Bílvelta á Reykjanesbraut í dag

Bílvelta varð við Vogaveg á Reykjanesbraut um eittleytið í dag. Að sögn lögreglunnar urðu engin alvarleg slys á fólki, en einn var fluttur með sjúkrabíl til Reykjavíkur með minniháttar meiðsl. Þá var bíl ekið inn í garð í Keflavík um fjögurleytið í dag. Engan sakaði í því óhappi.

Árekstur í Hrútafirði

Árekstur varð á Síkárbrú í Hrútafirði á fimmta tímanum í dag. Engin slys urðu á fólki. Brúnni var lokuð um stund en nú er búið að opna hana aftur. Mikil umferð er í umdæmi lögreglunnar á Blönduósi þessa stundina.

Morgundagurinn er vinsælasti brúðkaupsdagur ársins

Á morgun er 7. dagur júlímánaðar eða 07.07.07. Búist er við að mörg brúðhjón verði gefin saman á þessum degi en nokkrir hafa þurft að hverfa frá vegna þess að skortur er á veislusölum.

Bráðabirgðalög um húsnæði á varnarliðssvæðinu

Forseti Íslands undirritaði í dag lög þess efnis að heimilt sé að nota raflagnir og rafföng í núverandi ástandi á íbúðar- og skólasvæði fyrrum varnarsvæðis á Keflavíkurflugvelli til 1. október 2010. Raflagnir og rafföng á svæðinu eru í samræmi við bandaríska staðla og því verður að skipta um að þeim tíma liðnum

Skilorðsbundið fangelsi fyrir líkamsárás

Karlmaður var í Héraðsdómi Reykjaness í dag dæmdur í tveggja mánaða skilorðsbundið fangelsi fyrir að hafa gengið í skrokk á öðrum manni. Þá var honum gert að greiða fórnarlambinu 23 þúsund krónu vegna læknisvottorðs.

Tóku ekkert mark á skoðunum reyndra manna

Stjórnvöld tóku ekkert mark á skoðunum reyndra manna þegar þau ákváðu að skera niður þorskkvóta fyrir næsta fiskveiðiár. Þetta kemur fram í yfirlýsingu frá forseta Farmanna- og fiskimannasambands Íslands. Hann lýsir yfir miklum vonbrigðum með ákvörðun stjórnvalda.

SPRON hækkar vexti á íbúðalánum

SPRON hefur ákveðið að hækka vexti íbúðalána í íslenskum krónum úr 5.0% í 5.2%. Hækkunin tekur aðeins til nýrra lánveitinga og gildir frá og með næsta mánudegi. Áður höfðu Kaupþing og Glitnir einnig ákveðið að hækka vexti á húsnæðislánum í 5,2 prósent.

Fimmtíu og fimm ára gömul íslensk kona ól barn í gærkvöld

Sigríður Ásdís Snævarr sendiherra ól son rétt fyrir klukkan átta í gærkvöld. Móður og barni heilsast vel. Sigríður er 55 ára og elst íslenskra kvenna til að ala barn, svo vitað sé. Sigríður er eiginkona Kjartans Gunnarssonar, fyrrverandi framkvæmdastjóra Sjálfstæðisflokksins.

Kallar á aukið brottkast og svindl

Kvótakerfið er gjaldþrota og taka verður upp gjörbreytt fiskveiðistjórnunarkerfi að mati Atla Gíslasonar, þingmanns Vinstri grænna. Hann segir ákvörðun ríkisstjórnarinnar um verulegan samdrátt í þorskkvóta kalla á aukið brottkast og svindl.

Mótvægisaðgerðir geta styrkt landsbyggðina til lengri tíma

Mótvægisaðgerðir ríkisstjórnarinnar gegn niðurskurði aflaheimilda kann að styrkja samfélög á landsbyggðinni til lengri tíma ef rétt verður að þeim staðið. Þetta kemur fram í yfirlýsingu frá Elliða Vignissyni, bæjarstjóra í Vestmannaeyjum. Hann lýsir yfir skilningi á ákvörðun sjávarútvegsráðherra en finnst eðlilegt að á móti verði rannsóknir á þorskstofninum stórauknar.

Illa rökstudd ákvörðun sem vinnur gegn landsbyggðinni

Ákvörðun ríkisstjórnarinnar um verulegan samdrátt í þorskkvóta er illa rökstudd og vinnur gegn smærri fyrirtækjum í sjávarútvegi að mati Kristins H. Gunnarssonar, þingmanns Frjálslynda flokksins. Hann segir að þetta muni valda miklum búsifjum á landsbyggðinni.

Markvisst unnið að því að útrýma mávi af tjörninni

Andavarp á tjörninni hefur ekki tekist vel í ár, að sögn Guðmundar B. Friðrikssonar, skrifstofustjóra hjá Umhverfissviði Reykjavíkurborgar. Fáir ungar hafa komist á legg. Ástæðurnar eru þær að lítið er af æti við tjörnina og að mávurinn hefur étið ungana.

Erfið ákvörðun en nauðsynleg

Einar K. Guðfinnsson, sjávarútvegsráðherra, segir ákvörðun um að skera niður þorskkvótann um 63 þúsund tonn hafi verið erfið og honum sé fullljóst að hún skapar mikinn vanda fyrir sjávarbyggðir í landinu. Þetta kom fram í máli ráðherra í hádegisviðtalinu á Stöð 2 í dag.

Sársaukafullt fyrir sjávarútveginn

Samdráttur á aflaheimildum í þorski um 63 þúsund tonn fyrir næsta fiskveiðiár á eftir að verða mjög sársaukafullt fyrir sjávarútveginn að mati framkvæmdastjóra Landssambands íslenskra útvegsmanna. Hann undrast að ríkisstjórnin skuli einungis taka mið af tillögum Hafrannsóknarstofnunar í ákvörðun sinni.

Réttargæslumaður stúlkunnar ósammála sýknudómi Héraðsdóms Reykjavíkur

Réttargæslumaður stúlkunnar sem kærði nauðgun á Hótel Sögu í mars síðastliðnum segist ósammála sýknudómi Héraðsdóms Reykjavíkur. Dómurinn einblíni of mikið viðbrögð stúlkunnar frekar en verknaðinn. Lögmaður hins ákærða segir líklegt að hann eigi rétt á bótum eftir að hafa verið í gæsluvarðhaldi í fjóra mánuði.

Umferðarstofa hvetur bílstjóra til að sýna bifhjólamönnum tillitssemi

Umferðarstofa hefur sent frá sér tilkynningu vegna andúðar og tillitsleysi bílstjóra í garð bifhjólamanna.Að undanförnu hefur mikið verið rætt um hraðakstur bifhjólamanna. Lítið hefur hins vegar borið á réttmætri gagnrýni á hegðun margra bílstjóra í umgengni sinni við bifhjólamenn.

Nýr og umhverfisvænn forsetabíll

Forseti Íslands tekur við nýrri Lexus tvinnbifreið frá Tadashi Arashima, forstjóra Toyota í Evrópu, seinni partinn í dag. Bifreiðin er af gerðinni Lexus LS600h og er knúinn Hybrid-kerfi sem samanstendur af rafmótor og öflugri átta strokka bensínvél.

Kaupþing og Glitnir hækka vexti á íbúðarlánum

Kaupþing hækkaði vexti á nýjum íbúðarlánum í dag um 0,25 prósent og eru vextirnir þá komnir í 5,2 prósent. Þetta var tilkynnt í gær eftir að ljóst var að Seðlabankinn myndi ekki lækka stýrivexti á þessu ári. Glitnir hefur einnig ákveðið að hækka vexti á nýjum verðtryggðum húsnæðislánum um 0,25 prósent, eða upp í 5,2 prósent eins og Kaupþing.

Þrjú sveitarfélög greiða 7,6 milljarða fyrir Hitaveitu Suðurnesja

Reykjanesbær, Hafnarfjörður og Grindavík þurfa að greiða ríkinu 7,6 milljarða fyrir hlut sinn í Hitaveitu Suðurnesja á miðvikudag í næstu viku. Reykjanesbær borgar um 4,7 milljarða króna, Hafnarfjörður tæpa tvo milljarða og Grindavík um einn milljarð króna.

Krónan hækkar við kvótalækkun

Gengi krónunnnar hækkaði í morgun um 0,6%, strax og sjávarútvegsráðhera var búinn að tilkynna um niðurskurð þorskkvótans. Talið er að útflultningstekjur landsmanna dragist saman um 16 milljarða króna á ársgrundvelli vegna niðurskurðarins, og landsframleiðsla dregst saman um 0,7 prósent, þar af 0,2 á þessu ári þar sem næsta fiskveiðiár hefst frysta september.

Ríkisstjórnin boðar viðamiklar aðgerðir vegna samdráttar á aflaheimildum

Ríkisstjórnin kynnti í morgun viðamiklar mótvægisaðgerðir í tengslum við verulegan samdrátt á aflaheimildum í þorski. Aðgerðirnar miða fyrst og fremst að því að styðja sjávarbyggðir og draga úr því tjóni sem samdrátturinn hefur í för með sér.

Aflaheimildir í þorski 130 þúsund tonn

Ríkisstjórnin kynnti í morgun tillögur sínar um aflaheimildir í þorski fyrir næsta fiskveiðiár. Samkvæmt þeim verður þorskvótinn 130 þúsund tonn. Er þetta í fullu samræmi við tillögur Hafrannsóknarstofnunar og lægsti þorskvóti frá upphafi. Mótvægisaðgerðir gera ráð fyrir aðstoð við byggðarlög.

Varað við umferðartöfum og vegaskemmdum á Þingvallavegi

Talsverðar skemmdir eru á klæðningu á 1,5 kílómetra vegakafla á Þingvallavegi við Grafningsvegamót. Þetta kemur fram í tilkynningu frá Vegagerðinni. Ökumenn eru beðnir um að aka varlega og hefur hraði verði takmarkaður við 50 kílómetra á klukkustund.

Beint flug til Moskvu?

Vilhjálmur Vilhjálmsson, borgarstjóri í Reykjavik, átti i gær fund með Yuri Lujkova, borgarstjóra í Moskvu. Á fundinum voru ýmis mál til umræðu og gerði borgarstjóri meðal annars grein fyrir vilja Íslendingar til að gera nýjan loftferðasamning við Rússa.

Gestafjöldi að söfnum slagar hátt í heildaraðsókn að kvikmyndasýningum

Gestafjöldi að söfnum og skyldri starfsemi var um 1.3 milljón á árinu 2005. Til samanburðar var fjöldi gesta árið 1995, 830 þúsund. Gestakomur árið 2005 slaga hátt i heildaraðsókn að kvikmyndasýningum sem var ríflega 1.4 milljónir sama ár. Frá árinu 2000 hefur fjöldi gesta að söfnum og skyldri starfsemi aukist jafnt og þétt eftir að hafa að miklu leyti staðið í stað á seinni hluta síðasta áratugar.

Meintur hryðjuverkamaður hringdi frá Íslandi

Móðir Kafeels Ahmed, sem grunaður er um að tengjast hryðjuverkaárásum á Glasgow, telur að hann hafi hringt í sig frá Íslandi síðastliðinn laugardag, að því er The Times of India greinir frá. Móðirin fullyrðir í samtali við blaðið að Ahmed hafi sagt við sig að hann væri að vinna að stóru verkefni sem tengdist hlýnun jarðar. Hann myndi þurfa að ferðast mikið í tengslum við verkefnið og myndi ekki hafa samband næstu vikuna.

Þyrla Landhelgisgæslunnar kvödd að Skaftárfelli

Þyrla Landhelgisgæslunnar TF-Sif var kölluð að Þjóðgarðinum í Skaftárfelli á sjöunda tímanum í kvöld til að sækja erlendan ferðamann. Maðurinn hafði kennt sér meins og læknir taldi ráðlegast að kalla út þyrluna. Ekki er meira vitað um málið að svo stöddu.

Íbúar á Njálsgötu ósáttir

Velferðarráð Reykjavíkurborgar ákvað formlega í gær að hefja rekstur heimilis fyrir heimilislausa á Njálsgötu í Reykjavík. Mikill styr hefur staðið um málið að undanförnu og hafa nokkrir íbúar við götuna mótmælt harðlega. Pétur Gautur Svavarsson, annar tveggja fulltrúa íbúa og húseigenda í samráðshópi vegna húsnæðsisins, ræddi við Katrínu Rut Bessadóttur í Íslandi í dag.

Hróarskelduhátíðin nær hámarki um helgina

Á fyrsta degi Hróarskelduhátíðarinnar í Danmörku hefur þegar rignt meira en nokkru sinni áður í tæplega fjörutíu ára sögu hátíðarinnar. Gripið hefur verið til neyðarráðstafana þar sem spáð er enn meiri úrkomu um helgina. Vatni og aur er dælt af svæðinu og hálmi dreift á gönguleiðir.

Ítalskur ferðamaður stöðvaður fyrir of hraðan akstur

Lögreglan á Akureyri stöðvaði ítalskan ferðamann á bílaleigubifreið fyrir of hraðan akstur í Öxnadal um hádegisbil í dag en ökuhraði hans var mældur 171 km/klst. Hámarkshraði þarna er 90 km/klst.

Segja Landsbankann hafa svikið gefin fyrirheit

Hjón sem fóru halloka í verslunarrekstri saka Landsbankann um að bera ábyrgð á óheillaþróuninni. Fyrirheit hafi verið svikin auk þess sem bankinn hafi beitt makalausri hörku og óbilgirni. Trygginga hafi verið krafist í öllum eignum, innkomu og sjóðum en steininn hafi tekið úr þegar þau voru krafin um að framselja líftryggingar sínar til bankans.

Minnir á áhættu sem fylgir lánum í erlendri mynt

Seðlabankastjóri telur hættu á að heimilin vanmeti þá áhættu sem felist í lánum í erlendri mynt. Hann segir lánin mjög álitleg á pappírum en ekki sé allt gull sem glóir.

Í forsendum að þorkkvótinn verði 160 þúsund tonn

Seðlabankinn gerir ráð fyrir því í hagspá að þorskkvóti næsta fiskveiðiárs verði 160 þúsund tonn en ekki 130 eins og Hafró leggur til. Stýrivöxtum var ekki breytt í dag og gaf Seðlabankastjóri í skyn að þeir yrðu ekki lækkaðir fyrr en í fyrsta lagi á næsta ári.

Aðgangur veittur að persónuupplýsingum án leyfis

Landlæknisembættið veitti aðgang að persónuupplýsingum um fóstureyðingar kvenna án þess að leyfi væri fyrir því. Embættið segir um mistök hafa verið að ræða.

Nærri tveir tugir hraðamyndavéla settar upp á landinu

Mikið átak hefst á næstu dögum í eftirliti með akstri ökumanna þegar tvær sjálfvirkar og fullkomnar hraðamyndavélar verða settar upp á þjóðvegi 1 í Hvalfjarðarsveit. Nærri tveir tugir myndavélar verða settar upp á næstu vikum og mánuðum.

Samtök atvinnulífsins vilja leggja niður vörugjöld

Samtök atvinnulífsins vilja leggja niður vörugjöld og segja þau úrelta skattheimtu og draug fortíðar. Þau telja vörugjöldin beina neyslu fólks í ákveðna vöruflokka án þess að neytendur geri sér grein fyrir því.

Fékk ekki réttlláta málsmeðferð vegna aðkomu læknaráðs

Mannréttindadómstóll Evrópu úrskurðaði í dag að mál Söru Lindar Eggertsdóttur níu ára fjölfatlaðrar stúlku sem hlaut alvarlegar heilaskemmdir eftir fæðingu hefði ekki fengið réttláta málsmeðferð fyrir Hæstarétti Íslands, einkum vegna aðkomu læknaráðs. Faðir stúlkunnar segir niðurstöðuna áfellisdóm yfir íslensku réttarkerfi en það sé léttir að 9 ára baráttu sé lokið.

Kaupþing hækkar vexti á íbúðalánum

Kaupþing hefur ákveðið að hækka fasta vexti á nýjum íbúðalánum Kaupþings úr 4,95% í 5,20% frá og með 6. júlí 2007. Þetta þýðir hækkun um 0,25%.

Sýknaður af nauðgunarkæru

Pólverjinn sem sakaður var um að hafa nauðgað konu í kjallara Hótels Sögu var sýknaður fyrir Héraðsdómi Reykjavíkur í dag. Þótti dómurum ekki sýnt að maðurinn hefði þröngvað konunni til samræðis.

Meintur hryðjuverkamaður ekki staddur hér á landi

Ekkert bendir til þess að meintur hryðjuverkamaður sé staddur hér á landi samkvæmt greiningardeild Ríkislögreglustjóra. Málið hefur verið til skoðunar hjá lögreglunni í dag.

Hundur veittist að lögreglumanni við skyldustörf

Lögreglan á höfuðborgarsvæðinu þurfti að beita varnarúða í gærkvöldi til að hindra að hundur réðist að lögreglumanni við skyldustörf. Lögreglumaðurinn var við húsleit í íbúð í austurborginni en um var að ræða þýskan Schäfer hund. Tæplega 100 grömm af ætluðu amfetamíni fundust í íbúðinni.

Félagmálaráðherra veitir styrk til að jafna launakjör fatlaðra

Félagsmálaráðherra hefur ákveðið að veita sérstakan styrkt til að leiðrétta launakjör fatlaðra í tengslum við átaksverkefni ÍTR og Svæðisskrifstofu um málefni fatlaðra í Reykjavík. Ákvörðunin kemur í kjölfar fjölmiðlaumfjöllunar þar sem vakin var athygli á mismunandi launakjörum fatlaðra og ófatlaðra.

Alcan á Íslandi fór langt út fyrir velsæmismörk

Alcan á Íslandi fór langt út fyrir velsæmismörk í aðdraganda kosninga um álverið í Hafnarfirði þegar það lagði að starfsmönnum sínum að safna sérstaklega upplýsingum um meðlimi Sólar í Straumi. Þetta kemur fram í yfirlýsingu frá samtökunum Sól í Straumi. Talsmaður samtakanna segir margt benda til þess að fyrirtækið hafi brotið friðhelgi einkalífsins og segir koma til greina að kæra málið til lögreglu.

Hamar vísar ásökunum á bug

Verktakafyrirtækið Hamar hefur sent frá sér yfirlýsingu þar sem ásökunum Rafiðnaðarsambands Íslands er vísað á bug og þær sagðar rangar. Rafiðnaðarsambandið hefur sagt að hjá Hamri starfi ófaglærðir verkamenn í störfum þar sem krafist sé fagþekkingar. Þá segir sambandið að kjör starfsmannanna séu ófullnægjandi.

Lögreglustjóri athugar mál meints hryðjuverkamanns - bresk yfirvöld tjá sig ekki

Íslensk lögregluyfirvöld eru nú með í skoðun mál meints hryðjuverkamanns sem á að vera staddur hér á landi. Maðurinn er grunaður um aðild að sprengjutilræðinu í London og Glasgow á dögunum. Bresk lögregluyfirvöld vilja ekki tjá sig um hvort málið tegi anga sína hingað til lands.