Heimsendir í nánd

Stjarneðlisfræðingurinn og hugsuðurinn Stephen Hawking segir jarðarbúum stafa meiri ógn af loftslagsbreytingum en hryðjuverkum og hvetur til stríðs gegn þeim. Mínútuvísir dómsdagsklukkunnar svokölluðu var færður fram um tvær mínútur í dag og lét Hawking þessi ummæli falla við það tækifæri.

Guðmundur í Byrginu ætlar að kæra nauðgun

Guðmundur Jónsson, fyrrverandi forstöðumaður Byrgisins, segist ætla að kæra stúlku fyrir nauðgun, sem sjálf hefur kært hann fyrir nauðgun. Þetta sagði hann í kvöldfréttum Ríkissjónvarpsins í kvöld. Myndband hefur gengið manna á millum á netinu í dag þar sem Guðmundur sést í BDSM kynlífsleikjum með stúlkunni.

Legígræðsla undirbúin

Hópur lækna í New York undirbýr nú það vandaverk að græða leg úr látinni konu í aðra lifandi. Tækist það gæti legþeginn mögulega alið barn.

Aukið öryggi fyrir aldraða

Skynjari sem gerir öryggismiðstöð viðvart ef hann nemur ekki hreyfingu í ákveðið langan tíma var kynntur í dag. Skynjarinn er til þess fallinn að auka öryggi aldraðra sem búa heima.

Fráleitt að benda á Ríkisendurskoðun

Margrét Frímannsdóttir, þingmaður Samfylkingar, segir fráleitt að vísa ábyrgð á eftirlitsleysi með fjárreiðum Byrgisins á Ríkisendurskoðun. Sigurður Þórðarson ríkisendurskoðandi er kallaður fyrir Fjárlaganefnd á morgun til að ræða eftirlit með framlögum og styrkjum til félagasamtaka. Ríkisendurskoðandi fékk ekki í hendur fimm ára gamla trúnaðarskýrslu um fjárreiður Byrgisins.

Útlendingar kærkomin kæling

Það dró úr launaskriði í byggingariðnaði og verslun á síðasta ári, líklega vegna tilkomu útlendinga á íslenskan vinnumarkað, segir hagfræðingur hjá Greiningardeild Kaupþings. Hún segir útlendingana hafa slegið á verðbólgu og verið kærkomna kælingu fyrir atvinnulífið.

Komst heim eftir rúm 30 ár í gíslingu

Tæplega sjötugur fiskimaður kom til síns heima í Suður-Kóreu í gær eftir rúmlega 30 ára gíslingu í Norður-Kóreu. Hann segir dvalarstað sinn þar hafa verið þröngt afmarkaðan og á stundum hafi hann einvörðungu haft gras til næringar.

Stafræn útsending á Vestfjörðum

Stutt er í að allir íbúar Vestfjarða geti horft á stafrænar útsendingar Stöðvar 2 og annarra sjónvarpsstöðva.

Stjórnarandstaðan segir herlög í þinginu

Þingmenn stjórnarandstöðu saka forseta þingsins um að virða vilja þingmanna og þingsköp að vettugi til að knýja frumvarp um Ríkisútvarpið í gegn um þingið og segja herlög gilda í þinginu. Formaður Menntamálanefndar segir þá hinsvegar stunda grímulaust málþóf.

Kristinn H. Gunnarsson vill ekki þriðja sætið

Kristinn H. Gunnarsson þingmaður Framsóknarflokksins ætlar ekki að þiggja þriðja sætið í Norðvesturkjördæmi en þar hafnaði hann í forvali flokksins.

Átök í Aþenu

Grískir víkingasveitarmenn börðust við mótmælendur í Aþenu í dag og hékk reykjarmökkur yfir miðbænum í eftirmiðdaginn. Mótmælendurnir fleygðu bensínsprengjum að lögreglumönnum, sem svöruðu með táragasi. Eldur læsti sig í fjóra bíla og eina verslun út frá sprengjunum.

Margrét útilokar ekki formannsframboð

Margrét Sverrisdóttir útilokar ekki framboð til formennsku Frjálslynda flokksins. Margrét lýsti yfir framboði til varaformanns í gærkvöldi, en eftir að formaðurinn, Guðjón Arnar Kristjánsson lýsti yfir eindregnum stuðningi við sitjandi varaformann skipuðust veður í lofti.

Stela verkfærum til að selja eða flytja úr landi

Verkfærum fyrir á þriðju milljón króna var stolið nýlega úr tveimur nýbyggingum hjá byggingaverktaka. Starfsmaður hjá fyrirtækinu segir menn fara á milli verktaka til að selja notuð, stolin verkfæri.

Innbrot í Keflavík og ölvun á flugvellinum

Brotist var inn í íbúðarhús í Keflavík í morgun og höfðu þjófarnir á brott með sér ýmsa muni. Síðar í dag voru menn handteknir í Reykjavík sem höfðu undir höndum hluta af þýfinu. Þjófarnir unnu spjöll á húsi og eignum í innbrotinu. Þá fékk maður sem kom ofurölvi til landsins í flugvél að sofa úr sér í fangageymslu í Keflavík.

Stærsta hvalaskoðunarfyrirtæki á landinu verður til

Slagnum um ferðamennina er lokið við Reykjavíkurhöfn. Hvalaskoðunarfyrirtækin tvö sem hafa verið starfrækt við Ægisgarð undanfarin ár hafa verið sameinuð. Nýja hvalaskoðunarfyrirtækið verður það stærsta á landinu þar sem samanlagður farþegafjöldi fyrirtækjanna var um 50 þúsund á síðasta ári.

21 umferðaróhapp í dag

21 árekstur hefur orðið í höfuðborginni í dag, þó enginn harður. Flestir urðu vegna hálku í íbúðarhverfum. Engin slys hafa orðið á fólki.

Valinn einn af 40 athyglisverðustu erlendu lögmönnum í Bretlandi

Breska vikuritið The Lawyer hefur valið Guðmund J. Oddsson, forstöðumann lögfræðiskrifstofu Logos í Lundúnum, einn af 40 athyglisverðustu erlendu lögfræðingunum í Bretlandi.

Krafist afsagnar Olmerts og Peretz

Háværar kröfur eru nú meðal stjórnarandstæðinga í Ísrael um að Ehud Olmert, forsætisráðherra landsins, og Amir Peretz varnarmálaráðherra segi af sér eftir að yfirmaður Ísraelshers, Dan Halutz tilkynnti um afsögn sína vegna mistaka sem gerð hefðu verið í stíðinu gegn Hizbollah-samtökunum í Líbanon í sumar.

Eldur í bílskúr í Breiðholti

Eldur kviknaði í bílskúr í Breiðholti síðdegis í gær en þar var 18 ára piltur að setja bensín á fjórhjól um leið og hann reykti sígarettu. Að sögn lögreglu fór eitthvað af eldsneytinu á gólfið og þegar á það féll glóð úr sígarettunni kviknaði eldur.

Þykjast ekki vera opinber vefsíða

Fyrirtækið USAFIS sem birti auglýsingu á Vísi segist ekki vera að svindla á fólki. Auglýsingin var hlekkur á heimasíðuna usafis.org. Þar er fólki boðið að sækja um Græna kortið til Bandaríkjanna.

Halldór Björn nýr forstöðumaður Listasafns Íslands

Þorgerður Katrín Gunnarsdóttir menntamálaráðherra hefur skipað dr. Halldór Björn Runólfsson í embætti forstöðumanns Listasafns Íslands til fimm ára, frá 1. mars 2007 næstkomandi.

Meirihluti dagforeldra ætlar að lækka gjaldskrá

84 prósent dagforeldra í Reykjavík ætla að lækka gjaldskrá sína í kjölfar aukinna niðurgreiðslna frá borginni. Þetta kemur fram í könnun sem þjónustumiðstöðvar í Reykjavík gerðu meðal dagforeldra í janúarbyrjun og kynnt var í leikskólaráði Reykjavíkurborgar í dag.

Samgönguverðlaun veitt í vor

Samgönguráðherra hefur komið á fót sérstökum samgönguverðlaunum sem ætlunin er að veita árlega einstaklingi, samtökum eða stofnun sem þykir hafa lagt fram verðmætan skerf á einhverju sviði samgöngumála. Um er að ræða peningaverðlaun auk verðlaunagrips.

Fjögurra ára fangelsi fyrir fíkniefnasmygl

Héraðsdómur Reykjavíkur dæmdi í dag rúmlega þrítuga konu í fögurra ára fangelsi fyrir fíkniefnasmygl. Þrír karlmenn voru jafnframt dæmdir í þriggja ára fangelsi fyrir smyglið. Fólkið smyglaði inn tæpum tveimur kílóum af kókaíni sem fundust við tollleit á Keflavíkurflugvelli í ágúst á síðasta ári.

Kristinn tekur ekki sæti á lista Framsóknarflokksins

Kristinn H. Gunnarsson, þingmaður Framsóknarflokksins í Norðvesturkjördæmi hefur ákveðið að taka ekki sæti á lista flokksins við næstu Alþingiskosningar. Fréttavefur Bæjarins besta segir að Kristinn hafi tilkynnt formanni kjördæmasambands Framsóknarflokksins í kjördæminu um ákvörðun sína í dag.

Margrét íhugar að bjóða sig fram til formanns í stað varaformanns

Margrét Sverrisdóttir íhugar nú að draga framboð sitt til varaformanns Frjálslynda flokksins til baka og bjóða sig fram til formanns í staðinn. Þetta gerir hún vegna afdráttarlauss stuðnings Guðjóns Arnar Kristjánsssonar, formanns flokksins, við Magnús Þór Hafsteinsson, núverandi varaformann flokksins.

Mannskæð árás í Sadr-hverfinu í Bagdad

Sautján eru sagðir látnir og yfir þrjátíu slasaðir eftir að sjálfsmorðsárásarmaður sprengdi bíl sinn í loft upp á markaði Sadr-hverfi sjía í Bagdad í dag. Er þetta önnur mannskæða árásin í dag en um tíu manns létust og yfir 40 særðust í sams konar árás við lögreglustöð í Kirkuk í Norður-Írak í morgun.

Skilorðsbundið fangelsi fyrir að geta ekki borgað fyrir mat

Karlmaður var í Héraðsdómi Reykjavíkur í dag dæmdur í fjögurra mánaða skilorðsbundið fangelsi fyrir að hafa pantað og neytt veitinga að upphæð ríflega 10 þúsund krónur á veitingastað í borginni án þess að geta greitt fyrir þær.

Gengið frá lista Sjálfstæðisflokksins í Suðurkjördæmi

Sjálfstæðismenn í Suðurkjördæmi ganga frá lista sínum fyrir komandi Alþingiskosningar á sunnudaginn kemur. Prófkjör flokksins í kjördæminu fór fram í nóvember síðastliðnum. Þeir sem urðu í sex efstu sætunum þar fengu allir bindandi kosningu nema Kjartan Ólafsson.

Fuglaflensa greinist í ungri konu í Egyptalandi

Nýtt tilvik fuglaflensu hefur greinst í manneskju í Egyptalandi en um er að ræða 27 ára gamla konu sem býr í héraði suður af höfuðborginni Kaíró.

Flugstöð á Tenerife rýmd vegna elds

Flugstöðin á sunnanverðri Tenerife-eyju var rýmd í dag vegna elds sem upp kom í loftræstikerfi. Reykur barst fljótt um alla stöðina og þurftu þrjú þúsund manns að yfirgefa hana.

Síldarviðræður standa enn yfir

Viðræður standa enn yfir í Osló milli íslenskra og norskra stjórnvalda um veiðar á norsk-íslenska síldarstofninum. Stefán Ásmundsson, formaður íslensku samninganefndarinnar, segir engan niðurstöðu komna en meðan menn séu að ræðast við séu möguleiki á að ná saman.

Litlar breytingar á stjórn úrvinnslusjóðs

Umhverfisráðherra hefur skipað í stjórn Úrvinnslusjóðs til næstu fjögurra ára. Fyrir henni fer Guðmundur G. Þórarinsson verkfræðingur en auk hans sitja Guðfinnur G. Johnsen, Bryndís Skúladóttir, Sigurður Jónsson og Sigurður Óli Kolbeinsson í stjórninni.

Páfagaukur flúði frostið inn á veitingahús

Viðskiptavinur á veitingahúsinu Tívolí í miðbæ Reykjavíkur varð fyrir nokkuð óvenjulegri reynslu í dag. Þegar hann var að ganga inn um dyr veitingastaðarins settist páfagaukur á öxl hans. Fuglinn er hinn sprækasti þrátt fyrir að hafa verið flögrandi um í frostinu.

Stjórnarandstaðan undrast orð Sólveigar

Þingmenn stjórnarandstöðunnar lýstu í dag yfir undrun sinni yfir orðum Sólveigar Pétursdóttur, forseta þingsins, í hádegisfréttum Stöðvar 2 og Bylgjunnar í dag. Þar sagðist Sólveig vilja breyta þingsköpum á þann hátt að takmarkanir yrðu settar á ræðutíma alþingismanna..

Skilorðsbundið fangelsi fyrir hnífsstungu við Select

Héraðsdómur Reykjavíkur hefur dæmt nítján ára gamlan pilt í þriggja mánaða skilorðsbundið fangelsi fyrir að hafa stungið öryggisvörð við bensínsstöð Shell við Suðurfell í bakið í haust.

Grunaður um fjölda innbrota og þjófnaði

Hæstiréttur Íslands staðfesti í gær gæsluvarðhaldsúrskurð yfir karlmanni sem grunaður er um innbrot og þjófnaði. Maðurinn var handtekinn í síðustu viku eftir að hafa brotist inn á hárgreiðslustofu í Hlíðarsmára og stolið sjóðsvél. Maðurinn hefur játað brot sín.

Ísrael: Yfirmaður hersins hættur

Yfirmaður ísraelska hersins hefur sagt af sér embætti vegna rannsóknar hersins á stríðinu gegn skæruliðum Hisbollah í Líbanon í fyrrasumar. Þrýst hefur verið á afsögn hans allt frá því átökum lauk.

ESB: Áhersla á stjórnarskrá

Angela Merkel, kanslari Þýskalands, telur það söguleg mistök ef ekki takist að semja um stjórnarskrá Evrópusambandsins. Um áramótin tóku Þjóðverjar við forystu í sambandinu til næstu sex mánaða og ætla sér að stuðla að því að ný stjórnarskrá verði samþykkt fyrir kosningar til Evrópuþingsins 2009.

Ríkisendurskoðandi fékk ekki trúnaðarskýrslu um Byrgið

Sigurður Þórðarson ríkisendurskoðandi er kallaður fyrir fjárlaganefnd Alþingis á morgun til að ræða eftirlit með framlögum og styrkjum til aðila utan velferðarkerfisins. Ríkisendurskoðandi fékk ekki í hendur trúnaðarskýrslu um fjárreiður Byrgisins sem gerð var af fulltrúum þriggja ráðuneyta.

10 létust og 42 særðust

10 manns létust og 42 særðust í Kirkuk í Írak morgun þegar sjálfsmorðssprengjumaður klessti bifreið sinni, sem var hlaðin sprengiefnum, á lögreglustöð. Þetta kom fram í yfirlýsingum frá sjúkrahúsum og lögreglu á svæðinu. Vitni sögðu að hús í nágrenninu hefðu hrunið og að margir væru enn fastir í rústunum.

Tíu teknir fyrir hraðaakstur í vetrarfærðinni

Tíu ökumenn voru teknir fyrir hraðakstur í vetrarfærðinni í umdæmi lögreglunnar á höfuðborgarsvæðinu í gær. Langflestir mældust á yfir eitt hundrað kílómetra hraða.

Magnús Magnússon jarðsunginn í Skotlandi

Sjónvarpsmaðurinn Magnús Magnússon var jarðsunginn frá Baldernock-kirkju í heimabæ sínum Milngavie í Skotlandi nú skömmu fyrir hádegi. Magnús lést á heimili sínu sunnudaginn 7. janúar síðastliðinn, 77 ára að aldri.

Vill takmarka ræðutíma alþingismanna

Forseti Alþingis vill að takmarkanir verði settar á ræðutíma alþingismanna. Sólveig Pétursdóttir segir að ótakmarkaður ræðutími þekkist almennt ekki í þjóðþingum nágrannalanda.

Guðjón styður Magnús Þór

Formaður Frjálslynda flokksins lýsir yfir stuðningi við sitjandi varaformann, Magnús Þór Hafsteinsson. Margrét Sverrisdóttir, fyrrverandi framkvæmdastjóri flokksins, bauð sig fram til varaformanns í gærkvöldi.