„Förum í kosningarnar af fullum krafti“

„Ég er mjög ánægð og þakklát fyrir þann stuðning sem ég fékk," segir Katrín Jakobsdóttir sem fékk flest atkvæði í fyrsta sæti í prófkjöri VG í Reykjavík. Hún segist vera ánægð með listann sem kom út úr prófkjörinu. „Það var hart barist og mjótt á munum, en við erum ánægð með þetta og keik," segir hún.

Hún segir allt of snemmt að segja til um það hve marga þingmenn flokkurinn geti fengið í Reykjavík í kosningunum í vor. „En við förum í þetta af fullum krafti og svo sjáum við bara hvað setur," segir hún. „En ég lít svo á að við höfum góðan málstað að verja," bætir hún við.