Sjávarútvegsráðherra viðstaddur sjávarútvegssýningu í Brussel

Einar K. Guðfinnsson sjávarútvegsráðherra var viðstaddur sjávarútvegssýningu í Brussel sem haldin var 9. og 10. maí. Þetta er stærsta fagsýning í heimi á sviði sjávarútvegs og tóku meira en 1600 fyrirtæki frá hátt í 70 löndum þátt í henni.

Vélarvana bátur dregin til hafnar

Björgunarskipið Einar Sigurjónsson frá Hafnarfirði var kallaður út kl.23:14 í gærkvöldi. Bátur af gerðinni Shetland 535 var vélarvana við Syðrahraun. ES var farinn úr höfn kl.23:38. Komið var að bátnum kl. 00:30 og taug var komin á milli bátana 10 mín. seinna.

Fyrirlestur um afleiðingar stríðsátaka

Helsti sérfræðingur Sameinuðu þjóðanna um afleiðingar stríðsátaka og flóttamenn í eigin landi, Dennis McNamara, heldur fyrirlestur í dag og fjallar um það hvernig á að standa að afvopnun, friðargæslu og uppbyggingu á þessum stríðssvæðum og velta upp þeirri spurningu hvort smáþjóðir eins og Ísland hafi eitthvað erindi í friðargæslu á átakasvæðum.

Hækkun vísitölu neysluverðs

Hækkun vísitölu neysluverðs síðastliðna þrjá mánuði jafngildir tæplega sextán prósenta verðbólgu á ári, samkvæmt útreikningum Hagstofunnar. Hún hefur hækkað um eitt komma fjörutíu og átta prósent frá síðasta mánuði, sem er óvenju mikil hækkun í ljósi þess að síðastliðna tólf mánuði hefur hún hækkað um samtals rúmlega sjö og hálft prósent.

Sektaðir fyrir að aka enn á nagladekkjum

Þónokkrir ökumenn voru sektaðir fyrir að aka enn á nagladekkjum, eftir að lögreglumenn á Suðvesturlandi hófu átak gegn akstri á nagladekkjum í gær. Fimm þúsund króna sekt liggur við slíku.

Má ekki blóta á sviðinu

Silvía Nótt heldur ásamt föruneyti til Grikklands í dag. Söngkonunni hefur verið tilkynnt að hún megi ekki blóta á sviðinu í Aþenu. Verði textanum ekki breytt frá því sem er í myndbandinu gæti farið svo að henni verði vikið úr keppninni.

Kveikti í bíl föður síns í Kópavogi

Hæstiréttur staðfesti í gær eins mánaðar gæsluvarðhaldsúrskurð yfir manni sem kveikti í bíl föður síns í Kópavogi fyrr í vikunni. Áður hafði maðurinn kveikt í blaðabunka í stofu foreldra sinna svo mikill eldur hlaust af. Maðurinn hefur átt við fíkniefnavanda að stríða og reiddist föður sínum sem reyndi að koma honum í meðferð

Slapp lítið meiddur

Ökumaður, sem var einn í bíl sínum, ók á ljósastaur við Hvammahverfi í Hafnarfirði laust fyrir klukkan sjö í gærkvöld. Þrátt fyrir að beita þyrfti klippum til að ná manninum út úr stór skemmdum bílnum, slapp hann ótrúlega lítið meiddur.

Ökuníðingur á hundrað og sjötíu kílómetra hraða

Minnstu munaði að ökuníðingur, sem hafði mælst á yfir hundrað og sjötíu kílómetra hraða á Reykjanesbraut á leið til Keflavíkur í nótt, æki á lögreglubíl, sem sendur var á móti honum.

Eflir GSM sambandið á Hvolsvelli og nágrenni

Og Vodafone hefur eflt GSM kerfi sitt í Rangárþingi eystra með uppsetningu á nýjum búnaði sem tryggir viðskiptavinum á svæðinu enn betri þjónustu en áður. Bætt þjónusta nær einkum til Hvolsvallar og nágrenni.

Íhuga málsókn vegna björgunar

Við aðalmeðferð í máli ákæruvaldsins gegn Jónasi Garðarssyni kom fram hjá Boga Sigvaldasyni, varðstjóra lögreglunnar í Reykavík, að bátar björgunarsveita hefðu verið komnir á vettvang meira en 20 mínútum áður en lögreglan ákvað að leita eftir bátnum á hafi úti. "Við heyrðum ekkert um alvarleika málsins fyrr en við komum að fólkinu á kili bátsins," sagði Bogi fyrir dómi.

Fasteignaverð hefur hækkað um 67%

Fasteignaverð á höfuðborgarsvæðinu hefur hækkað um 67% frá því í ágúst 2004, eða þegar bankarnir fóru að bjóða upp á íbúðalán. Þetta kemur fram í hálf fimm fréttum KB banka en þar kemur einnig fram að fasteignaverðið hækkaði um fjórðung á síðasta ári. Af tuttugu og tveimur höfuðborgum í Evrópu er fasteignaverð á Íslandi það áttunda hæsta.

Hefja kjaraviðræður á ný

Viðræður SFR og svæðisskrifstofa fatlaðra um kjör stuðningsfulltrúa hefjast aftur á morgun. Upp úr viðræðunum slitnaði fyrir nokkrum vikum en fram kemur á vef SFR að samningafundir hafa verið boðaðir á morgun og föstudag.

Meinuðu Dorrit að fara úr landi

Ísraelskir landamæraverðir ætluðu að neita Dorrit Moussaief forsetafrú að fara úr landi í gær eftir stutta heimsókn. Hún fékk ekki að halda áfram för sinni fyrr en rætt hafði verið við ræðismann Íslands í Ísrael.

Í gæsluvarðhald fyrir íkveikjur

Hæstiréttur Íslands staðfesti í dag eins mánaðar gæsluvarðhaldsúrskurð yfir manni sem kveikti í bíl föður síns í Kópavogi fyrr í vikunni. Áður hafði maðurinn kveikt í blaðabunka í stofu foreldra sinna svo mikill eldur hlaust af.

Þjóðminjasafnið tilnefnt til verðlauna

Þjóðminjasafnið hefur verið valið í úrslit í samkeppni um safn Evrópu árið 2006. Ástæða þess að Þjóðminjasafnið hlýtur þessa tilnefningu er vel heppnuð endurskipulagning og endurhönnun sýninga og starfsemi safnsins. Þrenn verðlaun eru í samkeppninni, verðlaun sem safn ársins, verðlaun á vegum Evrópuráðsins og ítölsku Micheletti verðlaunin sem eru bjartsýnisverðlaun til safns á sviði tækni eða iðnaðar.

Loksins fullkomið fangelsi

Meðal þess sem gert verður til að taka á fíkniefnavanda í fangelsum, verður að koma upp meðferðardeild, þannig að spurn eftir fíkniefnum minnki. Fangelsismálastjóri vonast til að áratugalangri byggingasögu nýs og fullkomins fangelsis, ljúki fljótlega.

Helmingsmunur á kexpakka

Helmingsmunur getur verið á verði sams konar kexpakka í matvörubúðum sem eru hlið við hlið. Gylfi Arnbjörnsson, framkvæmdastjóri ASÍ segir fákeppni ríkja á matvörumarkaði, en með skynsömum innkaupum geti neytendur haldið verðinu í skefjum.

Mikið um hraðakstur

Mikið hefur verið um hraðakstur í umdæmi lögreglunnar í Reykjavík síðasta sólarhring. Alls hafa 54 ökumenn verið stöðvaðir fyrir hraðakstur og þar af reyndust 38 þeirra hafa ekið á yfir 100 kílómetra hraða á stofnbrautum. Fíkniefni fundust auk þess í bíl hjá einum ökumanni og þá fannst talsvert magn af fíkniefnum á heimili mannsins. Þá voru níu ökumenn kærðir fyrir að tala í farsíma og nota ekki handfrjálsan búnað.

Fjórfalt fleiri teknir við hraðakstur

Meira en fjórfalt fleiri ökumenn hafa verið teknir fyrir of hraðan akstur á Akureyri það sem af er ársins en á sama tímabili í fyrra. Í fyrra voru 159 ökumenn teknir fyrir hraðakstur fyrstu 130 daga ársins eða rúmlega einn á dag. Í ár hafa 668 verið ákærðir fyrir hraðakstur eða rúmlega fimm á dag.

Gagnrýna kaupin á svæði Gusts harðlega

Samfylkingarmenn í bæjarstjórn Kópavogs gagnrýna meirihlutann harðlega fyrir ákvörðun um að kaupa Gustssvæðið á rúma þrjá milljarða króna, þó svæðið sé þegar í eigu bæjarins en félagið með afnotarétt til rúmra 30 ára. Bæjarstjórinn í Kópavogi hringsnúast í málinu trekk í trekk.

Útlán Íbúðalánasjóðs dragast saman

Sífellt er erfiðara að selja stórar fasteignir að mati fasteignasala. Útlán Íbúðalánasjóðs dróust saman um þriðjung í apríl. Formaður félags fasteignasala telur hrun á fasteignamarkaði ekki yfirvofandi heldur sé markaðurinn einungis að ná jafnvægi.

Segja ummæli heilbriðisráðherra ófagleg

Frumtök, samtök framleiðanda frumlyfja hér á landi, telja sig hafa staðið fyllilega við samkomulag sem gert var við heilbrigðisráðherra og formann lyfjagreiðslunefndar árið 2004. Samkomulag þetta fól í sér að lækka lyfjaverð á Íslandi til samræmis við það sem þekkist á öðrum Norðurlöndum og telja samtökin að það hafi tekist. Í fréttatilkynningu samtakanna segir að um það bil 85% lyfja sem eru á markaði hér á landi séu frumlyf en framleiðendur samheitalyfja, svo sem Actavis, standi ekki að því samkomulaginu um verðlækkanir. Þeir telja því ummæli heilbrigðisráðherra í fjölmiðlum um að staða lyfjaverðs “sé óþolandi” ófaglega þar sem gagnrýnin eigi ekki við aðildarfyrirtæki Frumtaka heldur aðeins hluta lyfjaframleiðanda. Ósanngjarnt sé að færa öll fyrirtæki undir sama hatt þá sérstaklega í ljósi þess að í febrúar hrósaði ráðherrann Frumtökum fyrir að hafa staðið við samkomulagið frá árinu 2004.

Stúlka verður fyrir fólskulegri árás á leið í skóla

Ráðist var á unga stúlku frá Keflavík á Barónsstíg í morgun þegar hún var á leið í Iðnskólann í Reykjavík. Stúlkan tognaði á hálsi, marðist og skrámaðist á baki og er með bitsár á hendi eftir átökin. Faðir stúlkunnar gagnrýnir leiðarkerfi SBK og segir vítavert gáleysi að áætlunarbílar fyrirtækisins hleypi ungmennum úr vögnunum á stoppistöðvum þar sem óreglufólk heldur sig.

Náttúrufræðikennsla á bókstaflegri siglingu

Rúmlega þúsund grunnskólabörn fá að sigla um Sundin í vor, veiða skelfisk og fræðast um lífríki hafsins, þökk sé samstarfssamningi sem undirritaður var á Miðbakka Reykjavíkurhafnar í morgun. Samstarfsverkefnið "sjóferð um Sundin" er hluti af náttúrufræðikennslu ellefu og tólf ára barna á höfuðborgarsvæðinu, á Akranesi og í Borgarnesi.

Eldur kviknaði í metanframleiðslu Orkuveitunnar

Eldur kviknaði í skúr við metanframleiðslu Orkuveitu Reykjavíkur á sorphaugunum í Álfsnesi í gærkvöldi. Talvert logaði í skúrnum þegar slökkvilið kom á vettvang og höfðu slökkviliðsmenn varann á vegna hugsanlegrar sprengihættu, en slökkvistarf gekk vel. Eldsupptök eru ókunn. Metan, sem þarna er unnið úr sorpinu, er meðal annars notað til að knýja marga af bílum Orkuveitunnar, í stað bensíns.

Fráveitumál í Fjarðarbyggði í ólestri

Gert er ráð fyrir að tæpur milljaður renni í að gera við fráveitur í Fjarðarbyggð. Á fréttavefnum austurlandid.is kemur fram að á síðasta fundi bæjarráðs hafi verið kynnt skýrsla og segir í bókun af fundinum að ljóst sé að fráveitumál í Fjarðarbyggð séu í hörmulegu ástandi.

Breytingar á velferðarkerfinu í bígerð

Þverpólitísk samstaða hefur nú myndast við um að vinna að breytingum, útfærslu og þróun hugmynda um breytingar á íslensku velferðarkerfi í samstarfi við Landsamband eldri borgara, Landsamtökin Þroskahjálp og Öryrkjabandalag Íslands. Í vetur störfuðu 56 manns í hópum auk sex sérfræðinga að hugmyndum sem eiga að fela í sér leiðir til bættra kjara öryrkja og eldri borgara, einföldunar á almannatryggingum, eflingu endurhæfingar, einstaklingsmiðaðrar stuðningsþjónustu utan stofnana, notendavænni heilbrigðisþjónustu og aukinnar atvinnuþátttöku. Vænst er til þess að flokkarnir tilnefni einn fulltúa hver á næstunni og segir í fréttatilkynningu að markmiðið sé að innan eins árs líti dagsins ljós heilsteypt aðgerðaráætlun um virkara velferðarríki.

Starfsmenn Heilsuverndar óánægðir með flutninginn

Starfsmenn Heilsugæslustöðvarinnar við Barónsstíg eru mjög óánægðir með fyrirhugaðan flutning stöðvarinnar í ágúst og segja vinnubrögð ráðamanna ýta undir tortryggni í þeirra garð. Starfsmenn stöðvarinnar funduðu um málið í morgun

Golfvöllur í Viðey

Gofvöllur í Viðey myndi skila hagnaði að mati nemenda við háskólann á Bifröst. Nemendurnir könnuðu í síðasta misserisverkefni sínu hvort rekstralegur grundvöllur væri fyrir því að koma upp golfvelli á eyjunni. Segjast þeir hafa komist að því að frá árinu 2000 til 2005 hafi golfiðkendum á Íslandi fjölgað um 64% og nú sé svo komið að fæstir golfklúbbar anni eftirspurn. Þeir telja ónýtt útivistarsvæðið í Viðey því kjörið sem vallarsvæðil og segja í skýrslu sinni að vegna sérstöðu vallarsvæðisins megi taka 20% hærra gjald fyrir hringinn en annar staðar.

Besta vísindaframlagið á ársþingi dönsku krabbameinssamtakanna

Valgarður Sigurðsson doktorsnemi við læknadeild Háskóla Íslands hlaut viðurkenningu fyrir besta vísindaframlagið á ársþingi dönsku krabbameinssamtakanna sem haldið var föstudaginn 5 maí 2006. Verkefnið var unnið á blóðmeinafræðideild Landspítala - háskólasjúkrahúss og hjá Krabbameinsfélagi Íslands.

Álftanes ljósleiðaravætt

Í dag undirrituðu Alfreð Þorsteinsson, formaður stjórnar Orkuveitu Reykjavíkur, Guðmundur Þóroddsson, forstjóri og Guðmundur G. Gunnarsson, sveitarstjóri, viljayfirlýsingu um að Sveitarfélagið Álftanes verði inni í áætlunum Orkuveitu Reykjavíkur um ljósleiðaravæðingu alls veitusvæðisins.

Slæm þekking fyrirtækja á rétti neytanda

Þekkingu fyrirtækja á rétti neytanda virðist vera ábótavant. Þetta kemur fram í óformlegri könnun sem Neytendasamtökin gerðu á því hversu vel seljendur þekkja reglur og umkvörtunarfrest. Hringt var í tuttugu fyrirtæki úr hópi bílaumboða og raftækjaverslana. Í ljós kom að öll fyrirtækin gáfu upp rangar upplýsingar um frest til umkvartanna á vörum sem eiga að hafa langan endingartíma.

Á að auka samkeppnishæfni íslensks atvinnulífs

Háskólinn í Reykjavík og Seltjarnarnesbær hafa gert samstarfssamning um rannsóknarmiðstöð um einkaframkvæmd. Markmið rannsóknarmiðstöðvarinnar er ætlað að efla rannsóknir sem geta stutt við samvinnu opinberra stofnanna og einkaaðila með einkaframkvæmd. Með þessu er ætlunin að auka samkeppnishæfni íslensks atvinnulífs. Seltjarnarnes verður með þessum samning aðili að ráðgjafanefnd sem á að verða stefnumarkandi fyrir rannsóknarmiðstöðina.

Segja vegina ekki þola aukna umferð

Héraðsnefnd Austur-Húnavetninga skorar á samgönguráðherra að beita sér fyrir því að þjóðvegur eitt um hún Húnvatnssýslu verði breikkaður. Nefndin bendir á aukin umferð stórra flutningabíla og öðrum umferðarþunga hafi stóraukið þörf fyrir breiðari og betri vegi. Í ályktun nefndarinnar segir segir að í mörgum tilfellum þoli vegirnir engan veginn þá umferð sem ætlað er að aki um þá og telur nauðsynlegt að stórauka fjárframlög til þessara verkefna við gerð samgönguáætlunar 2007- 2010.

Fólk hvatt til að skrá neyðarnúmer í farsíma sína

Hvernig er hægt að sjá til þess að þeir fyrstu á vettvang slyss viti í hvaða aðstandendur þeir eiga að hringja. Ein leið til þess er að skrá ICE-neyðarnúmer í farsímann. Tölvupóstur gengur nú manna á milli þar sem fólki er bent á að skrá ICE í farsímann sinn fyrir framan númer þess aðstandenda sem það vill að hringt verði í ef það lendir í slysi.

Eldur í skúr

Eldur kviknaði í skúr við metan framleiðsluver Orkuveitunnar í Reykjavík á sorphaugunum í Álfsnesi í gærkvöldi. Talvert logaði í skúrnum þegar slökkvilið kom á vettvang og höfðu slökkviliðsmenn varann á vegna hugsanlegrar sprengihættu, en slökkvistarf gekk vel. Eldsupptök eru ókunn. Metan, sem þarna er unnið úr sorpinu, en meðal annars notað til að knýja marga bíla Orkuveitunnar, í stað bensíns.

Ellefu-Ellefu dýrust

Hægt er að fá rösklega tvær einingar af tiltekinni pakkavöru í Krónunni fyrir aðeins eina í Ellefu-Ellefu, samkvæmt nýrri verðkönnun ASÍ á morgunkorni og ýmsum pakkavörum í matvöruverslunum. Í flestum tilvikum var yfir 50 prósenta munur en mesti verðmunur nam 137 prósentum á sömu vöru. Verð var oftast lægst í Bónus, en Krónan fylgir þar fast á eftir. Hæsta verð var hinsvegar í Ellefu - Ellefu.

Sjálfstæðisflokkurinn í sókn

Sjálfstæðisflokkurinn í Reykjanesbæ er í stórsókn, samkvæmt skoðanakönnun Félagsvísindastofnunar Háskóla Íslands fyrir NFS og lætur nærri að tveir af hverjum þremur ætli að kjósa hann.

Eftirförin endaði úti í runna

Æsilegri eftirför lögreglu eftir innbrotsþjófi lauk undir morgun með því að þjófurinn ók bíl sínum farman á lögreglubíl og var hann og lögreglumaður úr bílnum fluttir á Slysadeild til aðhlynningar.

Brosi allan hringinn

"Ég brosi auðvitað allan hringinn," sagði Árni Sigfússon, bæjarstjóri í Reykjanesbæ, þegar kynntar voru niðurstöður könnunar fyrir NFS um fylgi flokkanna sem eru þar í framboði. Tveir af hverjum þremur kjósendum í Reykjanesbæ myndu kjósa Sjálfstæðisflokkinn ef gengið yrði til kosninga nú.

Ósætti vegna hugmynda um breyttan miðbæ Garðabæjar

Hugmyndir um breyttan miðbæ Garðabæjar eru slæmar að mati bæjarfulltrúa Framsóknarflokksins í bænum. Hann vill að samningi við fyrirtækið sem unnið hefur að þeim verði sagt upp. Oddviti meirihlutans segir rétt að gefa þeim vinnufrið.

Mikið um ofnæmisvaldandi frjókorn í lofti

Mikið er um frjókorn í lofti þessar vikurnar sem veldur ofnæmi hjá ófáum. Mistur sem borist hefur hingað til lands frá Austur-Evrópu eykur á ofnæmið.

Best búið að mæðrum og börnum í Svíþjóð

Svíþjóð er besta land í heimi fyrir mæður og börn þeirra samkvæmt nýrri skýrslu sem samtökin Barnaheill á Íslandi kynntu í dag. Mikill munur er á því hvernig búið er að mæðrum og börnum þeirra í löndum heimsins en Ísland er með hvað lægstu dánartíðni nýbura í heiminum.

Spáir áframhaldandi hækkun stýrivaxta

Greiningardeild Landsbankans spáir því að Seðlabanki Íslands komi til með að hækka stýrivexti sína um 0,5% á fimmtudaginn í næstu viku. Greiningardeildin telur verulega þörf á hækkuninni þar sem Seðlabankinn sé enn langt frá verðbólgumarkmiðum sínum.