Fleiri fréttir

Reglugerðin gerir húsnæði dýrara og óvistvænna

Ný byggingarreglugerð mun gera húsnæði dýrara og óvistvænna, draga úr framkvæmdum, eyða hefðum í íslenskri byggingarlist og hækka lán. Þetta er meðal þess sem kemur fram í máli þeirra Friðriks Ágústs Ólafssonar, forstöðumanns Samtaka iðnaðarins, og Guðrúnar Ingvarsdóttur, verkefnastjóra þróunarverkefna hjá Búseta.

Rjúpnaskytta í sjálfheldu

Björgunarsveitir frá Álftaveri, Skaftártungu og Vík í Mýrdal hafa verið kallaðar út til aðstoðar manni sem er í sjálfheldu í klettum norðan megin í Rjúpnafelli, austan Mýrdalsjökuls. Maðurinn, sem er rjúpnaskytta, er á ferð með félaga sínum. Sá er nú staddur neðar í fellinu og þegar honum varð ljóst að aðstoð hans dygði ekki til hringdi hann eftir aðstoð björgunarsveita. Veðrið á svæðinu er þokkalegt. Sjálfhelda í fjöllum og klettum er ekkert gamanmál. Þegar fólk lendir í einni slíkri þurfa björgunarmenn oftar en ekki að nálgast það ofan frá, þ.e. fara ofar í fjallið og síga niður að því. Krefst það töluverðrar línuvinnu og traustra festinga. Því þarf yfirleitt nokkurn mannskap í slík verk.

Í sjálfheldu á lélegum dekkjum

Björgunarsveitinni Lífsbjörg í Snæfellsbæ barst fyrr í dag aðstoðarbeiðni vegna ökumanna sem voru í sjálfheldu í bílum sínum vegna hálku. Um var að ræða tvo bíla, annar var við Arnarstapa en hinn við Hnausa á sunnanverðu Snæfellsnesi og voru erlendir ferðamenn í þeim báðum. Björgunarsveitin fór á staðinn og voru bílarnir staðsettir á um 4 km löngu hálkubelti sem náði frá Hnausum að Hellahrauni. Björgunarmenn óku bílunum af hálkubeltinu en þeir voru báðir á afar lélegum dekkjum.

Hellti bensíni á hurðina og kveikti í

Lögreglan var kölluð að húsi við Bríetartún í miðborg Reykjavíkur rétt eftir hádegi í dag en þar hafði bensíni verið hellt á útidyr og kveikt í. Sá sem er grunaður um verknaðinn var handtekinn á vettvangi. Eldurinn var slökktur með handslökkvitæki sem var innandyra í húsinu en skemmdir urðu á hurð. Að sögn lögreglu var hinn handtekni undir áhrifum vímugjafa og lét ófriðlega. Þannig lét hann alla leið inn í fangaklefa og slasaðist einn lögreglumaður í þeim átökum. Rætt verður við manninn þegar ástand hans skánar.

Valt í hálkunni

Engin slys urðu á fólki þegar bílvelta varð við Tannastaði á Biskupstungnabraut, rétt áður en komið er að Þrastarlundi, upp úr hádegi í dag. Að sögn lögreglu er gríðarleg hálka í umdæminu og eru ökumenn hvattir til að aka varlega. Þá var tilkynnt um árekstur við hringtorg á Þorlákshöfn eftir hádegið í dag. Sjúkrabíll var sendur á staðinn, en ekki liggur fyrir hvort einhver slys urðu á fólki.

Ætluðu að skjóta rjúpu á Þingvöllum

Lögreglan hafði afskipti af rjúpnaskyttum á Þingvöllum á þriðja tímanum í dag. Samkvæmt upplýsingum frá lögreglunni á Selfossi barst tilkynning um að skotveiðimenn væru að skjóta rjúpu í þjóðgarðinum, sem er stranglega bannað samkvæmt lögum enda friðað svæði.

Dallas heldur áfram - JR verður skrifaður út úr þáttunum

Dallas-sjónvarpsþættirnir halda áfram göngu sinni þrátt fyrir að Larry Hagman sé látinn en hann lék eina aðalsögupersónuna, JR Ewing. Þættirnir nutu gríðarlegra vinsælda á níunda áratugnum en til stendur að frumsýna nýja seríu í lok janúar á næsta ári. Framleiðendur þáttanna segja að þó þurfi að gera breytingar á handritinu og skrifa inn andlát JR. Hagman lést á föstudag eftir baráttu við krabbamein í lifur.

Vinningshafinn fær 54 milljarða í vinning

Yfirmenn í Kraftbolta-happadrættisins í Iowa-ríki í Bandaríkjunum tilkynntu í morgun að enginn hefði verið með allar tölurnar réttar þegar dregið var út á dögunum. Það þýðir í næsta drætti verða 425 milljónir bandaríkjadala, eða tæplega 54 milljarðar íslenskra króna, í vinning. Það er hæsta upphæð í sögu happadrættisins. Árið 2006 vann starfsmaður í matvöruverksmiðju 365 milljónir bandaríkjadala. Ekki að það skipti máli fyrir okkur hérna á Íslandi, en þá voru tölurnar í gær 22 - 32 - 37 - 44 - 55 og bónustalan, eða kraftboltinn, var 34.

Vatnshæðin um tveir metrar

Vatnshæðin í Gígjukvísl mælist nú tæplega tveir metrar en lítið hlaup hófst þar á miðvikudagskvöld. Vatnshæðin hefur vaxið jafnt og þétt síðustu tvor sólarhringa og um einn metra frá því að hlaupið hófst. Samkvæmt upplýsingum frá Veðurstofu Íslands er enn rafleiðni í ánni sem bendi til að enn sé hlaupvatn í henni. Engin merki eru um jarðhræringar á svæðinu.

Sextán daga átak gegn kynbundnu ofbeldi

Ljósaganga UN Women á Íslandi fer fram klukkan sjö í kvöld en gangan markar upphaf 16 daga átaks gegn kynbundnu ofbeldi og er jafnframt síðasti Appelsínuguli dagurinn í ár. Gangan hefst í Alþingisgarðinum og gengið verður að Bíó Paradís við Hverfisgötu.

Vilja halda þjóðaratkvæðagreiðslu um sjálfstæði

Stuðningsmönnum þess að sjálfstjórnarhéraðið Katalónía á Spáni verði sjálfstætt og skilið frá Spáni hefur vaxið fiskur um hrygg að undanförnu, en þjóðernissinnar í Katalóníu vilja halda sérstaka þjóðaratkvæðagreiðslu í héraðinu um málið.

Mannskæður eldsvoði í verksmiðju

Yfir hundrað létust í eldsvoða sem braust út í fataverksmiðju í höfuðborg Bangladesh, Dhaka, seint í gærkvöldi. Verksmiðjan er á mörgum hæðum í úthverfi höfuðborgarinnar.

Varð fyrir bíl og missti tvær tennur

Karlmaður á fertugsaldri varð fyrir bifreið á gatnamótum Lækjargötu og Bankastrætis rétt fyrir klukkan tvö í nótt. Hann féll í götuna með þeim afleiðingum að tvær tennur brotnuðu í honum. Hann mun hafa farið yfir götuna gegn rauðu gangbrautarljósi, að sögn vitna að óhappinu. Hann var fluttur á slysadeild.

Talningu lokið hjá sjálfstæðismönnum

Búið er að telja öll atkvæði í prófkjöri Sjálfstæðisflokksins í Reykjavík. Hanna Birna Kristjánsdóttir hlaut 74% atkvæða í fyrsta sætið og mun því velja sér annað hvort Reykjavíkurkjördæmanna til þess að leiða í næstu kosningum. Illugi Gunnarsson varð í öðru sæti og mun því leiða hitt kjördæmið. Pétur Blöndal varð í þriðja sæti og Brynjar Níelsson í því fjórða.

„Förum í kosningarnar af fullum krafti“

"Ég er mjög ánægð og þakklát fyrir þann stuðning sem ég fékk,“ segir Katrín Jakobsdóttir sem fékk flest atkvæði í fyrsta sæti í prófkjöri VG í Reykjavík. Hún segist vera ánægð með listann sem kom út úr prófkjörinu. "Það var hart barist og mjótt á munum, en við erum ánægð með þetta og keik,“ segir hún.

Niðurstaðan vonbrigði

"Það eru bara vonbrigði,“ segir Björn Valur Gíslason inntur eftir viðbrögðum sínum við niðurstöðu prófkjörs VG í Reykjavík í dag. Samkvæmt niðurstöðum prófkjörsins verður hann ekki í þremur efstu sætunum á lista, hvorki í Reykjavík suður né Reykjavík norður. "Það eru alltaf vonbrigði að ná ekki markmiðum sínum. En niðurstaðan er þessi og þá bara vinnur maður úr henni,“ segir Björn Valur.

Björn Valur var ekki á meðal efstu

Björn Valur mun ekki skipa eitt af þremur efstu sætunum á lista VG í Reykjavík fyrir næstu kosningar. Katrín Jakobsdóttir og Svandís Svavarsdóttir munu leiða sitthvort kjördæmið. Árni Þór og Álfheiður Ingadóttir munu verða í öðru sæti og Steinunn Þóra Árnadóttir og Ingimar Karl Helgason verða í þriðja sæti.

Ögmundur leiðir lista VG í Kraganum

Ögmundur Jónasson er fyrsti maður á lista VG í Suðvesturkjördæmi. Hann fékk 261 atkvæði í fyrsta sætið af 480 gildum atkvæðum. Ólafur Þór Gunnarsson var í öðru sæti með 234 atkvæði í það sæti. Rósa Björk Brynjólfsdóttir varð í þriðja sæti með 249 atkvæði í það sæti og Margrét Pétursdóttir varð í fjórða sæti með 295 atkvæði.

Páll Óskar hagnaðist um 10 milljónir í fyrra

Páll Óskar ehf. hagnaðist um 10 milljónir á síðasta ári samanborið við 300 þúsund krónur árið á undan. Fyrirtækið er í eigu poppkóngsins Páls Óskars Hjálmtýssonar.

Gangnam Style vinsælasta lagið á YouTube frá upphafi

Myndbandið við lagið Gangnam Style með suður-kóreska söngvaranum Psy er vinsælasta myndbandið í sögu Youtube.com. Búið er að horfa á myndbandið yfir 805 milljón sinnum. Þetta er ótrúlegur árangur því myndbandið var sett inn á síðuna í júlí á þessu ári. Fyrir átti söngvarinn Justin Bieber vinsælasta myndbandið við lagið Baby.

Pétur nær þriðja sæti af Brynjari

Brynjar Níelsson er kominn niður í fjórða sæti þegar talin hafa verið 3575 atkvæði í prófkjöri Sjálfstæðisflokksins í Reykjavík. Pétur Blöndal færist upp um eitt sæti. Hanna Birna er ennþá í efsta sæti með um 78% atkvæða.

Vill sjá breytingar á stjórnmálunum

"Ég er mjög sátt og afar þakklát og stolt,“ segir Hanna Birna Kristjánsdóttir sem er í efsta sæti á lista Sjálfstæðisflokksins í Reykjavík.

Illugi er ánægður með niðurstöðuna

Ég er mjög ánægður með þessa niðurstöðu, segr Illugi Gunnarsson sem er í öðru sæti á lista Sjálfstæðisflokksins í Reykjavík. Reykjavík skiptist í tvö kjördæmi og því munu Hanna Birna Kristjánsdóttir, sem varð í fyrsta sæti, og Illug leiða sitthvort kjördæmið.

Þakklátur fyrir traustið

"Mín viðbrögð eru bara gleði og ég þakka traustið, segir Brynjar Níelsson hæstaréttarlögmaður sem er í þriðja sæti í prófkjöri sjálfstæðismanna þegar fyrstu tölur hafa verið kynntar.

Hvöttu fólk til að ræða um líffæragjafir

Sjálfboðaliðar úr röðum þingmanna og líffæraþega lögðust á eitt í dag og hvöttu fólk til þess að tala saman um líffæragjafir og voru meðal annars sýnileg í Kringlunni.

Yfir 5000 hafa kosið í Reykjavík

Góð þátttaka er í prófkjöri Sjálfstæðisflokksins í Reykjavíkurkjördæmi en klukkan fjögur höfðu 4539 kosið. Um þúsund hafa kosið utan kjörstaðar. Samkvæmt upplýsingum frá Kristínu Edwald, formanni yfirkjörstjórnar, er þetta betri þátttaka en í síðasta prófkjöri fyrir alþingiskosningarnar. Kjörstöðum lokar klukkan sex og von er á fyrstu tölum klukkan sjö.

Haraldur verður í 2. sæti

Haraldur Benediktsson, formaður Bændasamtaka Íslands, sigraði í kosningu um annað sæti á lista Sjálfstæðisflokksins í Norðvesturkjördæmi í dag. Hann hlaut 90 atkvæði af 229.

Sterar og kannabis á Ísafirði

Síðdegis í gær framkvæmdi lögreglan á Vestfjörðum húsleit á heimili tveggja einstaklinga á Ísafirði en grunur lék á að í íbúðinni væru fíkniefni. Við leitina fundust kannabisfræ, áhöld sem virðast hafa verið notuð til kannabisneyslu og ætluð ólögleg hormónalyf sem talin eru notuð í tengslum við líkamsrækt.

Hector "Macho" látinn

Fyrrum heimsmeistarinn í hnefaleik, Hector "Macho" Camacho, lést í morgun eftir að læknar tóku öndunarvél, sem hann var tengdur við, úr sambandi. Boxarinn var skotinn í höfuðið í síðasta mánuði og var úrskurðaður heiladauður í kjölfarið.

Fljúgandi hálka - margir leitað á slysadeild vegna beinbrota

Lögreglan á höfuðborgarsvæðinu vill koma því á framfæri að mikil hálka er um alla borg bæði fyrir gangandi og akandi vegfarendur. Fólk er beðið um að fara varlega. Læknir á bráðamóttöku segir í samtali við fréttastofu að margir hafi leitað á slysadeild eftir að hafa dottið í hálkunni. Allir, sem hafi komið á slysadeildina, segi að hálkan sé mjög lúmsk. Þeir sjúklingar sem hafa leitað á spítalann vegna slysa í hálkunni hafi fengið höfuðhögg eða beinbrot.

Nóg af prófkjörum í dag

Sjö prófkjör, forvöl eða uppstillingar á lista flokka fyrir komandi þingkosningar fara fram um helgina víðsvegar um land.

Notuðu táragas gegn 10 þúsund mótmælendum

Til óeirða kom í Bangkok höfuðborg Tælands í nótt þegar um tíu þúsund mótmælendur komu saman og kröfðust afsagnar forsætisráðherrans, Yingluck Shinawatra.

Hlíðarfjall opið í fyrsta sinn í vetur

Skíðasvæðið í Hlíðarfjalli opnar núna klukkan tíu, í fyrsta sinn á þessum vetri. Í tilkynningu segir að veðrið sé með afbrigðum gott, tveggja gráðu frost og vindhraði tveir metrar á sekúndu. Opið er í brekkunum til klukkan fjögur síðdegis.

Rósarstríðinu er ekki lokið

Lögmaður Jafnaðarmannafélagsins Rósarinnar hefur óskað eftir fundargerðum kjörstjórnar Samfylkingarinnar í Reykjavík. Félagið er ósátt við þá ákvörðun að 350 nýir félagar í Rósinni hefðu ekki fengið að taka þátt í prófkjöri flokksins sem fram fór um síðustu helgi.

Gaf öll líffæri 12 ára sonar síns

Heiðbjört Ingvarsdóttir missti son sinn í reiðhjólaslysi árið 1997. Hún ákvað strax að gefa úr honum öll líffæri og hefur ekki séð eftir því síðan. Hún segir að nauðsynlegt sé að virða ólíkar skoðanir fólks.

Dallas-stjarna látin

Bandaríski leikarinn Larry Hagman lést í gær 81 árs að aldri en hann er hvað þekktastur fyrir að hafa leikið JR Ewing í bandarísku sjónvarpsþáttunum Dallas. Þættirnir, sem eru með þeim vinsælustu sem hafa verið sýndir á sjónvarpsstöðinni CBS í Bandaríkjunum, voru sýndir hér á landi á sínum tíma. Banamein Hagmans var krabbamein.

Milljarður í gjaldeyri á Iceland Airwaves

Erlendir gestir á Iceland Airwaves eyddu 800 milljónum á höfuðborgarsvæðinu og 300 milljónum í ferðalög til landsins. Við bætast ferðir út á land. Gríðarleg búbót fyrir hagkerfi Reykjavíkur, segir ÚTON.

Sjá næstu 50 fréttir

Mest lesið