Vissi ekki af líkinu

Einn sakborninganna í líkfundarmálinu segist ekki hafa haft hugmynd um að lík væri vafið í teppi og geymt aftur í, í jeppa sem hann ók um 700 kílómetra leið austur á firði. Hinir sakborningarnir tveir staðhæfa að allir þrír hafi átt þátt í að koma líkinu fyrir í höfninni í Neskaupstað. Aðalmeðferð málsins hófst í Héraðsdómi Reykjavíkur í dag.

Varnarhugmyndir gagnrýndar

Hugmyndir framtíðarhóps Samfylkingarinnar um varnarmál eru gagnrýndar bæði frá hægri og vinstri. Ingibjörg Sólrún Gísladóttir, varaformaður Samfylkingarinnar kynnti nýjar hugmyndir framtíðarhóps á flokksstjórnarfundi Samfylkingarinnar um helgina. Óhætt er að segja að "umræðuplagg" hópsins í varnarmálum hafi vakið mesta athygli.

Lægstu símgjöldin hér á landi

Íslendingar borga minnst norrænu þjóðanna fyrir að tala í síma. Þetta kemur fram í viðamikilli skýrslu norrænu samkeppnisstofnananna sem kynnt var í dag. Höfundar skýrslunnar telja of mikla fákeppni á símamarkaði á Norðurlöndum og æskilegt að stefna að einum norrænum símamarkaði.

Þak fauk og bátur sökk

Vitlaust veður var í Vestmannaeyjum í gær og hlaust af talsvert tjón. Rýma þurfti nokkra vinnustaði í bænum eftir að hluti þaks á einu af húsum Ísfélags Vestmannaeyja hófst á loft og skall af miklum þunga á jörðina. Engan sakaði. </font /></b />

Dimmt og kalsalegt

Rafmagn fór af Höfn í Hornafirði um miðjan dag í gær og voru bæjarbúar án rafmagns fram undir kvöld. Bilun varð í báðum línunum sem bera rafmagnið inn í bæinn en orsakir þeirra eru ókunnar. </font /></b />

Hlunnfarin um hlunnindajarðir

Þjóðkirkjan vill að ríkið greiði henni þrjá milljarða króna í bætur fyrir prestssetur sem seld hafa verið á síðustu áratugum án þess að nokkuð hafi komið í staðinn. Ríkið vill hins vegar aðeins greiða 150 milljónir enda styðst það við aðra skilgreiningu á hvaða jarðir teljist til prestssetra. </font />

Sinnuleysi um varnir landsins

Rússnesku herskipin höfðu verið innan íslensku efnahagslögsögunnar í hálfan mánuð áður en krafist var skýringa frá yfirvöldum í Moskvu. Þetta töldu stjórnarandstæðingar bera vott um sinnuleysi ríkisstjórnarinnar um varnir landsins í umræðum um málið á Alþingi í dag. Ótti við kjarnorkuknúna, rússneska ryðdalla virtist þó ekki fylgja flokkslínum.

Höfuðborgarbúar flýja atvinnuleysi

Síðustu mánuði hafa fleiri flutt frá höfuðborgarsvæðinu en til þess. Prófessor í félagsfræði segir þessa þróun afar óvenjulega og telur að betra atvinnuástand á landsbyggðinni en í höfuðborginni sé líklegasta skýringin. </font /></b />

Vestfirðir eitt prófastsdæmi

Á kirkjuþingi í gær var lagt til að Barðastrandarprófastsdæmi og Ísafjarðarprófastsdæmi sameinist og heiti hins sameinaða prófastsdæmis verði Vestfjarðaprófastsdæmi.

Líflegt á kirkjuþingi

Líflegt var í Grensáskirkju á öðrum degi kirkjuþings í gær. Umræður spunnust um stöðu samningamála við ríkið eftir að kirkjumálaráðherra vék að prestssetrum í ræðu sinni á sunnudag. Bent var á var að vilja hafi skort til að ræða þessi mál af hálfu ráðamanna og því hafi verið erfitt að þoka þeim áfram.

Vetrardekkin viðruð

Annir voru á dekkjaverkstæðum í gær þar sem fjöldi ökumanna vildi losna af sumarbörðunum í fyrstu vetrarhálkunni sunnan heiða. Lausleg athugun Fréttablaðsins sýndi að nagladekkin væru á undanhaldi, heilsársdekk og grófmynstruð vetrardekk nytu æ meiri vinsælda.

Þaki haldið í skefjum

Þaki á einbýlishúsi á Höfn í Hornarfirði var haldið í skefjum með skurðgröfu í gær. Hávaðarok var í bænum, líkt og víða um land, og fylgdust björgunarsveitarmenn árvökulum augum með því sem hugsanlega gat tekist á loft.

Hundrað skip á sjó

Um eitt hundrað skip og bátar voru á sjó undir kvöld í gær samkvæmt upplýsingum frá tilkynningaskyldunni. Smærri bátar höfðu komið sér í land vegna veðursins en hinir stærri létu ekki vagg og veltu á sig fá og héldu fast við sinn keip. Skip voru víða að veiðum, á grynningu fyrir sunnan land, meðfram norðurströndinni og eins á Halamiðum.

Komst sjálfur heim

Bónda í Berufirði var saknað um skeið í gær og voru björgunarsveitir kallaðar út til leitar. Skilaði hann sér sjálfur heim, heill á húfi, áður en leit hófst af þunga. Maðurinn fór að líta eftir fé snemma í gær og skilaði sér ekki heim á tilsettum tíma.

Veturinn kom í gær

Vindur blés hressilega víða um land í gær og sums staðar var dágóð snjókoma. Nokkurt tjón hlaust af þegar hluti þaks feyktist af mjölgeymslu í Vestmannaeyjum, rafmagn fór af á Höfn í Hornafirði og snjóþyngsli öftruðu færð á Austfjörðum.

Óvissa um umsóknir Reykjavíkur

Um 20 undanþágubeiðnir liggja fyrir undanþágunefnd kennara og sveitarfélaganna sem fundar klukkan ellefu.

Málaferli gegn borginni

Oddviti sjálfstæðismanna í borgarstjórn telur fráleitt að líta svo á að hömlur sem settar voru á uppbyggingu matvöruverslana í Grafarvogi gildi enn. Engum geti dottið í hug að þær hafi átt að gilda að eilífu. Verið er að undirbúa málaferli gegn Reykjavíkurborg vegna samninga um einokun Baugs á matvöruverslun í hverfinu. 

Öftust í forgangsröðinni

Sum börn innan veggja almennra grunnskóla eiga við mun alvarlegri fötlun að stríða en börnin í sérskólum, segir Halldór Gunnarsson formaður Landssamtakanna Þroskahjálpar.

Einhverf börn á leið í skólann

Reykjavíkurborg hefur látið undirbúa nýjar umsóknir fyrir um tíu einhverf grunnskólabörn í borginni. Stefán Jón Hafstein formaður Fræðsluráðs Reykjavíkur segir að farið verði að kröfum kennara. Allir þeir 20 til 30 sem komi að kennslu barnanna verði kallaðir út og fái laun samkvæmt ráðningarsamningi.

Loka þurfti Oddsskarði

Vonskuveður var á austanverðu landinu í gær og voru björgunarsveitir á Egilsstöðum og Reyðarfirði kallaðar út til að aðstoða ökumenn bíla sem lent höfðu í vandræðum í Fagradal vegna ófærðar.

Olíuvinnsla hér við land?

Eftir því sem olíuverð hækkar og ófriður eykst á helstu olíuvinnslusvæðum veraldar leita menn nýrra olíuvinnslusvæða á norðurhveli. Ýmsar vísbendingar eru um olíu og gas á íslensku hafsvæði.

29. dagur verkfalls

Landsbankinn hefur hætt dagvistun barna starfsmanna í verkfalli kennara. Atli Atlason framkvæmdastjóri starfsmannasviðs segir að í byrjun verkfalls þegar staða foreldra hafi verið könnuð hafi verið talið að um 40 til 50 börn þyrftu gæslu.

Fasteignaskattstekjur aukast mikið

Tekjur sveitarfélaga af fasteignasköttum gætu aukist um meira en einn milljarð króna á næsta ári vegna hækkunar fasteignaverðs. Fasteignaskattar eru næststærsti tekjustofn sveitarfélaganna á eftir útsvarinu og skila þeim u.þ.b. 11 milljörðum króna á þessu ári í sveitarsjóðina. Þeir taka hins vegar mið af fasteignaverði.

Eiríkur útilokar lagasetningu

Ekki er í bígerð að setja lög á verkfall kennara, segir Eiríkur Jónsson formaður Kennarasambands Íslands: "Lagasetning er út úr myndinni. Ég treysti þeim heimildum sem ég hef."

Frammíköll, skvaldur og fliss

Geir H. Haarde fjármálaráðherra sakaði Samfylkinguna um málefnaskort þegar hann var gagnrýndur fyrir það í upphafi þingfundar að skipa einungis karlmenn í nýja framkvæmdanefnd um stofnanakerfi og rekstur verkefna ríkisins. 

Héraðslistinn fékk flest atkvæði

Héraðslistinn fékk flest atkvæði í sveitarstjórnarkosningunum í nýja sveitarfélaginu á Héraði í gær. Fékk listinn 417 atkvæði og fjóra menn kjörna. Framsóknarflokkurinn og Sjálfsstæðisflokkurinn fengu hvor þrjá menn kjörna og listi Áhugafólks um sveitarstjórnarmál einn mann. Alls nýttu 1410 atkvæðisrétt sinn en á kjörskrá voru ríflega 2100 manns.

Skorinn á háls, en lifir af

Maður á þrítugsaldri var skorinn á háls með brotnu glasi á veitingastaðnum Nellys á gatnamótum Bankastrætis og Þingholtsstrætis í nótt. Betur fór en á horfðist því hann mun að sögn lögreglu lifa árásina af en átökin byrjuðu sem slagsmál fjögurra manna. Allir eru mennirnir á þrítugsaldri.

Í vandræðum á Esjunni

Feðgar lentu í vandræðum í gönguferð upp Esjuna um fimm leytið í gær þegar svarta þoka skall á. Björgunarsveitir Slysavarnarfélagsins Landsbjargar voru kallaðar út eftir að faðirinn náði símasambandi við Neyðarlínuna. Feðgunum var sagt að halda kyrru fyrir.

Héraðslistinn sigraði

Héraðslistinn er sigurvegari sveitarstjórnarkosninganna sem haldnar voru í nýju sameinuðu sveitarfélagi á Heráði í gær. Í sumar runnu Austur-hérað, sem er Egilsstaðir og hrepparnir, Fellahreppur og Norður-héraðs saman í eitt sveitarfélag. Sameiningin var reyndar kærð til félagsmálaráðuneytisins en þar var ekki fallist á kæruna.

Ættu ekki að ala upp börn

"Í hverri einustu viku er í DV svo sóðaleg lygi og svo yfirgengilegur sóðaskapur og bull að ég myndi ekki láta sjá mig í sjónvarpi,væri ég ritstjóri þess blaðs, hvað þá taka að mér að ala upp börn," sagði Bjarni Harðarson, ritstjóri Sunnlenska fréttablaðsins í Silfri Egils á Stöð 2 í dag. Bjarni beindi orðum sínum til annars tveggja ritstjóra DV sem var gestur í Silfrinu.

Fljótsdalshérað talið best

Fljótsdalshérað er nafnið sem kjósendur í sveitarstjórnarkosningunum á Austur Héraði vilja sjá sem nafn á nýju sveitarfélagi. Þau nöfn sem kosið var um í gær voru Egilsstaðabyggð, Fljótsdalshérað og Sveitarfélagið Hérað, en jafnframt gafst kjósendum kostur á að leggja fram annað nafn frá eigin brjósti.

Slökkviliðsmenn styðja kennara

Stjórn og fulltrúaráð Landssambands slökkviliðs- og sjúkraflutningamanna lýsir fullum stuðningi við kjarabaráttu kennara, sem landssambandið telur mikilvægt að leysist hið allra fyrsta, enda geti langvinnt verkfall haft mjög alvarlegar afleiðingar í för með sér.

Biskup: Kennaraverkfall óþolandi

Karl Sigurbjörnsson, biskup Íslands, var ómyrkur í máli þegar hann ræddi verkfall grunnskólakennara í setningarræðu sinni á kirkjuþingi. Sagði hann að samfélagið flokkaði börn sem afgangsstærð og að óþolandi væri að kennarar fyndu sig knúa til að beita verkfallsvopninu.

Ávaxtablanda á þrjúþúsundkall

Fjöldi Íslendinga kaupir tæpan líter af djúsi á þrjú þúsund krónur í þeirri von að grennast. Verkefnisstjóri næringarmála hjá lýðheilsustöð segir kúrinn ekki skila meiri árangri en tveir til þrír ávextir, fjölvítamíntafla og nokkur vatnsglös.

Hætt eftir að Jón komst í málið

Skömmu eftir að Jón Steinar Gunnlaugsson komst á snoðir um gerð sjónvarpsþáttar um prófessorsmálið svokallaða var hætt við gerð þáttarins. Dagskrárstjóri sjónvarps segir Jón Steinar ekki hafa komið nálægt þeirri ákvörðun.

Héraðslistinn vann

Héraðslistinn var sigurvegari sveitarstjórnarkosninganna í sameinuðu sveitarfélagi á Héraði í gær. Þá völdu kjósendur hinu nýja sveitarfélagi nafnið Fljótsdalshérað. Kjörsókn var heldur dræm í gær, eða 66,38%. Minnst var kjörsókn meðal íbúa Austur Héraðs þar sem 1600 afþeim 2100 sem voru á kjörskrá búa.

Nýtt fiskasafn

Til stendur að opna fiskasafn í Húsdýragarðinum og er sjó dælt í garðinn í því skyni. Nú stendur yfir kynning á deiliskipulagi sem felur í sér mikla stækkun á garðinum. Samkvæmt nýju deiluskipulagi sem nú er til kynningar verður garðurinn stækkaður umtalsvert og gert er ráð fyrir yfirbyggðum hluta sem gæti orðið allt að tíu þúsund fermetrar.

Biskup mjög ósáttur

Biskup Íslands, Karl Sigurbjörnsson, segir óþolandi að kennarar finni sig knúna til að beita verkfallsvopninu. Það sé brýnt að fundin verði leið til að tryggja kennurum viðunandi kjör. Börnin séu afgangsstærð í einu ríkasta samfélagi heims.

Kirkjan í mál við ríkið?

Kirkjan gæti þurft að höfða mál á hendur ríkinu vegna deilna um Prestsetur. Kirkjan sakar Landbúnaðarráðuneytið um að selja eignir kirkjunnar meðan samningum um þær sé ólokið. Dómsmálaráðherra segir að jarðir sem alþingi hafi samþykkt að selja séu í gíslingu.

Einokun ekki aflétt

Steinunn Valdís Óskarsdóttir borgarfulltrúi Reykjavíkurlistans segir ekki standa til að aflétta skipulagskvöðum í Grafarvogi sem meina lóðareigendum í Fossaleyni að starfrækja matvöruverslun. Hún segir slíkar kvaðir ríkjandi alls staðar í borginni til að stýra skipulagi svo ekki skapist óreiða.

Bróðurparturinn er lesblindur

Bróðurpartur þeirra fimmtán þúsund manna sem ætla má að eigi við verulega lestrarörðugleika að etja hér á landi er lesblindur. Skýrslu um leiðir til að takast á við vandann hefur verið stungið ofan í skúffu.

AVION hefur góð áhrif

Nýi, íslenski flugrisinn, Avion Group, hefur jákvæð áhrif á rekstur Iceland Express, að sögn eigenda þess síðarnefnda. Iceland Express stefnir í að verða réttum megin við núllið í ár, eftir 30 milljóna króna tap í fyrra. Óformlegar viðræður standa enn yfir við flugfreyjur félagsins, sem sagt var upp störfum fyrir skemmstu.

HVersdagslegir hlutir segja margt

Hversdagslegir hlutir á borð við baunadós og ópalpakka geta sagt til um tíðarandann og þankaganginn í samfélaginu. Í Listasafni Reykjavíkur stendur nú yfir Grafísk hönnunarsaga á Íslandi.

Fær hótanir vegna dóplista

Breiðhyltingurinn Björn Sigurðsson sem birtir nöfn dópsala á netinu hefur fengið hótanir í gegnum síma og á netinu frá þeim sem eru andsnúnir listunum. Tengdadóttir hans hefur einnig fengið hótanir.

Lög á verkfall eina leið ríkisins

Ekki er hægt að leysa verkfall kennara með því að ríkið setji fé í jöfnunarsjóð sveitarfélaganna svo illa stæð sveitarfélög geti mætt launakröfum kennara því samkomulag hafi náðst um fjármál milli sveitarfélaga og ríkisins, segir Gunnar I. Birgisson, formaður bæjarráðs Kópavogs og menntamálanefndar Alþingis.