Lagt til að Hafnarfjarðarbær styrki Sól í straumi

Lagt var til á fundi bæjarráðs Hafnarfjarðar í gær að bæjarstjórnin veiti samtökunum Sól í straumi átta milljón króna styrk vegna framtaks þeirra í tengslum við stækkun álversins í Straumsvík. Samtökin, sem eru þverpólitísk, eru á móti stækkun álversins.

Ósætti meðal ungra sjálfstæðismanna vegna veitingu frelsisverðlauna

Ungir sjálfstæðismenn í Fjarðabyggð styðja ekki veitingu Samband ungra sjálfstæðismanna á frelsisverðlaunum SUS til Andra Snæs Magnússonar.

Átök eftir föstudagsbænir í Bagdad

Hópur vígamanna sem grunað er að hafi verið sjíamúslimar réðust til atlögu á súnnímosku þegar föstudagsbænum var að ljúka í Bagdad í dag. Tveir verðir sem vörnuðu þeim inngöngu særðust í árásinni en enginn særðist alvarlega. Mennirnir virtu að vettugi vikulegt bílabann í kringum föstudagsbænir á götum Bagdad.

Al-Kaída-menn sagðir í Pakistan

Leiðtogar al-Kaída hryðjuverkanetsins hafast við í Pakistan og þaðan vinna þeir að því að styrkja samtökin um allan heim. Þetta er mat Johns Negroponte, yfirmanns leyniþjónustustofnana Bandaríkjanna og verðandi aðstoðarutanríkisráðherra.

Fjarskiptasamband Háskóla Íslands rofnar ekki

Fjarskiptasamband Háskóla Íslands, Landspítala-háskólasjúkrahús og annarra stofnana rofnar ekki á meðan viðgerð stendur yfir á CANTAT-3 sæstrengnum.

Flugskeyti skotið að bandarísku sendiráði

Talið er að öfgasinnaðir vinstrimenn hafi verið að verki þegar flugskeyti var skotið að sendiráði Bandaríkjanna í Aþenu í Grikklandi í morgun. Enginn særðist í árásinni.

Lofar reiðum hermönnum bættum aðstæðum

Tony Blair, forsætisráðherra Bretlands, lofaði í dag að bæta aðstæður hermanna í Bretlandi um leið og hann sagði hermönnum að þeir yrðu að halda áfram að berjast til þess að Bretar töpuðu ekki áhrifum sínum á alþjóðavísu. Þetta var í fyrsta skipti sem forsætisráðherrann viðurkennir reiði hermanna og lofar að bregðast við.

Bensínverð lækkar í kjölfar lækkunar á heimsmarkaðsverði

Olíuverð hélt áfram á lækka á heimsmarkaði í gær og í morgun lækkaði ESSO bensínlítrann hér á landi, fyrst olíufélaganna. Atlantsolía fylgdi í kjölfarið. FÍB segir að olíufélögin hafi hækkað álagningu um rösk átta prósent í fyrra.

Neyðarrennibraut losnaði úr hólfi vélar Icelandair

Verið er að rannsaka hvað olli því að neyðarrennibraut fyrir farþega losnaði úr hólfi við neyðarútgang yfir væng á flugvél Icelandair skömmu fyrir lendingu á Kastrup-flugvelli í Kaupmannahöfn síðdegis í gær.

Jafet gefur kost á sér til formanns KSÍ

Jafet S. Ólafsson, fyrrverandi framkvæmdastjóri Verðbréfastofunnar og Íslenska útvarpsfélagsins, hefur ákveðið að gefa kost á sér í kosningu til formanns KSÍ á ársþingi sambandsins sem haldið verður þann 10. febrúar næstkomandi. Þetta kemur fram í tilkynningu frá honum.

Geir segir umræðu um evruna á villigötum

Geir H. Haarde, forsætisráðherra, segir umræðu um evru og stöðu krónunnar á villigötum og í raun fjarstæðukennda. Nefnd ríkisstjórnarinnar undir forystu dómsmálaráðherra um stöðu Íslands gagnvart Evrópusambandinu skilar skýrslu á næstu vikum.

Góð vetrarfærð og greiðfært í borginni

Góð vetrarfærð er á landinu og greiðfært um höfuðborgarsvæðið þrátt fyrir snjóinn sem kyngdi niður í nótt.

Óttast að sprengja nótina vegna mikillar síldar

Síldveiðiskipið Krossey er komið til Grundarfjarðar til að kasta á síldina þar en hún er svo þétt að skipstjórinn óttast að sprengja nótina. Sérfræðingar Hafrannsóknarstofnunar eru komnir á staðinn til að rannsaka þetta náttúrufyrirbrigði.

Mikilvægt að fylgjast með verðþróun á matvörumarkaði

Alþýðusamband Íslands segir mikla hækkun á matar- og drykkjarvörum á milli desember og janúar valda nokkrum áhyggjum og ýta enn undir mikilvægi þess að fylgjast vel með þróun á þeim markaði á næstu mánuðum í aðdraganda aðgerða til lækkunar á matvöruverði.

Karlmenn 30 milljónum fleiri en konurnar

Fullorðnir kínverskir karlmenn verða 30 milljónum fleiri en konur á sama aldri innan 15 ára. Þetta orsakast af strangri stefnu stjórnvalda til að ná tökum á fólksfjölgun í Kína, með því að takmarka barneignir við eitt barn á hvert par. Kynbundnar fóstureyðingar hafa verið stundaðar markvisst síðan þá.

Segja 70 hirðingja hafa verið drepna í loftárásum í Sómalíu

Bresku hjálparsamtökin Oxfam greindu frá því í dag að 70 hirðingjar hefðu verið drepnir í loftárásum sem átti að beina gegn íslamistum í Suður-Sómalíu á síðustu dögum.

Farsímasamband á öllum Hringveginum eftir ár

Farsímasamband verður á öllum Hringveginum eftir eitt ár. Fjarskiptasjóður og Síminn skrifuðu í dag undir samkomulag um að Síminn taki að sér verkefni við uppbyggingu GSM-farsímakerfisins.

Ríflega 18 milljónir lítra af áfengi seldar í fyrra

18,4 milljónir lítra af áfengi seldust í vínbúðunum ÁTVR í fyrra og jókst salan um rúm sjö prósent á milli ára. Fram kemur á vef ÁTVR að langmestur hluti þess hafi verið bjór, eða ríflega 14 milljónir lítra og jókst sala á honum um átta prósent.

Nóbelsverðlaunahafi vill ekki stjórna landinu

Mohammed Yunus, sem deildi friðarverðlaunum Nóbels með smálánabankanum Grameen sem hann stofnaði, hefur afþakkað að taka við leiðtogasæti í bráðabirgðastjórn heimalands síns Bangladesh. Tilboðið barst Yunus eftir að forseti landsins vék úr forsætisráðherraembætti í bráðabirgðastjórn landsins.

Ungir piltar viðurkenndu fjögur innbrot

Fjórir piltar á aldrinum fimmtán til sautján ára hafa viðurkennt að hafa framið fjögur innbrot í söluturna í Hafnarfirði. Innbrotin voru fram á tímabilinu 25. desember til 10. janúar. Piltarnir játuðu líka að haf brotið rúður í Flensborgarskóla.

Hópflótti af Llitla-Hrauni

Sunnlenska fréttablaðið greinir frá því að starfsmannaflótti sé yfirvofandi á Litla-Hrauni þar sem fangaverðir séu afar óánægðir með kjör sín. Haft er eftir talsmanni fangavarða í blaðinu að erfitt sé að fá fólk til afleysingastarfa á þeim kjörum sem í boði eru og hætta sé á að fangaverðir hverfi til annarra og betur launaðra starfa.

FÍB segir meðalálagningu á bensín hafa hækkað um 8,6 prósent

Olíufélögin hækkuðu meðalálagningu á bensín um 8,6 prósent á árinu 2006 samanborið við álagninguna 2005 eftir því sem Félag íslenskra bifreiða eigenda greinir frá. FÍB bendir enn fremur á að íslenskir neytendur hafi að meðaltali borgað ríflega tveimur krónum meira fyrir hvern lítra af bensíni í fyrra en árið 2005 en rúmri krónu meira fyrir dísillítrann.

Bandaríkjamenn handtaka sex Írani

Íraski herinn skýrði frá því í kvöld að alþjóðlegt herlið undir forystu Bandaríkjamanna hneppti í dag sex Írana í varðhald eftir að hafa ráðist á ræðismannsskrifstofu Írans í borginni Irbil. Bandaríski herinn sagðist hafa handtekið sex manns á sama svæði en minntist ekkert Írana eða ræðismannsskrifstofu.

Prestur dæmdur til dauða

Hæstiréttur í Nígeríu hefur dæmt prest til dauða fyrir að hafa brennt sex konur en ein af þeim lést af sárum sínum á sjúkrahúsi. Presturinn, sem kallaður er séra Kóngur, var fundinn sekur um fimm morðtilraunir og eitt morð.

Bloggarar metnir til jafns við fjölmiðla

Réttaryfirvöld í Washington í Bandaríkjunum hafa ákveðið að leyfa bloggurum að fylgjast með réttarhöldunum yfir Lewis Libby, fyrrum aðstoðarmanni Dick Cheney, til jafns við hefðbundna fjölmiðla. Munu þeir fá alls fjögur sæti við réttarhöldin en búist er við því að Cheney eigi eftir að bera vitni við þau.

Samúræji til bjargar!

Lögreglan í bænum South Shields í Bretlandi er að reyna að hafa upp á dularfullum samúræja sem birtist upp úr þurru og hjálpaði tveimur lögreglumönnum að verjast þremur vopnuðum glæpamönnum og handtaka þá. Dularfulli samúræjinn hvarf síðan út í næturmyrkrið, sporlaust.

Klósettfiskabúr?

Þeir sem ætla sér að endurnýja baðherbergið hjá sér á næstunni gætu haft áhuga á því nýjasta í bransanum, klósett sem er líka fiskabúr. Klósettið, sem á frummálinu er kallað „Fish 'n Flush“, er gegnsætt og samanstendur af vatnskassa og fiskabúri.

Átök í Líbanon

Vígamenn múslima og líbanskar hersveitir börðust í dag í suðurhluta Líbanon og þurftu hundruð manna að flýja heimili sín vegna þess. Hefur fólkið meðal annars leitað sér hælis í moskum nálægt heimilum sínum. Samkvæmt heimildum meiddust tveir hermenn þegar á þá var skotið við leit í bíl og varð það upphafið að átökunum.

NATO banar 150 talibönum

Norðuratlantshafsbandalagið (NATO) skýrði frá því í dag að það hefði banað allt að 150 vígamönnum talibana í bardögum í austurhluta Afganistan síðastliðna daga. Herlið frá Pakistan hjálpaði til við undirbúning bardagans.

Bangladesh frestar kosningum

Yfirvöld í Bangladesh hafa frestað umdeildum kosningum sem áttu að fara fram þann 22. janúar næstkomandi þar sem forseti millibilsstjórnar landsins sagði af sér í dag. Ástæðan fyrir afsögn hans er talin vera mikil gagnrýni á hann fyrir að undirbúa kosningarnar ekki nógu vel en talið er að afsögn hans eigi eftir að draga úr óstöðugleika í landinu.

Refsiaðgerðir hafa ekki áhrif á Íran

Yfirmaður leyniþjónustna Bandaríkjanna, John Negroponte, sagði í ræðu í öldungadeild Bandaríska þingsins í kvöld að Íran gæti staðið af sér þær efnhagsþvinganir sem alþjóðasamfélagið hefur sett á landið. Bandaríkjastórn bindur einmitt vonir við hið andstæða, nefnilega að Íran eigi eftir að láta undan þrýstingnum og hætta við kjarnorkuverkefni sín.

Þingið rýmkar lög um stofnfrumurannsóknir

Bandaríska þingið, sem nú er undir stjórn demókrata, greiddi í dag atkvæði með þeirri tillögu að aflétta takmörkunum á fjármögnun stofnfrumurannsókna sem George W. Bush, forseti Bandaríkjanna, hafði áður sett.

Gates segir aukninguna til skamms tíma

Varnarmálaráðherra Bandaríkjanna, Robert Gates, sagði við fréttamenn í dag að hann búist við því að aukningin á hermönnum í Írak myndi aðeins vara í nokkra mánuði fremur en ár.

Búist við árekstri skips og borpalls í Norðursjó

Björgunarsveitir þurfa að sækja starfsmenn olíuborpalls á Norðursjó þar sem stjórnlaust skip er við það rekast á hann samkvæmt fréttum frá strandgæslunni í Bretlandi. Alls voru 30 starfsmenn á borpallinum og er þegar búið að flytja 20 þeirra í land með þyrlum.

Stór skjálftahrina fyrir utan Siglufjörð

Stór jarðskjálftahrina fór í gang um 30 kílómetra norður fyrir Siglufirði klukkan hálfsex í kvöld. Entist hún í rúman klukkutíma og urðu skjálftarnir 17 talsins og þar af voru fimm þeirra 3 á Richter. Ragnar Stefánsson jarðskjálftafræðingur sagði í samtali við fréttamann Vísis að ekki væri óalgengt að svona hrina yrði á nokkura ára fresti á þessum stað.

Fimm ár frá því Guantanamo-búðirnar tóku til starfa

Fimm ár eru liðin frá því að fyrstu fangarnir komu til fangabúða Bandaríkjamanna við Guantanamo-flóa á Kúbu vegna gruns um aðild að hryðjuverkum. Af þessu tilefni efndi Íslandsdeild Amnesty International til útifundar á Lækjartorgi nú síðdegis.

Spilaði frá sér fjölskylduna

Tæpleg fertugur spilafíkill spilaði frá sér tvær eiginkonur. Hann hætti að spila fyrir fjórum árum en skuldar yfir fimmtán milljónir króna og er með ónýtt nafn í bönkunum.

Ruddust inn á ræðismannsskrifstofurnar

Bandaríska ríkisstjórnin ætlar að fjölga í herliði sínu í Írak um rösklega tuttugu þúsund manns á næstu vikum í þeirri von að þar með dragi úr ofbeldinu í landinu. Hersveitir Bandaríkjamanna réðust inn í ræðismannsskrifstofur Írans í bænum Irbil í Norður-Írak í dag.

Sveitarfélögin fari varlega í að ryðja burt skógræktarsvæðum

Sveitarfélögin á höfuðborgarsvæðinu verða að íhuga það mjög vel hvort það sé þess virði að ryðja burt skógræktarsvæðum til að fá nýtt byggingarland. Þetta segir bæjarstjórinn í Garðabæ, sem jafnframt er formaður Samtaka sveitarfélaga á höfuðborgarsvæðinu.

Pólitísk viljayfirlýsing um að þróa öryggissamstarf Íslendinga og Dana

Samkomulag íslenskra og danskra stjórnvalda, sem undirritað var í dag, um aukið samstarf Landhelgisgæslunnar og danska sjóhersins, er að mati Björns Bjarnasonar dómsmálaráðherra pólitísk viljayfirlýsing um að þróa samstarf þjóðanna í þágu aukins öryggis borgaranna.

Tugmilljóna tjón á flugvél Flugstoða

Tugmilljóna tjón varð þegar flugvél Flugmálastjórnar, nú Flugstoða, hlekktist á í flugtaki á Reykjavíkurflugvelli í hádeginu í dag. Flugstjórinn hætti við flugtak þegar hann varð þess var að flugvélin lét ekki að stjórn. Báðir spaðar vélarinnar skemmdust sem og hjólabúnaður og skrokkur.

Síldin drap þorskinn

Þorskeldisfyrirtæki á Grundarfirði missti allan þorsk í kerjum sínum, um 20 tonn, vegna stórgöngu síldar inn í fjörðinn. Leiða menn líkur að því að síldargangan hafi valdið súrefnisskorti í sjónum í firðinum og því hafi þorskurinn drepist.

Engin hætta á ferðum í Lundúnum

Pakkinn sem varð til þess að breska lögreglan lokaði fjölfarinni götu í miðborg Lundúna í dag var ekki hættulegur. Lögregla rannsakaði málið og komst að því að ekki var um sprengju eða annað slíkt að ræða og var hann því fjarlægður og er nú verið að opna götuna á ný.

Þriðjungur heyrnarlausra beittur kynferðislegu ofbeldi

Í nýrri könnun sem var gerð á meðal heyrnarlausra á Íslandi sagðist þriðjungur svarenda hafa verið beittur kynferðislegu ofbeldi. Eru þetta að minnsta kosti 30 einstaklingar. Félag heyrnarlausra lét gera könnunina með stuðningi félagsmálaráðuneytisins en Ráðgjöf og greining annaðist gerð hennar.

Björgunarsveitir í viðbragðsstöðu vegna ófærðar

Snjó hefur haldið áfram að kyngja niður á höfuðborgarsvæðinu síðdegis og hálka er mikil. Björgunarsveitir á suðvesturhorninu eru í viðbragðsstöðu. Færð gæti tekið að spillast og skyggni orðið mjög slæmt í skafrenningi fljótlega, því vindur er að aukast og mjöllin er létt. Sigðurður Þ. Ragnarsson á Veðurstofu Stöðvar 2, segir að vindur gæti verið kominn upp í 13-18 m/sek á áttunda tímanum í kvöld við Faxaflóa, um Snæfellsnes og austur um Hellisheiði. Hvassviðrið geti síðan staðið fram eftir nóttu, en lægt með morgninum.