Þægi­legur sumar­hiti næstu daga en lægð á leiðinni

Á vef Veðurstofunnar segir að reikna megi með fremur hægum vindum og skýjuðu veðri með köflum í dag, en skúrum suðvestanlands fram á kvöld og sums staðar þokubakkar við norður- og austurströndina. Hiti verður á bilinu tíu til nítján stig, hlýjast á Norðausturlandi.

Í hugleiðingum veðurfræðings segir að yfir Suður-Skandinavíu sé nú víðáttumikil og vaxandi lægð á hreyfingu norðvestur og komi hún við sögu hér á landi annað kvöld. Þá muni ganga í norðvestankalda með smá rigningu norðaustanlands.

„Önnur vaxandi lægð nærri Nýfundalandi hreyfist norðaustur og síðar norður á bóginn. Sú lægð mun koma talsvert við sögu fimmtudag og föstudag, þegar hvessir af austri og rignir á sunnanverðu landinu,“ segir á vef Veðurstofunnar.

Veðurhorfur á landinu næstu daga

Á miðvikudag: Norðvestan 5-13 m/s norðaustanlands, annars hægari og yfirleitt bjartviðri. Gengur í austan 8-13 með smá rigningu syðst um kvöldið. Hiti 10 til 18 stig, hlýjast suðvestantil.

Á fimmtudag: Austan 5-10 m/s og 10-15 við suðurströndina, en vestan 5-10 norðaustantil. Dálítil rigning eða súld öðru hvoru um sunnanvert landið, en annars bjart með köflum og þurrt að mestu. Hiti 10 til 19 stig, hlýjast á Suðurlandi.

Á föstudag: Stíf austan- og norðaustanátt með rigningu víða um land, en úrkomulítið norðan heiða. Hiti 12 til 20 stig, hlýjast inn til landsins.

Á laugardag: Norðaustlæg átt og víða rigning eða þokusúld, en skýjað og stöku skúrir suðvestantil. Kólnar heldur norðaustanlands.

Á sunnudag og mánudag: Útlit fyrir fremur hæga norðlæga át og skýjað að mestu, en heldur bjartara sunnan heiða. Líkur á þokulofti við sjávarsíðuna um kvöldið. Hlýtt í veðri syðra, en mun svalara fyrir norðan.