Vara­samt ferða­veður austan­lands en bjart suð­vestan­til

Á vef Veðurstofunnar segir að það verði yfirleitt bjart veður suðvestantil. Það dragi hægt úr vindi eftir hádegi og úr úrkomu seinnipartinn á landinu.

Búist er við frosti, núll til átta stigum, en rétt yfir frostmarki við suður- og suðvesturströndina yfir daginn.Ful viðvörun er í gildi á Austfjörðum til klukkan 15.

„Það verður austanátt á morgun, 5-13 en 13-18 syðst á landinu. Dálítil él fyrir austan en annars þurrt að kalla. Smám saman þykknar upp þegar líður á daginn en úrkoma sem fylgir kemur ekki fyrr en aðfaranótt miðvikudags.

Frá miðvikudegi eru austlægar áttir og rigning eða snjókoma öðru hvoru og talsverð eða mikil úrkoma um landið suðaustanvert. Hlýnandi veður,“ segir í hugleiðingum veðurfræðings.

Veðurhorfur á landinu næstu daga

Á þriðjudag: Austan 5-13 m/s, en 13-18 við suðurströndina. Dálítil él víða á landinu, en úrkomulaust að kalla á Vesturlandi. Fer að snjóa sunnanlands um kvöldið. Frost víða 0 til 8 stig, mildast syðst.

Á miðvikudag: Austanátt, víða 10-15 og snjókoma eða slydda, en 15-20 og rigning syðst, úrkomusamast suðaustanlands. Hiti víða 0 til 4 stig, en vægt frost fyrir norðan.

Á fimmtudag: Austan 10-18 og rigning eða snjókoma með köflum, talsverð eða mikil úrkoma austanlands en úrkomuminna vestantil. Hiti 2 til 8 stig en vægt frost norðaustantil.

Á föstudag: Austlæg átt með rigningu, einkum suðaustantil og mildu veðri en slydda eða snjókoma með hita um frostmark norðaustanlands.

Á laugardag: Minnkandi suðaustanátt og rigning suðaustanlands en stöku skúrir annars staðar. Milt í veðri.

Á sunnudag: Útlit fyrir suðlæga átt. Dálítil væta en bjart að mestu austantil. Hiti yfirleitt 2 til 6 stig en um frostmark norðaustanlands.