Hinn 19 ára gamli Mainoo kom eins og stormsveipur inn í annars ömurlegt lið Man United á síðustu leiktíð, sýndi fádæma þroska í spilamennsku sinni á miðri miðjunni og átti stóran þátt í því að liðið sigraði Englandsmeistara Manchester City í úrslitum ensku bikarkeppninnar.
Mainoo var í kjölfarið valinn í enska landsliðshópinn fyrir Evrópumótið sem fram fór í Þýskalandi nú í sumar. Eftir slaka frammistöðu í riðlakeppninni ákvað þjálfari Englands, Gareth Southgate, að byrja með Mainoo á miðjunni það sem eftir lifði móts en enskir fóru alla leið í úrslit þar sem þeir töpuðu gegn Spáni.
Í stað þess að beina spjótum sínum að öðrum leikmönnum liðsins ákvað Souness að láta hinn „unga og óþroskaða“ Mainoo fá það óþvegið. Hann var til viðtals í hlaðvarpsþætti þar sem hann sagði Mainoo bæði ungan og óþroskaðan þrátt fyrir að hann væri „hæfileikaríkur“ þegar boltinn væri við fætur hans.
Þá sagði Souness að Mainoo færi of frjálslega upp völlinn og ekki í sinni stöðu fyrir miðju vallarins.
„Hann skilur ekki stöðuna sína nægilega vel. Hann fer of frjálslega upp völlinn og tæmir þar með miðjuna á vellinum. Ég horfði á leikinn gegn Íslandi í aðdraganda mótsins og þar var hann togaður úr stöðu hægri, vinstri.“
„Þetta er barnaskapur, hann er enn að læra leikinn,“ bætti Souness við.
Þá gagnrýndi hann leikstíl Englands á mótinu þar sem hann sagði liðið hafa verið best þegar það lenti marki undir og fór loks að sækja. Fram að því spilaði það nær eingöngu til baka eða til hliðar.
Að endingu gagnrýndi hann Declan Rice, kollega Mainoo á miðri miðjunni: „Ég lagðist í smá heimildavinnu og komst að því að Rice átti bara eina heppnaða sendingu fram á við í öllum leiknum gegn Spáni. Ein sending fram á við í 90 mínútur hjá miðjumanni, það á ekki að vera hægt!“
Eftir tapið gegn Spáni ákvað Southgate að segja af sér og hefur enska knattspyrnusambandið þegar hafið leitina að næsta þjálfara. Hver veit nema Souness stingi sínu nafni í hattinn.
