Vaxandi sunnan­átt og fer að rigna

Á vef Veðurstofunnar segir að það sem stýri veðrinu í dag sé lægð við Hvarf, sem sendi skil yfir landið. Það verði því vaxandi sunnnanátt, átta til fimmtán metrar á sekúndu seinnipartinn og fer að rigna sunnan- og vestanlands.

Reikna með að hiti verði á bilinu átta til tólf stig sunnan- og vestanlands. Sunnanáttin verði hægari um landið norðaustanvert þar sem þar léttir til og má búast við allt að sextán til sautján stiga hita í sólskininu þegar best lætur.

„Á morgun verður áttin áfram suðlæg, en vindhraði skaplegur víðast hvar, nema á austanverðu landnu, þar má búast við strekkingi. Væta með köflum nokkuð víða og útlit fyrir drjúga rigningu á Suðausturlandi framan af degi. Hitatölurnar svipaðar eða aðeins lægri en í dag.“

Veðurhorfur á landinu næstu daga

Á föstudag: Suðlæg átt 3-10 m/s, en 8-15 austantil fram eftir degi. Rigning með köflum, einkum suðaustanlands. Hiti 7 til 14 stig.

Á laugardag: Gengur í austan og norðaustan 8-13 með rigningu, fyrst um landið sunnanvert. Hiti 6 til 12 stig.

Á sunnudag: Norðvestan- og vestanátt með rigningu eða slyddu, en úrkomulítið á Suðaustur- og Austurlandi. Kólnandi veður.

Á mánudag: Vestlæg eða breytileg átt og stöku skúrir eða él. Svalt í veðri.

Á þriðjudag: Suðvestanátt og smá væta vestantil, en bjartviðri á austanverðu landinu. Hlýnandi veður.

Á miðvikudag: Sunnanátt með súld eða rigningu, en bjartviðri um landið norðaustanvert. Hiti 7 til 16 stig, hlýjast norðaustanlands.