Hákarl ræðst á konu í S-Afríku

Óttast er að kona á áttræðisaldri hafi látið lífið í hákarlsárás á strandlengju í Suður Afríku um helgina. Ekkert hefur spurst til konunnar, en vitni segja að hvítháfur hafi ráðist á hana. Sé saga sjónarvotta rétt, verður að teljast ólíklegt að konan hafi lifað árásina af, en hún var að synda þegar hákarlinn lét til skarar skríða.

Powell segir af sér

Colin Powell, utanríkisráðherra Bandaríkjanna, hefur sagt af sér embætti. Búist er við að Hvíta húsið tilkynni um þetta á næstu mínútum. Davíð Oddsson, utanríkisráðherra, átti að funda með Powell á morgun en ljóst er að sá fundur er í óvissu. Powell segist ætla að halda störfum áfram þar til fundinn hefur verið eftirmaður.

SAMFOK mótmæla aðgerðum kennara

Stjórn sambands foreldrafélaga og foreldraráða í grunnskólum Reykjavíkur, hefur sent frá sér yfirlýsingu þar sem miklum vonbrigðum er lýst með ákvörðun kennara í grunnskólum Reykjavíkur um að mæta ekki til vinnu í dag og með því virða nýsamþykkt lög og velferð grunnskólabarna að vettugi.

Fræðsluráð fer fram á lagfæringu

Fræðsluráð Reykjavíkur ályktaði í dag einróma að skólastjórar leituðust við að hafa eðlilegt skólastarf á morgun eftir föngum og börnum yrði tryggð vist í skólanum. Á fundi fræðsluráðs var lagt fram yfirlit um forföll og kennslu í grunnskólum Reykjavíkur í morgun og kom fram að á milli 15- 20% kennara hafi verið mættir til kennslu.

Hvetja sveitastjórnir til aðgerða

Heimili og skóli - landssamtök foreldra hvetja sveitarstjórnir að leita allra leiða til þess að tryggja að kennarar mæti til starfa á morgun. Samtökin hvetja sveitarfélögin til að koma betur til móts við kröfur kennara, en gert hafi verið.

9 mánuðir fyrir fjárdrátt

Héraðsdómur Reykjavíkur dæmdi í dag 35 ára karlmann til 9 mánaða fangelsis, þar af 6 mánaða skilorðsbundið, fyrir að hafa dregið að sér tæpar 900 þúsund krónur, þegar hann starfaði sem lögreglufulltrúi við ávana- og fíkniefnadeild lögreglunnar í Reykjavík. <font size="4"></font>

Fjórir segja af sér

Fjórir ráðherrar í Bandaríkjastjórn hafa sagt af sér. Auk Colins Powell, utanríkisráðherra, hafa þau Rod Paige, menntamálaráðherra, Ann Veneman landbúnaðarráðherra og Spencer Abraham, orkumálaráðherra sagt af sér embætti. Davíð Oddsson, utanríkisráðherra, átti að funda með Powell á morgun en ljóst er að sá fundur er í óvissu.

Vill að börnum sé sýn virðing

Umboðsmaður barna hefur sent frá sér tilkynningu, Þar sem mæst er til þess við grunnskólakennara að þeir sýni börnum þessa lands virðingu með því að mæta þegar í stað til vinnu sinnar í grunnskólum, eins og lög bjóða. Börn séu skólaskyld og þau eigi stjórnarskrárvarinn rétt til menntunar og fræðslu.

Hneykslismál loks fyrir dóm

Eitt mesta hneykslismál síðari tíma í frönskum stjórnmálum komst loks í dómssali landsins í dag. Fjöldi undirmanna þáverandi forseta Frakklands, Francois Mitterand, eru ákærðir fyrir hleranir á símum meira en 50 stjórnmálamanna, lögfræðinga og fréttamanna.

Uppsögnin breytir litlu

Til stóð að Colin Powell, utanríkisráðherra Bandaríkjanna, færi til Palestínu í næstu viku til viðræðna við nýja stjórn landsins. Powell hugðist ræða við leiðtoga PLO, Mahmoud Abbas, sem og forsætisráðherrann Ahmed Qurei. Óvíst er hvort af þeim fundi verður.

Mun funda með Powell á morgun

Davíð Oddsson, utanríkisráðherra mun funda með Colin Powell á morgun, þrátt fyrir uppsögn Powells. Powell ætlar að halda störfum áfram þar til eftirmaður hans finnst og fréttastofan hefur fengið það staðfest að af fundinum verði, enda líklegt að töluverður tími líði uns eftirmaður Powell hefur störf.

Ekki aðalatriði hver persónan er

Fundur Davíðs Oddssonar utanríkisráðherra og Powells um varnarmál Íslands annað kvöld að íslenskum tíma er að sögn aðstoðarmanns Davíðs, Illuga Gunnarssonar, í samræmi við það verkferli sem Bush Bandaríkjaforseti hefur ákveðið. Aðalatriðið sé ekki hvaða persóna gegni embætti utanríkisráðherra heldur að fylgt sé þeirri áætlun sem fyrir liggi.

Meirihluti vill inn

Samkvæmt nýrri skoðanakönnun í Noregi, sem gerð var fyrir norska Ríkisútvarpið og Aftenposten, segist meira en helmingur Norðmanna vilja ganga í Evrópusambandið.

Tæpur þriðjungur sendiherra heima

Fram kom í svari Davíðs Oddssonar utanríkisráðherra við fyrirspurn Sigurjóns Þórðarsonar á alþingi um sendiherra Íslendinga hér starfa 34 sendiherrar. Tuttugu þeirra starfa erlendis. Þar með er talinn Þorsteinn Ingólfsson sem er í leyfi.

Útsvarið í hámark

Á fundi borgarstjórnar Reykjavíkur í dag verður lagt til að útsvarsprósenta næsta árs verði 13,03 prósent, í stað 12,7 prósenta nú. Ef það verður samþykkt verða útsvarsgreiðslur í Reykjavík samkvæmt hámarks útsvarsprósentu.

Ferðin var óþörf

Yfirmannaskipti verða á flugvellinum í Kabúl á miðvikudag. Hallgrímur Sigurðsson hverfur þá frá störfum og kemur til Íslands. Hann lauk teppakaupum sínum á flugvellinum á meðan undirmenn hans lágu í sárum á sjúkrahúsi.

Hætt kominn eftir hnífsstungu

Maður á fertugsaldri var hætt komin þegar hann var stunginn í bakið í heimahúsi á Kleppsvegi í gær. Kona á svipuðum aldri var handtekin, grunuð um verknaðinn, en hún var yfirheyrð í dag. Hnífsblaðið gekk í gegnum hægra herðablað mannsins með þeim afleiðingum að lungað féll saman.

Bardagar halda áfram

Þótt Bandaríkjamenn segist hafa náð borginni Falluja á sitt vald, má búast við því að bardagar haldi áfram þónokkuð ennþá. Stór hluti borgarinnar er í rúst, eftir átökin.

Fundur þrátt fyrir uppsögn

Colin Powell hefur sagt af sér sem utanríkisráðherra Bandaríkjanna, en mun gegna embættinu áfram þar til eftirmaður er fundinn. Davíð Oddsson, forsætisráðherra á fund með Powell á morgun.

Ekki kennt í Öskjuhlíðaskóla

Og á fundi fræðslustjóra í Reykjavík og skólastjórnenda í borginni, sem lauk nú rétt fyrir fréttir, kom fram að það sé eindreginn vilji og ætlan skólastjórnenda að halda uppi skólastarfi á morgun samkvæmt stundarskrá í öllum bekkjum. Undantekning er skólastarf í Safarmýrarskóla og Öskjuhlíðarskóla.

Fyrsta lota í lokaviku viðræðna

Ríkissáttasemjari segir að fyrsta lota í síðustu viku viðræðna samninganefnda kennara og sveitarfélaganna snúist um að reyna að ná einhverri niðustöðu um heildarsamning.

Setið um vel launuð störf

Erfiðlega gæti gengið að fá vinnu fyrir þá kennara sem vilja skipta um starfsvettvang. "Vinnumarkaðurinn er þungur," segir Gunnar Richardsson, deildarstjóri vinnumiðlunarsviðs hjá Svæðisvinnumiðlun höfuðborgarsvæðisins.

Ekki brugðist við forfalli kennara

Fjórir af tæplega þrjátíu kennurum mættu til starfa í Réttarholtsskóla í gær. Hilmar Hilmarsson skólastjóri segir kennara hafa tilkynnt veikindi.

Eiga 360 milljónir í sjóðnum

Hver klukkustund í verkfalli grunnskólakennara kostaði vinnudeilusjóð Kennarasambands Íslands hálfa milljón króna. Um 380 milljónir eru í verkfallsjóðnum.

Fá bæturnar greiddar

Úrskurðarnefnd atvinnuleysisbóta felldi úr gildi ákvörðun úthlutunarnefndar um niðurfellingu bóta til atvinnulausra kennara. Kennurunum hafði verið gert að sækja bætur í vinnudeilusjóð kennara þrátt fyrir að hafa ekki starfað við kennslu þegar verkfallið hófst.

Segist hafa fundið Atlantis

Bandarískur verkfræðingur sem hefur leitað hins horfna meginlands, Atlantis, í tíu ár, segist nú loksins hafa fundið það. Samkvæmt þjóðsögunni sem meðal annars er byggð á skrifum gríska heimspekingsins Platós, var Atlantis háþróað menningarþjóðfélag sem sökk í sæ, þegar guðirnir reiddust íbúunum fyrir græðgi þeirra.

Bjóðast til viðræðna um brotthvarf

Ísraelar buðust í gær til þess að hafa samráð við Palestínumenn um brotthvarf sitt frá landtökubyggðum á Gazasvæðinu gegn því að palestínska heimastjórnin beitti sér gegn hópum herskárra Palestínumanna. Palestínumenn sögðu best að Ísraelar hæfu friðarviðræður á nýjan leik án þess að skilyrða það með einhverjum hætti.

Íranar hætta auðgun úrans

Íranar hafa heitið því að hætta auðgun úrans meðan þeir semja við Evrópuríki um lausn á deilum um kjarnorkuáætlun þeirra. Óvíst er þó hvort þetta sé til frambúðar því það ræðst af niðurstöðum viðræðna við Evrópuríkin.

Dóttir keisarans trúlofast

Einkadóttir japönsku keisarahjónanna mun tilkynna um trúlofun sína á næstu vikum. Unnustinn er almúgamaður og því missir prinsessan alla sína konunglegu titla. Sayako prinsssa er 35 ára gömul og fuglafræðingur að mennt. Hún starfar á rannsóknarstofu, í grennd við Tokyo, og hefur meðal annars rannsakað veirur sem valda hinni svokölluðu fulgflensu.

Samkynhneigðir fái aukin réttindi

"Samkynhneigð pör ættu að njóta meiri réttinda en nú er en það er langt í að stjórnvöld leggi til að hjónabönd samkynhneigðra verði lögleidd," sagði Bertie Ahern, forsætisráðherra Írlands.

Lögreglumaður dæmdur í fangelsi

Hallur Hilmarsson, fyrrum fíkniefnalögreglumaður, var í Héraðsdómi Reykjavíkur í gær, dæmdur í níu mánaða fangelsi fyrir fjárdrátt og brot í opinberu starfi. Hann dró sér 870 þúsund krónur sem lögreglan hafði tekið við rannsókn fíkniefnamáls. Hallur var næstráðandi í fíkniefnadeildinni í Reykjavík þegar hann braut af sér.

Abbas verður forsetaefni Fatah

Mahmoud Abbas, fyrrum forsætisráðherra Palestínu, verður forsetaefni Fatah í forsetakosningunum í Palestínu. Þetta sagði Nabil Shaath, utanríkisráðherra palestínsku heimastjórnarinnar. Hann sagði samhug um þetta innan hreyfingarinnar og ætti í raun aðeins eftir að staðfesta þetta með formlegum hætti.

Viðræður í skugga afsagnar

Óvíst er hvaða áhrif afsögn Colins Powells, utanríkisráðherra Bandaríkjanna hefur á viðræður Íslendinga og Bandaríkjamanna um framtíð varnarliðsins á Keflavíkurflugvelli. Búist er við að afsögn Powells taki ekki gildi fyrr en á næsta ári.

Hrakin af heimilum sínum með valdi

Ein kona slasaðist og var borin alblóðug út af heimili sínu þegar til átaka kom í Peking. Hundrað lögreglumenn og fjöldi aðstoðarmanna þeirra báru fólk út af heimilum sínum svo rífa mætti húsin og byggja fjölbýlishús í þeirra stað.

Hasslyktin kom upp um þá

Fíkniefni fundust í bíl þriggja pilta, sautján og átján ára að aldri, í Grundarfirði í fyrrakvöld.

Kennarar fari að lögum

Halldór Ásgrímsson, forsætisráðherra sagði á Alþingi í gær að hann vænti þess að kennarar fari að lögum: "Það kann vel að vera að mörgum líki ekki sá rammi sem Alþingi hefur sett um málið en það er nauðsynlegt að allir virði lögin."

Stakk mann í ölæði

35 ára kona hefur játað að hafa stungið sambýlismann sinn í bakið á Kleppsvegi um klukkan fjögur í fyrrinótt. Hann var fluttur á sjúkrahús eftir hnífsstunguna sem fór í herðablað hans og féll annað lunga hans saman.

Bardagar breiðast út

Bandarískar herþotur vörpuðu sprengjum á vígamenn í Baquba og Falluja í gær þar sem harðir bardagar geisuðu milli vígamanna annars vegar og bandarískra og íraskra hermanna hins vegar. Tugir manna féllu í bardögum sem hafa breiðst út um Írak í kjölfar árásarinnar á vígamenn í Falluja.<font face="Helv" color="#008080"></font>

Powell sagði af sér

Colin Powell lætur af starfi utanríkisráðherra Bandaríkjanna þegar George W. Bush Bandaríkjaforseti hefur valið eftirmann hans. Bush féllst í gær á afsagnarbeiðni Powell og þriggja annarra ráðherra, Ann Veneman sem fer með landbúnaðarmál, Spencer Abraham sem fer með orkumál og menntamálaráðherrans Rod Paige.

Borgaði með grínpeningaseðli

Kona sem var ákærð fyrir þjófnað verður ekki látin svara til saka eftir að hún greiddi aftur fyrir vörur sem hún keypti upphaflega með fölsuðum peningaseðli. Lögmaður hennar sagði að hún hefði ekki haft hugmynd um að 200 dollara seðillinn með mynd af núverandi Bandaríkjaforseta væri ekki löglegur gjaldmiðill.

Skólastarf lamað

Tugum þúsunda grunnskólabarna var snúið frá skólum sínum víða um land í morgun. Margir skólar voru lokaðir og starfsemin hálflömuð vegna fjarvista kennara. Grunnskólakennarar virtust svo harmi slegnir, vegna lagasetningar stjórnvalda, að þeir réðu ekki við að mæta til vinnu í morgun.

Framhaldið óljóst

Enn er á huldu hvort, hvar og hvenær skólastarf hefst á nýjan leik í grunnskólum landsins. Kennarar segjast munu taka ákvörðun um slíkt einn dag í senn og hver fyrir sig. Fræðsluyfirvöld binda þó vonir við að kennsla hefjist á morgun.

Hvetur kennara til að mæta

Forsætisráðherra hvatti kennara á Alþingi í dag til að fara að lögum. Sama gerði formaður Samfylkingarinnar. Staðan í kennaradeilunni kom til umræðu við upphaf þingfunda í dag þegar þingmaður Samfylkingarinnar, Björgvin G. Sigurðsson, innti menntamálaráðherra eftir því hvernig grunnskólabörnum yrði bættur skaði vegna tapaðra kennsludaga.

Stefnt að samningum innan 5 daga

Samninganefndir sveitarfélaga og grunnskólakennara stefna að því að ná samningum innan fimm daga, eða áður en deilan fer fyrir gerðardóm sem aðilar eru sammála um að sé slæmur kostur.

Besta orkuverð hér á landi

Orkuveita Reykjavíkur samdi við Norðurál um besta orkuverð til stóriðju sem fengist hefur hér á landi, staðhæfir Alfreð Þorsteinsson, stjórnarformaður Orkuveitunnar. Hann segir samninginn afar þýðingarmikinn fyrir atvinnulíf á höfuðborgarsvæðinu.