Norðan­átt og frystir smám saman

Á vef Veðurstofunnar kemur fram að víða verði snjókoma eða slydda með köflum, en þurrt að kalla sunnanlands. Það frystir smám saman á landinu þar sem mun kólna með norðanáttinni.

„Á morgun snýst í fremur hæga suðvestanátt með éljum, en birtir upp norðaustanlands eftir hádegi.

Áfram útlit fyrir tiltölulega rólegt vetrarveður á miðvikudag og fimmtudag með éljum sunnan- og vestanlands og frosti á öllu landinu.

Ef við kíkjum á kortin lengra fram í tímann, þá virðist eiga að draga til tíðinda á föstudaginn, þá er spáð hvassri sunnanátt með talsverðri rigningu og hlýnar. Svo virðist sem áfram verði órólegt veður um næstu helgi,“ segir í hugleiðingum veðurfræðings.

Veðurhorfur á landinu næstu daga

Á þriðjudag: Breytileg átt 3-10 m/s og dálítil él í flestum landshlutum. Vægt frost.

Á miðvikudag og fimmtudag: Suðvestan 5-13 og él, en yfirleitt þurrt og bjart norðaustan- og austanlands. Frost 0 til 8 stig, kaldast norðaustantil.

Á föstudag: Suðaustan 13-20 og talsverð rigning eða slydda, en úrkomuminna norðanlands. Hiti 3 til 9 stig. Vestlægari um kvöldið með éljum og kólnar.

Á laugardag: Allhvöss suðvestanátt með slydduéljum eða éljum, en suðlægari og rigning um kvöldið. Þurrt að kalla norðaustantil á landinu.

Á sunnudag: Sunnanátt og rigning í fyrstu, síðan suðvestanátt með éljum.