Ísak Berg­mann: Stoltur af þjóðinni í kvöld

„Ég er fyrst og fremst stoltur af liðinu. Það er búið að tala dálítið mikið ótrúlega lengi en það sáu allir að við spiluðum ótrúlega vel. Á milli línanna og allt sem að nútíma fótbolti á að vera. Sýndum það í dag“, sagði Ísak þegar hann var spurður út í frammistöðuna í dag.

Ísland var þó lengi í gang. Hvað small í seinni hálfleik?

„Við erum leikmenn frá fullt af öðruvísi hugmyndafræði úti og við þurfum bara að spila okkur saman. Ég meina að allir sem hafi séð það í seinni hálfleik hvað það var gaman að spila þennan leik. Ég er ótrúlega stoltur af liðinu.“

Hvernig er að vera komin heim á Laugardalsvöll, fann liðið fyrir tólfta manninum í kvöld?

„Já ég er ótrúlega ánægður að sjá svona marga í stúkunni. Vonandi verða bara fleiri í október þegar það eru erfiðari leikir. Ótrúlega stoltur af þjóðinni í dag.“

Ísak var að sjálfsögðu ánægður með mörkin sín og sendi fingurkoss upp í stúkuna. Hver var móttakandinn?

„Ég sendi fingurkoss eftir bæði mörkin en kærastan mín Agnes Perla, var á klósettinu eftir hálfleikinn þannig að hún missti af fyrri kossinum“, sagði Ísak skælbrosandi áður en hann hljóp til að taka þátt í fagnaðarlátunum.