Frost að níu stigum í dag og hvessir á morgun

Atli Ísleifsson skrifar 6. mars 2023 07:12

Það hvessir talsvert til morguns og víða tíu til átján metrar á sekúndu síðdegis og hvassari á stöku stað. Sums staðar snarpar vindhviður við fjöll. Vísir/Vilhelm

Veðurstofan gerir ráð fyrir norðlægri og fremur hægri átt í dag, éljum, einkum norðaustan- og austanlands, en yfirleitt léttskýjuðu sunnan- og vestantil.

Í hugleiðingum veðurfræðings segir að frost verði á bilinu þrjú til níu stig yfir daginn þar sem kaldast verður inn til landsins.

„Hvessir talsvert til morguns og víða 10-18 m/s síðdegis og hvassari á stöku stað og sums staðar snarpar vindhviður við fjöll. Éljagangur um allt norðan- og austanvert landið, en yfirleitt þurrt annars staðar. Hiti breytist lítið.

Nýjustu spár benda til að dragi úr frosti í lok vikunnar eða í byrjun næstu viku, þó ekki þannig að nein vorhlýindi eru sjáanleg,“ segir á vef Veðurstofunnar.

Veðurhorfur á landinu næstu daga

Á þriðjudag: Norðlæg átt 10-18 m/s og éljagangur, en yfirleitt þurrt sunnan heiða. Frost 3 til 10 stig.

Á miðvikudag: Norðan 5-13 og bjartviðri, en svolítil él á Norður- og Austurlandi. Hiti breytist lítið.

Á fimmtudag: Norðaustan 8-15. Éljagangur um landið norðan- og austanvert en annars úrkomulítið. Frost 3 til 10 stig.

Á föstudag, laugardag og sunnudag: Útlit fyrir áframhaldandi norðlæga átt með éljum, en lengst af þurrt á sunnanverðu landinu. Herðir á frosti.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.