaupstað um byggingu 30 rýma hjúkrunarheimilis. Framkvæmdir verða fjármagnaðar með svokallaðri leiguleið.