Hanna Birna áhrifamesti forystumaðurinn í Sjálfstæðisflokknum

Hanna Birna Kristjánsdóttir er talin hafa styrkt stöðu sína verulega hafi hún áhuga á að bjóða sig fram að nýju í embætti formanns Sjálfstæðisflokksins eftri glimrandi kosningu í prófkjöri flokksins í Reykjavík í gær.

Hanna Birna er ótvíræður sigurvegari prófkjörs sjálfstæðismanna enda hlaut hún yfirburðakosningu í fyrsta sætið.

Niðurstöðurnar sýna að í raun var aldrei neinn slagur um oddvitasæti listans, slíkir voru yfirburðir Hönnu Birnu.

Kosið verður um embætti varaformanns á landsfundi næsta vor þar sem Ólöf Nordal er að hætta í stjórnmálum að loknu þessu kjörtímabili. Rætt hefur verið um að Hanna Birna taki við af Ólöfu og sjálf hefur hún ekki útilokað það.

Sjálfstæðismenn sem fréttastofa hefur rætt við í dag telja að Hanna Birna hafi í raun öll spil á hendi núna. Einn þeirra sagði að hún gæti í raun gert það sem hún vildi og þess vegna gefið kost á sér í formanninn að nýju.

Annar orðaði það þannig að ef nánustu stuðningsmenn hennar mætu stöðuna þannig að Sjálfstæðisflokkurinn yrði utan ríkisstjórnar eftir næstu kosningar væri ef til vill skynsamlegt að bíða og láta framboð í embætti varaformanns duga.

Styrmir Gunnarsson fyrrverandi ritstjóri Morgunblaðsins segir í grein á Evrópuvaktinni að Hanna Birna sé orðinn áhrifamesti forystumaður Sjálfstæðisflokksins bæði í borginni og í landsmálunum.

Vafalaust verði þrýst á Hönnu Birni um að bjóða sig fram til formanns Sjálfstæðisflokksins á ný á landsfundi í vetur í ljósi úrslitanna og atkvæðahlutfalls Bjarna Benediktssonar í prófkjörinu í Suðvesturkjördæmi.

Ef árangur Bjarna og Hönnu Birnu er skoðaður sést að Hanna Birna fékk mun hærra hlutfall gildra atkvæða í sínu kjördæmi, eða 74 prósent meðan Bjarni fékk 55 prósenta stuðning í Suðvesturkjördæmi. Þessi mikli stuðningur er traustsyfirlýsing fyrir Hönnu Birnu og ætti að veita henni sjálfstraust til að fara fram gegn Bjarna hafi hún áhuga á slíku.

Hanna Birna hafði ekki erindi sem erfiði á síðasta landsfundi þegar laut í lægra haldi fyrir sitjandi formanni, Bjarna Benediktssyni en fékk samt um 40 prósent atkvæða.

Sjálf hefur Hanna Birna sagt að hún ætli sér ekki í formannsframboð að nýju gegn Bjarna Benediktssyni, sama hversu góðan árangur hún fengi í prófkjörinu.

Eftir því sem fréttastofa kemst næst hefur þetta mat ekki breyst þrátt fyrir stórsigur í prófkjörinu í gær.