Þriðja umræða um RÚV-frumvarpið heldur áfram

Þriðja umræða um Ríkisúvarpið ohf. hófst aftur nú laust fyrir hádegi eftir töluverðar deilur um tilhögun þinghalds á næstunni. Umræðan um frumvarpið hófst í gær og stóð til miðnættis og laust fyrir hádegi voru níu þingmenn á mælendaskrá varðandi frumvarpið.

Fleiri hópar í hættu vegna kynferðisofbeldis

Talskona Stígamóta segir að læra þurfi af könnun um ofbeldi gegn heyrnarlausum og að beina þurfi sjónum að hópum sem eru í meiri hættu en aðrir að verða fyrir slíku ofbeldi.

Þjóðhagsspá: Atvinnuleysi eykst og verðbólga 3,8% árið 2007

Í nýrri endurskoðaðri þjóðhagsspá Fjármálaráðuneytisins er gert ráð fyrir að atvinnuleysi á árinu 2007 verði 3,3% en það var 1,3% á árinu 2006. Áætlað er að viðskiptahallinn á síðasta ári hafi verið 22,4% af landsframleiðslu. Verulega á þó að draga úr honum í ár samkvæmt spánni og verður hann 14,5% af landsframleiðslu.

Útvarpsstjóri segir ummæli Ögmundar ómerkileg

Páll Magnússon, útvarpsstjóri, segir rangt að hann hafi gerst tvísaga um réttindi starfsfólks Ríkisútvarpsins. Ögmundur Jónasson, þingmaður Vinstri-grænna, hélt því fram í þingsal í dag að Páll hefði sagt eitt við starfsmenn Ríkisútvarpsins um réttindi þeirra, eftir að nýtt frumvarp um Ríkisútvarpið gengur í gegn, en annað við þingmenn.

Formaður Þórs í meiðyrðamál við Kristján Þór

Meiðyrðamál vofir yfir Kristjáni Þór Júlíussyni, oddvita sjálfstæðismanna í Norðausturkjördæmi. Formaður íþróttafélagsins Þórs hyggst lögsækja hann vegna ummæla um fjárkúgun.

Ágúst Einarsson tekinn við á Bifröst

Ágúst Einarsson prófessor tók við starfi rektors Háskólans á Bifröst í dag og segist hann fullur tilhlökkunar að takast á við nýtt verkefni. Hann flutti upp eftir um helgina og segist hafa fengið góðar móttökur í háskólaþorpinu.

Málþóf í Rúv-umræðu

Þingmenn stjórnarandstöðunnar eru í meirihluta á mælendaskrá í þriðju umræðu um frumvarp menntamálaráðherra um Ríkisútvarpið og tala margir lengi. Þannig talaði Mörður Árnason, þingmaður Samfylkingarinnar, í rúma þrjá tíma fyrr í kvöld og Kolbrún Halldórsdóttir, þingmaður VG, talaði samtals í um það bil tvo og hálfan tíma.

Eftirlit með fjárveitingum eflt

Félagsmálaráðherra segir innra eftirlit með fjárveitingum verða eflt í kjölfar skýrslu Ríkisendurskoðunar um Byrgið. Úttektin nær einungis til áranna 2005 og 2006, en opinberar fjárveitingar til Byrgisins hófust hins vegar árið 1999 og hljóða upp á tæpar 200 milljónir króna. Ætla má að einnig kannað verði hvað varð um þá fjármuni.

Önnur kæran lögð fram gegn Guðmundi í Byrginu

Þrítug kona lagði í dag fram kæru gegn Guðmundi Jónssyni forstöðumanni Byrgisins, fyrir kynferðislega misbeitingu um nokkurra ára skeið þegar hún var skjólstæðingur Byrgisins. Þetta er önnur konan sem leggur fram kæru á hendur Guðmundi.

Kortleggja fiskdauða í Grundarfirði

Hafrannsóknar-stofnunin vinnur enn að rannsóknum í Grundarfirði eftir fiskdauða í þorskeldi þar. Grunur leikur á að mikið magn af síld í firðinum hafi orsakað súrefnisþurrð en verið er að kortleggja yfir hversu stórt svæði fiskdauðinn náði.

Ráðherrar sakaðir um að leyna Alþingi gögnum um RÚV

Stjórnarandstaðan sakaði menntamálaráðherra og fjármálaráðherra í dag um að hafa vísvitandi leynt Alþingi mikilsverðum gögnum um Ríkisútvarpið og krafðist þess að afgreiðslu lagafrumvarpsins yrði frestað fram yfir kosningar. Stjórnarflokkarnir stefna að kvöld- og morgunfundum í þinginu svo unnt verði að ljúka málinu á næstu sólarhringum.

Árekstur við Þingborg í dag

Fólksbíll og vöruflutningabíll rákust saman á Suðurlandsvegi á móts við Þingborg á þriðja tímanum í dag. Ökumaður fólksbílsins var fluttur á slysadeild í Reykjavík en reyndist einungis hafa hlotið minniháttar meiðsl. Bílarnir voru báðir fluttir af vettvangi óökufærir.

Engin ákvörðun um greiðslu dvalargjalds til Samhjálpar

Engin ákvörðun hefur verið tekin um það hjá Velferðarsviði Reykjavíkurborgar hvort dvalargjald verður greitt til Samhjálpar fyrir þá skjólstæðinga borgarinnar sem verið hafa í Byrginu, segir Stella K. Víðisdóttir, sviðsstjóri Velferðarsviðs Reykjavíkurborgar.

Samhjálp falið að taka við verkefnum Byrgisins

Félagsmálaráðuneytið hefur ákveðið á grundvelli skýrslu Ríkisendurskoðunar að hætta að styrkja rekstur Byrgisins og vísa málinu til Ríkissaksóknara. Þetta kom fram hjá Magnúsi Stefánssyni félagsmálaráðherra á fréttamannafundi sem hann efndi til kl. 17 vegna skýrslunnar. Samhjálp hefur verið falið að taka við verkefnum Byrgisins.

Byrginu lokað

Ákveðið hefur verið að loka Byrginu en Guðmundur Jónsson, stjórnarformaður Byrgisins, tilkynnti þetta í viðtali við fréttastofu Útvarps í dag. Guðmundur sagði stjórnina hafa tekið þessa ákvörðun vegna þess a að félagsmálaráðuneytið ætlaði að stöðva greiðslur þangað.

Fyrirtaka í máli olíufélaga á hendur ríkinu á morgun

Fyrirtaka verður í fyrramálið í Héraðsdómi Reykjavíkur í máli stóru olíufélaganna á hendur Samkeppniseftirlitinu og íslenska ríkinu vegna sektar sem olíufélögin fengu fyrir ólöglegt samráð sitt á níunda áratug síðustu aldar.

Krónan heldur áfram að styrkjast

Krónan hélt áfram að styrkjast í viðskiptum dagsins og hefur styrkst um tæp 4% á síðustu þremur viðskiptadögum. Í hálf fimm fréttum Kaupþings segir að styrkinguna í síðustu viku megi líklega rekja til fjörtíu milljarða króna útgáfu krónubréfa á föstudaginn en hún er sú langstærsta til þessa.

Félagsmálaráðherra boðar til blaðamannafundar vegna Byrgisins

Félagsmálaráðherra hefur boðað til blaðamannafundar um málefni Byrgisins í félagsmálaráðuneytinu klukkan fimm. Þar verður væntanlega til umræðu kolsvört skýrsla Ríkisendurskoðunar um fjármál sjálfseignarstofnunarinnar en eins og fram hefur komið leggur Ríkisendurskoðun til að greiðslum til stofnunarinnar verði hætt og málinu vísað til Ríkissaksóknara.

Þriðja umræða um RÚV-frumvarpið í fullum gangi

Stjórnarandstæðingum á Alþingi varð ekki að ósk sinni um að þriðju umræðu um frumvarp um Ríkisútvarpið ohf. yrði frestað vegna upplýsinga um samskipti stjórnvalda og Eftirlitsstofnunar EFTA, ESA.

Seldi fíkniefni á bílastæði við verslun á Akureyri

Tvítugur karlmaður var í dag dæmdur í fjögurra mánaða skilorðsbundið fangelsi í Héraðsdómi Norðurlands eystra fyrir sölu og vörslu fíkniefna. Maðurinn var handtekinn í mars á síðasta ári á bílastæði við verslun á Akureyri. Í bílnum fundust fíkniefni.

MND-félagið sendir hjálpartæki til Mongólíu

MND-félagið, félag fólks með hreyfitaugahömlun, ætlar að senda hjálpartæki fyrir MND-sjúklinga til Mongólíu. Í tilkynningu frá félaginu segir að þörfin fyrir hjálpartæki þar sé afar brýn en MND-félagið á Íslandi hefur staðið fyrir söfnun hjálpartækjanna.

Ákvað að taka ekki sæti á lista Framsóknarflokksins

Framsóknarmenn í Norðausturkjördæmi hafa gengið frá framboðslista sínum fyrir komandi Alþingiskosningar. Kosið var í tíu efstu sæti listans á aukakjördæmisþingi um helgina. Ein breyting var gerð á listanum en Vigdís M. Sveinsbjörnsdóttir sem bauð sig fram í þriðja til fjórða sæti en lenti í því sjötta ákvað að taka ekki sæti á listanum.

Kolsvört skýrsla um Byrgið - Ríkisendurskoðun vill senda málið til saksóknara

Vanhöld í fjármálaumsýslu og bókhaldi Byrgisins eru veruleg og nema tugmilljónum króna að mati Ríksendurskoðunar sem skilað hefur skýrslu sinni sem unnin var að beiðni félagsmálaráðuneytisins. Lagt er til að ríkissjóður hætti að veita fé til Byrgisins og að málinu verði vísað til Ríkissaksóknara.

Fjarskiptasamband komið í lag

Síma-, net- og farsímasamband Vodafone í Grafarvogi, Grafarholti, Borgarholti og Mosfellsbæ er komið í lag en bilun varð í símstöð í morgun.

Ráðherrar sakaðir um að leyna gögnum

Deilt var á menntamálaráðherra og fjármálaráðherra og þeir sakaðir um að fela gögn tengd frumvarpi um Ríkisútvarpið ohf. við upphaf fyrsta þingfundar nú eftir áramót. Farið var fram á það að málinu yrði frestað.

Fyrstu skrefin að tvöföldun Hvalfjarðarganga

Fulltrúar Spalar og Vegagerðarinnar hafa undirritað samkomulag sem kallað er á heimasíðu Spalar fyrsta formlega skrefið að því marki að tvöfalda þjóðveginn um Kjalarnes og gera ný göng undir Hvalfjörð.

Tekist á um skiptingu norsk-íslenska síldarstofnsins

Enn ein samningalotan um skiptingu norsk-íslenska síldarstofnsins hófst í Osló í gærkvöldi en veiðarnar eru orðnar stjórnlausar og eru taldar stefna stofninum í hættu.

Málflutningur í Baugsmáli hafinn í Hæstarétti

Málflutningur vegna sex ákæruliða í fyrra Baugsmálinu stendur nú yfir í Hæstarétti. Er þetta í fyrsta skipti sem ákæruliðirnir fá efnislega meðferð í Hæstarétti en síðast var þeim vísað aftur heim í hérað.

Svört skýrsla um Byrgið

Skýrsla Ríkisendurskoðunar um rekstur meðferðarheimilisins Byrgisins verður birt nú eftir hádegi. Búast má við svartri skýrslu ef miðað er við að Ríkisendurskoðandi þótti ástæða til að stöðva greiðslur til Byrgisins áður en rannsókn lauk.

Bilun í símstöð veldur fjarskiptatruflunum

Bilun er í símstöð sem veldur truflunum á síma, neti og farsímaþjónustu hjá Vodafone í Grafarholti, Grafarvogi, Borgarholti og Mosfellsbæ. Unnið er að viðgerð.

Kútter Sigurfari verður sjófær á ný

Ríkisstjórnin hefur ákveðið að verja 60 milljónum króna á næstu 5 árum til endurgerðar og varðveislu kútters Sigurfara, sem staðið hefur við Byggðasafn Akraness undanfarin ríflega 30 ár, með það fyrir augum að gera skipið sjófært á ný.

Stutt kosningaþing hefst í dag

Alþingi kemur saman á ný í dag eftir fimm vikna jólahlé. Búast má við snarpri törn næstu tvo mánuði en gert er ráð fyrir að þinginu verði slitið óvenju snemma í ár, eða 15. mars, vegna alþingiskosninganna í vor.

Ökumaður og farþegar undir áhrifum kókaíns

Ökumaður bifreiðar sem ók utan í vegrið í Svínahraun á laugardagsmorgun er grunaður um að hafa verið undir áhrifum kókaíns. Tveir aðrir karlmenn voru í bílnum og er einnig talið að þeir hafi verið undir áhrifum fíkniefna. Mennirnir eru á þrítugsaldri.

Ísraelar stækka stærstu landnemabyggðina á Vesturbakkanum

Ísraelar hafa tilkynnt um stækkun landnemabyggðar á Vestubakkanum á sama tíma og Condoleezza Rice, utanríkisráðherra Bandaríkjanna, er á ferð um Miðausturlönd til þess að reyna að koma á friði milli Ísraela og Palestínumanna.

Varúð: Grýlukerti

Lögreglan á höfuðborgarsvæðinu varar við grýlukertum, sem er víða að finna þessa dagana, og segir ljóst er að af þeim getur stafað nokkur hætta. Full ástæða sé því til að hvetja vegfarendur til að sýna aðgát. Lögreglan biður eigendur og umráðamenn húsa að bregðast við, og vísar til skyldu þeirra í þessum efnum.

Jóhann Helgason bæjarlistamaður Seltjarnarness

Tónlistarmaðurinn Jóhann Helgason hefur verið valinn bæjarlistamaður Seltjarnarness 2007. Í fréttatilkynningu sem bærinn sendi frá sér segir að Jóhann sé einn fremsti lagahöfundur og flytjandi landsins.

Heimilislausir flýja Byrgið og lenda í hrakningum

Forstöðumaður Gistiskýlisins, athvarfs fyrir heimilislausa karlmenn í Reykjavík, segist finna verulega fyrir vandræðum Byrgisins. Mönnum sem leita á náðir Gistiskýlisins hefur fjölgað frá því málefni Byrgisins komust í hámæli og nokkrum sinnum hefur heimilislausum mönnum verið vísað á götuna að undanförnu.

Leysum ekki vandamál með því að taka upp evruna, segir forstjóri Glitnis

Bjarni Ármannsson, forstjóri Glitnis, segir bankann ekki hafa í hyggju að gera upp í evrum líkt og Straumur Fjárfestingabanki geri og getgátur hafi verið uppi um að Kaupþing sé að íhuga. Hann segir að ekki megi gleyma kostum íslensku krónunnar og vísar frekar til ábyrgðar hins opinbera.

Segir Sjálfstæðisflokkinn vilja sópa evrutali út af borðinu

Valgerður Sverrisdóttir, utanríkisráðherra, segir að íslenska krónan sé ákveðið vandamál og vill skoða hvaða leiðir séu færar aðrar en að ganga í Evrópubandalagið. Hún segir einnig að óskapleg viðkvæmni ríki hjá Sjálfstæðisflokknum í þessu máli og þau vilji helst sópa öllu evrutali út af borðinu.

Heyrnleysingjaskólinn - helvíti á jörð

Skóli heyrnarlausra var helvíti á jörð, segir rúmlega fertugur heyrnarskertur maður sem var ítrekað misnotaður af samnemendum sínum.

Íslenskir neytendur tilbúnir til að borga hátt verð fyrir brauð

Formaður Landsambands bakarameistara segir að launakostnaður sé farinn úr böndunum og bakarar leggi því ekki óeðlilega mikið á brauðmeti þótt það sé dýrt. Íslenskir neytendur séu tilbúnir til að borga hátt verð fyrir brauð. Bakarameistarar ætla þó ekki að víkjast undan ábyrgð sinni þegar kemur að lækkun matarverðs í byrjun mars.

Ekki kosið um álver í Helguvík

Árni Sigfússon, bæjarstjóri í Reykjanesbæ segir að ekki verði kosið um fyrirhugað álver í Helguvík, eins og samtökin Sól á Suðurnesjum hefur krafist. Árni segir í samtali við Morgunblaðið að tvær skoðanakannanir hafi verið gerðar á síðasta ári, sem sýni 77 prósent stuðning við álverið.

Valgerður vann í Mývatnssveit

Valgerður Sverrisdóttir utanríkisráðherra fékk örugga kosningu í fyrsta sætið á aukakjördæmisráðsþingi flokksins í Mývatnssveit. Tuttugu og tveir gáfu kost á sér í tíu fyrstu sætin. Tveir þingmenn, Dagný Jónsdóttir og Jón Kristjánsson gáfu ekki kost á sér.

Biðröð af sendiferðabílum á útsölu

Það var nóg að gera hjá sendiferðabílstjórum í dag, enda voru stórútsölur hjá nokkrum húsgagnaverslunum, svosem Húsgagnahöllinni og ÍKEA, þar sem boðinn var allt að áttatíu prósenta afsláttur.

Metár í fíkniefnaupptöku

Tollgæsla á landinu lagði árið 2006 hald á mesta magn fíkniefna sem fundist hefur á einu ári við landamæraeftirlit. Fundust 43,5 kg af amfetamíni, 8,3 kg af kókaíni og 21,6 kg af kannabisefnum auk lítils magns heróíns en það efni hefur ekki fundist áður við fíkniefnaeftirlit tollgæslu hérlendis.