Bensínverð lækkar

Olíufélögin Essó og Olís lækkuðu bensínverð um eina krónu lítrann í gær í kjölfar þess að Atlantsolía lækkaði bensínverð í fyrradag og fór rétt niður fyrir hundrað krónur á lítrann.

Ákæra fjóra breska dáta

Fjórir breskir hermenn sem gegndu herskyldu í Írak verða dregnir fyrir herrétt ákærðir fyrir að beita fanga misþyrmingum. Að sögn ríkissaksóknarans, Goldsmith lávarðar, eru hermennirnir ákærðir fyrir árás og að neyða fanga til kynferðislegra athafna innbyrðis.

Fékk ekki að kæra

Konu var vísað frá með kæru á hendur manni sem auglýsti eftir starfskrafti í mötuneyti í vegavinnu en var í raun að leita að vændiskonu. Konan, sem ekki vildi láta nafns síns getið, hafði samband við lögreglun í gær vegna málsins en fékk þær upplýsingar að hún gæti ekki kært.

Dregið úr framleiðslutengingu

Í nýjum mjólkursamningi sem landbúnaðarráðuneytið hefur gert við kúabændur og tekur gildi á næsta ári er dregið úr framleiðslutengdum greiðslum. Að sögn Ólafs Friðrikssonar, skrifstofustjóra skrifstofu framleiðslu- og markaðsmála í Landbúnaðarráðuneytinu, er það að hluta til gert til að bregðast við kröfum sem viðbúið sé að komi frá Alþjóðaviðskiptastofnuninni

Staðfestir voðaskot

Krufningsskýrsla vegna voðaskots sem varð Ásgeiri Jónsteinssyni að bana á Selfossi um miðjan mars hefur borist lögreglunni á Selfossi. Ólafur Helgi Kjartansson, sýslumaður á Selfossi, segir að ekki verði annað ráðið að krufningsskýrslunni en að um voðaskot hafi verið að ræða.

Fann lík í ísskápnum

Breskur karlmaður fann sundurbútað lík af tengdadóttur sinni í ísskáp íbúðar hennar og sonar síns þegar hann ætlaði að sækja sér mjólk í teið sem hann var nýbúinn að laga sér. Maðurinn hafði komið við í íbúðinni til að heilsa upp á son sinn og tengdadóttur.

Fór yfir strikið

"Mín skoðun er að það hafi áhrif trúverðugleika forsætisráðherra þegar að það sem hann lætur hafa eftir sér sem slíkur er dæmt dautt og ómerkt," segir Sigríður Rut Júlíusdóttir, lögmaður Jóns Ólafssonar í meiðyrðamáli gegn Davíð Oddssyni. Ummæli Davíðs voru dæmd dauð og ómerk í Héraðsdómi Reykjavíkur í gær.

Rollur í rétti

Í Fáskrúðsfjarðarhreppi sem og í fleiri sveitarfélögum er lausafjárganga búfjár leyfð. Óskar Þór Guðmundsson, varðstjóri á Fáskrúðsfirði, segir að á annan tug sauðfjár hafi drepist í vor. "Á hverju ári verða miklar skemmdir á bílum," segir Óskar.

Hóta að pynta óbreyttan borgara

Lögregluyfirvöld í Sádí-Arabíu og bandaríski herinn leita nú að Bandaríkjamanni sem grunað er að hafi verið rænt af samtökum hliðhollum al-kaída um helgina.  Samkvæmt bandaríska sendiráðinu í Riyadh, höfuðborg Sádí-Arabíu, hefur ekkert hefur spurst af Paul Johnson, sem er 49 ára verkfræðingur, síðan á sunnudag.

Gæsluvarðhald móður framlengt

Héraðsdómur Reykjavíkur framlengdi í gær gæsluvarðhaldsúrskurð yfir móður sem grunuð er um að hafa banað dóttur sinni og sært son sinn með hnífi. 

Vantraust fellt þrisvar

Ísraelska ríkisstjórnin lifði af þrjár vantrauststillögur á þingi í gær, þar sem forysta Verkamannaflokksins - sem er í stjórnarandstöðu - ákvað að sitja hjá og veita stjórninni þar með öryggisnet.

Hindruðu sprengjuárás

Palestínumaður sem ísraelska leyniþjónustan hefur handtekið ætlaði sér að koma fyrir sprengju, annað hvort í embættissetri Ariels Sharons forsætisráðherra eða hverfi strangtrúaðra gyðinga í Jerúsalem. Í yfirlýsingu frá ísraelskum stjórnvöldum um þetta segir að hann hafi ekki verið búinn að taka ákvörðun um á hvorum staðnum hann ætlaði að láta til skarar skríða.

Indverji handtekinn

Lögregluyfirvöld á Indlandi yfirheyrðu í fyrradag indverskan viðskiptamann sem grunaður er um að hafa selt leynilegar upplýsingar um kjarnorkuáætlun Indverja. Maðurinn var framseldur til Indlands frá Sameinuðu arabísku furstadæmunum á laugardag en þar var hann handtekinn.

Forsætisráðuneytið svaraði ekki

Formaður þjóðhátíðarnefndar Reykjavíkurborgar segir það sérkennilega stjórnsýslu ef það ferst fyrir hjá forsætisráðuneytinu að svara erindum frá síðasta ári en borgin óskaði eftir samstarfi vegna þjóðhátíðardagsins í tengslum við aldarafmæli heimastjórnarinnar.

Ríflega sex þúsund gestir

Ríflega 6000 manns sóttu sýninguna Austurland 2004 sem lauk í íþróttamiðstöðinni á Egilsstöðum í fyrradag. Forsvarsmenn sýningarinnar eru að vonum hæstánægðir með aðsóknina, segjast þó hafa getað tekið á móti fleiri gestum, en eftirtekt sé að gestir stoppuðu lengi og komu jafnvel aftur.

Skipulagsbreytingar á Eimskipum

Unnið er að skipulagsbreytingum á Eimskipum sem meðal annars miða að því að samtvinna TVG-Zimsen og Flytjanda inn í heildarstarfsemi félagsins.

Nýr stjórnmálaflokkur stofnaður

Nýr stjórnmálaflokkur, Orkuflokkurinn, hefur verið stofnaður í Reykjavík, en markmið hans er að borin skuli virðing fyrir orkunni, bæði hlutlægri og óhlutlægri, eftir því sem haft er eftir stofnanda flokksins, Bjarna Þór Þorvaldssyni, á vefsíðu Morgunblaðsins.

Stálu 80 milljörðum

Markaðssvik bandaríska stórfyrirtækisins Enron á raforkumarkaði kostuðu viðskiptavini félagsins andvirði um 80 milljarða króna samkvæmt úttekt Snohomishsýslu.

Horfurnar ekki góðar

"Einungis tíminn getur leitt í ljós hvernig öryggismálum verður háttað í framtíðinni. En horfurnar eru ekki ýkja góðar," sagði Kofi Annan, framkvæmdastjóri Sameinuðu þjóðanna, í gær þegar hann var spurður út í hvort koma mætti öryggismálum í Írak í gott horf.

Ákæra fyrir líkamsárás þingfest

Ákæra gegn tveimur bræðrum fyrir alvarlega líkamsárás var þingfest fyrir Héraðsdómi Reykjavíkur í morgun. Bræðurnir, sem eru á þrítugsaldri, eru sakaðir um að hafa í ágústlok á síðasta ári ráðist að manni í Tryggvagötu í Reykjavík.

Ríkir verða ríkari

Þeir ríku verða sífellt ríkari samkvæmt nýútkominni skýrslu um fjölda forríkra á síðasta ári. Ríkum fjölgaði á heimsvísu í fyrra um hálfa milljón og teljast nú 7,7 milljónir manna um allan heim til hóps þeirra sem þykja hafa hátt nettóvirði. Aukningin var því 7,5% á milli ára.

Réttað yfir Saddam sem fyrst

Saddam Hússein verður afhentur írökskum yfirvöldum þann þrítugasta þessa mánaðar, að sögn væntanlegs forsætisráðherra, Iyads Allawis. Bandaríkjamenn hafa sagt að allir stríðsfangar verði færðir nýjum stjórnvöldum í Bagdad en hafa ekki tilgreint hvenær.

Mál sem brennur á kúabændum

Stofnuð hefur verið samstarfsnefnd Yfirdýralæknisembættisins, Bændasamtakanna og Rannsóknarstofnunar Landbúnaðarins, til að grafast fyrir um orsakir aukins kálfadauða hér á landi. Snorri Sigurðsson, framkvæmdastjóri Landssambands Kúabænda, segist vænta þess að einhverjar niðurstöður liggi fyrir frá nefndinni að loknum sumarleyfum.

Rangar ráðleggingar í 20 ár

"Sé litið yfir 20 ára feril hafa ráðleggingar Alþjóða hafrannsóknarráðsins yfirleitt reynst rangar, bæði hvað varðar Færeyjar, Ísland og Noreg, svo dæmi séu nefnd. Það er allt öfugu megin á hrossinu" sagði Jón Kristjánsson fiskifræðingur um tillögur Alþjóða hafrannsóknarráðsins sem ráðleggur Færeyingum að minnka veiðar á þorski og ýsu um 60% á næsta fiskveiðiári.

Ákærður fyrir þrjár líkamsárásir

Stefán Logi Sívarsson hefur verið ákærður af ríkissaksóknara fyrir þrjár líkamsárásir á tveimur dögum, þar af eina sérstaklega hættulega. Stefán var á reynslulausn þegar hann framdi árásirnar og reyndi lögreglan í Reykjavík án árangurs að fá hann úrskurðaðan í gæsluvarðhald eftir fyrstu árásina.</font /></b />

Má ekki klæðast íslömskum klæðum

Fimmtán ára gömul íslömsk stúlka, sem búsett er í Bretlandi, tapaði máli fyrir rétti í dag þar sem hún fór fram á að mega klæðast íslömskum klæðum í skólanum.

Vill rannsaka hvali við Ísland

Alþjóðadýraverndunarsjóðurinn, International Fund for Animal Welfare, hefur beðið í tæpa fimm mánuði eftir leyfi sjávarútvegsráðuneytis til að stunda rannsóknir á spendýrum við Íslandsstrendur. Sjávarútvegsráðuneytið ætlar að óska eftir frekari upplýsingum áður en leyfið verði veitt.

Siðanefnd fundar vegna Hannesar

Fundur var haldinn í siðanefnd Háskóla Íslands í morgun. Tilefnið var kæra aðstandenda Halldórs Laxness vegna fyrsta bindis ævisögu Hannesar Hólmsteins Gissurarsonar um Nóbelsskáldið. Þeir telja Hannes hafa brotið höfundarréttarlög og siðareglur Háskóla Íslands við ritun bókarinnar.

ÖBÍ leitar að tillögum

Þessa dagana leitar Arnþór Helgason, framkvæmdastjóri Öryrkjabandalags Íslands, að tilnefningum til aðgengisverðlauna samráðsvettvangs Norrænu ráðherranefndarinnar um málefni fatlaðra (NSH). Verðlaunaafhending NSH er árviss viðburður, en að þessu sinni er sjónum beint að upplýsingasamfélaginu.

Lengst allra í embætti

Enginn breskur stjórnmálamaður hefur setið lengur samfellt í stóli fjármálaráðherra en Gordon Brown. Í gær hafði hann gegnt embættinu í sjö ár og 44 daga.

Ný lög hefðu breytt öllu

"Ef vændisfrumvarpið svokallaða hefði farið í gegnum þingið, þá hefði refsiábyrgðinni verið snúið við og konan hefði getað kært," sagði Ágúst Ólafur Ágústsson alþingismaður um mál, þar sem konu var vísað frá með kæru á hendur manni sem auglýsti eftir starfskrafti en var í raun að leita að vændiskonu.

Sharon ekki ákærður

Ariel Sharon forsætisráðherra Ísraels verður ekki ákærður fyrir mútuhneyksli að sögn dómsmálaráðherra landsins, Menachem Mazuz. Málið snýst um meintar mútugreiðslur upp á hundruðir þúsunda Bandaríkjadala, sem sonur Sharons á að hafa fengið í lok síðasta áratugar frá ísraelskum kaupsýslumanni, og að Sharon hafi átt aðild að málinu.

Læknisþjónusta tryggð

Heilbrigðisstofnunin Patreksfirði og Heilsugæslan í Reykjavík og nágrenni hafa gert með sér samstarfssamning um læknisþjónustu sem gildir til tveggja ára. Samkvæmt samningnum verða læknar á vegum heilsugæslunnar starfandi við heilbrigðisstofnunina samkvæmt ákveðnu skipulagi.

KB banki sýknaður í Héraðsdómi

Kaupþing-Búnaðarbanki var í dag sýknaður af kröfu fyrrverandi vaktmanns í bankanum sem sagt var upp vegna gruns um að leka trúnaðarupplýsingum úr bankanum. Maðurinn lá undir grun um að hafa lekið upplýsingum til Norðurljósa um að Búnaðarbankinn ætti í viðræðum við aðila um yfirtöku á fyrirtækinu og að bankinn hafi þar rofið trúnað við Norðurljós.

Litarefni auka líkur á ofvirkni

Talið er að tilbúin litarefni og Benzoate rotvarnarefni í mat auki líkurnar á ofvirkni hjá ungum börnum. Sú er niðurstaða rannsóknar á hegðun 277 forskólabarna sem Dr. John O. Warner frá Southampton General Hospital í Bretlandi stjórnaði.

Nýr kjarasamningur samþykktur

Skipstjórnarmenn á flutningaskipum og farþegaskipum, 500 brúttótonn og stærri í millilandasiglingum og strandferðum, samþykktu nýjan kjarasamning sem undirritaður var með fyrirvara um samþykki hinn 11. maí síðastliðinn.

Truflanir á tölvupósti

Síminn Internet hefur á einum og hálfum sólarhring stöðvað um hálfa milljón vírussýktra tölvupóstskeyta sem send voru til viðskiptavina fyrirtækisins. Í tilkynningu fyrirtækisins kemur fram að starfsmenn Símans hafa sjaldan séð annað eins magn sýktra skeyta á jafn skömmum tíma.

Nýr forstjóri ráðinn

Jakob Óskar Sigurðsson hefur verið ráðinn forstjóri SÍF, en Örn Viðar Skúlason sem gegnt hefur stöðu forstjóra undangfarna mánuði tekur við sínbu fyrra starfi sem aðstoðarforstjóri. Jakob er með BS gráðu í efnafræði og MBA gráðu í fjármálstjórn, markaðsmálum og alþjóðaviðskiptum.

Síðasta yfirheyrslan

Hefðu orustuþotur getað komið í veg fyrir hryðjuverkaárásirnar 11. september 2001? Þetta er spurningin sem sjálfstæð rannsóknarnefnd sem hefur kannað árásirnar leitar svara við á fundi á morgun. Þá verður haldin síðasta opinbera yfirheyrslan í rannsókninni.

Mesti halli í sögunni

Fjórða mánuðinn í röð mældist viðskiptahalli Bandaríkjanna við útlönd meiri en hann hafði nokkru sinni áður mælst í sögunni. Viðskiptahallinn nam um 3.400 milljörðum króna í apríl, samkvæmt nýbirtum tölum.

Alvarlegir glæpir aukast í London

Lundúnalögreglan leggur nú á ráðin um að koma á fót sérstakri deild innan lögreglunnar til að sporna við sívaxandi tíðni alvarlegra glæpa sem framdir eru af fólki frá Suður-Asíu. Þrjátíu og átta morð voru framin í London af Suður-Asíubúum á síðasta ári sem er næstum fjórfalt meira en fyrir áratug.

Frekara rannsóknarstarf undirbúið

Stofnuð hefur verið samstarfsnefnd Yfirdýralæknisembættisins, Bændasamtakanna og Rannsóknastofnunar landbúnaðarins, til að grafast fyrir um orsakir aukins kálfadauða hér á landi.

Mat miðað við ákveðnar forsendur

"Við sem erum að vinna í þessum hefðbundnu vísindum erum að leggja fram mat okkar miðað við ákveðnar forsendur," sagði Einar Hjörleifsson fiskifræðingur hjá Hafrannsóknarstofnun um fram komna gagnrýni á ráðleggingar Alþjóða hafrannsóknarráðsins um samdrátt í fiskveiðum Færeyinga.

Fáir afpanta húsnæði

Fáir hafa afpantað sumarbústaðapláss í Húsafelli samkvæmt þeim upplýsingum sem Fréttablaðið fékk frá nokkrum stéttafélögum sem eiga búastaði þar. Ýmsir hafa þó hringt í stéttarfélög sín og kannað stöðu sína.

Fær al-Sadr pólitískt hlutverk?

George Bush forseti Bandaríkjanna segist ekki munu standa í vegi fyrir því að sjítaklerkurinn Moqtada al-Sadr fái pólitískt hlutverk í Írak eftir valdaskiptin síðar í mánuðinum. Al-Sadr hefur farið fyrir andspyrnuhreyfingunni sem barist hefur við hernámsliðið í landinu undanfarnar vikur og kallaði George Bush hann andlýðsræðissinnaðan óþokka á dögunum.