Skoraði tveimur dögum eftir jarðar­för móður sinnar

Hann hefur þótt sýna einstakan andlegan styrk en móðir hans féll frá í síðasta mánuði og var svo jörðuð á föstudag.

Anderson skoraði gegn Sunderland skömmu eftir fráfall móður sinnar og endurtók leikinn með jöfnunarmarki gegn Newcastle í gær. Aðeins tveimur dögum eftir jarðarförina.

„Þetta mark skipti mig miklu máli eftir allt sem á undan er gengið,“ sagði Anderson en stigið tryggði endanlega veru Forest í efstu deild.

Stjóri Forest, Vitor Pereira, jós Anderson lofi eftir leikinn.

„Þetta er búið að vera erfitt fyrir hann og allir í liðinu finna til með honum. Hann vildi heiðra minningu móður sinnar með því að spila og skilja allt eftir á vellinum. Hann vildi líka skora og hann hættir aldrei. Mjög hæfileikaríkur og sterkur karakter.“

Anderson hefur spilað sig inn í enska landsliðið á tímabilinu og mun örugglega fara með á HM í sumar. Hann er eðlilega orðinn eftirsóttur en bæði Manchester-liðin eru sögð vera með hann í sigtinu.