Stjórnarandstaðan undrast orð Sólveigar

Þingmenn stjórnarandstöðunnar lýstu í dag yfir undrun sinni yfir orðum Sólveigar Pétursdóttur, forseta þingsins, í hádegisfréttum Stöðvar 2 og Bylgjunnar í dag. Þar sagðist Sólveig vilja breyta þingsköpum á þann hátt að takmarkanir yrðu settar á ræðutíma alþingismanna. Slíkt væri gert í nágrannaríkjunum.

Þingmenn stjórnarandstöðunnar bentu á að þeir væru reiðubúnir til að taka þingsköpin til athugunar og þá í heild sinni, meðal annars til að auka ráðherraábyrgð og hlut rannsóknarnefnda á þingi.

Sakaði Lúðvík Bergvinsson, þingmaður Samfylkingarinnar, forseta þingsins um að taka þingsköpin úr sambandi með því að ryðja öllum öðrum þingmálum en frumvarpi um hlutafélagavæðingu RÚV í burtu.

Í umræðum um fundarstjórn forseta kvörtuðu stjórnarandstöðuþingmenn undan því að Sólveig væri ekki viðstödd umræðuna en fram kom í máli Rannveigar Guðmundsdóttur, starfandi forseta, að Sólveig væri að störfum utan þinghúss.

Í umræðunum um ræðutíma þingmanna benti Jóhanna Sigurðardóttir, þingmaður Samfylkingarinnar, á að um væri að ræða eina tækið sem stjórnarandstaðan hefði í ræðustól ef hún teldi gengið á rétt sinn. Samfylkingin væri þó tilbúin að skoða þingsköpin en þá í heild. Undir það tók flokksbróðir hennar, Lúðvík Bergvinsson, og sagði að tryggja yrði að þingið yrði afl í þrískiptingu ríkisvaldsins en ekki verkfæri í höndum ríkisstjórnarinnar.

Ögmundur Jónasson, þingmaður Vinstri - grænna, tók undir með Samfylkingarþingmönnum að vert væri að endurskoða þingsköpin en þá yrði að skoða málið heildstætt en ekki með það í huga að veikja stöðu stjórnarandstöðunnar.

Þriðja umræða um RÚV-frumvarpið hófst skömmu fyrir hádegi en hlé var gert á henni í hálftíma vegna matarhlés þingmanna.