Ætlar að nota krakka í síðustu leikjum Man. United í ensku deildinni

Þetta gaf Portúgalinn út eftir að United tryggði sér sæti í undanúrslitum Evrópudeildarinnar í gærkvöldi.

Manchester United mætir spænska liðinu Athletic Bilbao í undanúrslitum keppninnar og sigurvegarinn kemst í úrslitaleik á móti annað hvort Tottenham eða Bodö/Glímt.

Það lið sem vinnur Evrópudeildina fær sæti í Meistaradeildinni á næsta tímabili en United á ekki möguleika á Meistaradeildarsæti í ensku úrvalsdeildinni í ár.

Mikilvægi Evrópudeildarinnar er því gríðarlegt. United er í fjórtánda sæti í ensku úrvalsdeildinni en getur ekki fallið. Deildarleikirnir verða því notaðir til að skoða ungu leikmenn liðsins í alvöru leikjum.

„Við verðum að einbeita okkur að Evrópudeildinni og munum því taka áhættu í ensku úrvalsdeildinni,“ sagði Rúben Amorim.

„Okkar fókus verður á Evrópudeildinni og ég mun því spila krökkunum í ensku úrvalsdeildinni. Stuðningsmennirnir verða að skilja það,“ sagði Amorim.

United er með 38 stig eða sautján stigum meira en Ipswich sem situr í efsta fallsætinu. Ipswich getur í mesta lagi náð átján stigum í lokaleikjum sínum. West Ham og Úlfarnir eru þremur sætum á eftir United og Tottenham er bara einu stigi á eftir Manchester United eins og staðan er núna.

Stuðningmenn United mega því fara að búa sig undir það að liðið endi enðar en í fjórtánda sæti í ensku úrvalsdeildinni í ár en það væri allt fyrirgefið ef liðið tryggir sér bikar og sæti í Meistaradeildinni á 2025-26 tímabilinu.