Von á mesta vindinum í marga mánuði

Á vef Veðurstofunnar segir að vindurinn um eða eftir hádegi á morgun verði allhvass eða hvass og sé nægur til að garðhúsgögn, trampólín eða aðrir lausir munir geti fokið.

Heilt yfir er um að ræða hvassasta vindinn sem komið hefur í mánuði og því er um að gera að ganga frá lausamunum sem enn eru úti eftir sumarið svo þeir fjúki ekki.

Dregur smám saman úr rigningu seint í dag og úr vindi í kvöld. Hiti 10 til 16 stig.

Gular viðvaranir eru í gildi á nær öllu landinu – nema á Vestfjörðum og á Breiðafirði – ýmist til hádegis eða fram á kvöld. Á höfuðborgarsvæðinu er gul viðvörun í gildi vegna hvassviðrisins milli 11 og 16. Svipaða sögu er að segja á Suðurlandi en viðrvaranir eru lengst í gildi á miðhálenginu og á norðaustanverðu landinu.

Minnkandi suðvestanátt á morgun, 5-10 m/s síðdegis. Dálítil væta á vestanverðu landinu, en lengst af þurrt austanlands. Hiti 10 til 15 stig.

Veðurhorfur á landinu næstu daga

Á laugardag: Suðvestan og vestan 5-13 m/s og skúrir, en lengst af þurrt á austanverðu landinu. Hiti 7 til 14 stig, hlýjast á Austurlandi.

Á sunnudag: Suðlæg átt 3-8 og bjartviðri, en 8-13 og stöku skúrir við suður- og vesturströndina. Vaxandi suðaustanátt um kvöldið. Hiti 7 til 12 stig.

Á mánudag: Suðaustan 13-20 og talsverð rigning, en 8-13 og þurrt á norðaustanverðu landinu. Hægari og úrkomuminna um kvöldið. Hiti 8 til 14 stig, hlýjast á Norðausturlandi.

Á þriðjudag: Sunnan 5-10 og skúrir eða rigning, en bjartviðri á Norður- og Austurlandi fram á kvöld. Hiti breytist lítið.

Á miðvikudag: Breytileg átt og rigning víða um land. Hiti 6 til 11 stig.

Á fimmtudag: Útlit fyrir breytilega átt. Rigning eða skúrir í flestum landshlutum. Hiti breytist lítið.