Innlent

Orkuveitan nefnir niðurrif Árbæjarstíflu sem valkost

Kristján Már Unnarsson skrifar
Árbæjarstífla. Orkuveitan kynnir þrjá valkosti um framtíð hennar.
Árbæjarstífla. Orkuveitan kynnir þrjá valkosti um framtíð hennar. Egill Aðalsteinsson

Niðurrif Árbæjarstíflu er meðal valkosta sem Orkuveita Reykjavíkur hefur lagt fyrir borgaryfirvöld með ósk um samstarf um það sem kallað er „niðurlagningaráætlun Elliðaárvirkjunar“. Umhverfis- og skipulagsráð borgarinnar hefur fallist á að málið verði unnið áfram.

Fjallað var um málið í fréttum Stöðvar 2 en umdeild tæming Árbæjarlóns fyrir tveimur árum eru sýnilegustu merki þess að Orkuveita Reykjavíkur hafi hætt rekstri Elliðaárstöðvar. 

Séð yfir lónsstæði Árbæjarlóns. Fimm mánuðir eru frá því tæming þess var úrskurðuð ólögmæt.Egill Aðalsteinsson

Eftir kærumál íbúa í grennd komst Úrskurðarnefnd umhverfis- og auðlindamála að þeirri niðurstöðu í október að tæming lónsins hefði skort framkvæmdaleyfi og því verið ólögmæt.

Í úrskurðinum í haust fengu bæði skipulagsfulltrúi Reykjavíkurborgar og forstjóri Orkuveitunnar á baukinn. Engin viðbrögð hafa síðan komið um hvernig eigi að vinda ofan af lögbrotinu, fyrr en kannski núna.

Erindi Orkuveitu Reykjavíkur var sent umhverfis-og skipulagssviði borgarinnar þann 31. janúar. Efni þess er lýst svo: Samstarf um endurheimt náttúrugæða í Elliðaárdal vegna niðurlagningaráætlunar Elliðaárvirkjunar og endurskoðunar á gildandi deiliskipulagi svæðisins.Grafík/Kristján Jónsson

Í bókun umhverfis- og skipulagsráðs borgarinnar, um erindi sem Orkuveitan lagði fyrir borgaryfirvöld í síðustu viku, segir að ekki sé gerð athugasemd við að undirbúningur hefjist á endurskoðun deiliskipulags Elliðaárdals samhliða gerð áætlunar um niðurlagningu virkjunarinnar.

Kynnt er skipan stýrihóps um málið og þar eru efst á blaði þau Bjarni Bjarnason, forstjóri Orkuveitunnar, og Ólöf Örvarsdóttir, sviðsstjóri umhverfis- og skipulagssviðsins.

Fylgigögn Orkuveitunnar hafa yfirskriftina: Endurheimt náttúrugæða í Elliðaárdal.Grafík/Kristján Jónsson

Erindi Orkuveitunnar fylgir samantekt með yfirskriftinni: „Endurheimt náttúrugæða í Elliðaárdal.“

Megininntakið eru valkostir um hvað gera eigi við Árbæjarstíflu og eru þrír möguleikar reifaðir: Að viðhalda henni í núverandi mynd til framtíðar, í öðru lagi vistrennslisaðgerðir, það er sjálfbært rennsli án lokubúnaðar, og loks að fjarlægja stífluna.

Elliðaárstöð. Fyrir fjórum árum sagði talsmaður Orkuveitunnar að stöðin væri í raun enn virk. Það eina sem þyrfti að gera væri að leggja nýja aðfallspípu frá Árbæjarstíflu.Arnar Halldórsson

Sá möguleiki að halda áfram raforkuframleiðslu í Elliðaárstöð er hins vegar ekki nefndur í erindi Orkuveitunnar.

Athygli vekur að í fylgigögnum er fyrst og fremst rætt um framtíð Árbæjarstíflu, sem er inntaksmannvirki. Stíflurnar eru hins vegar tvær. Hin er Elliðavatnsstíflan, sem er miðlunarstífla.

Elliðavatnsstífla er miðlunarstífla virkjunarinnar. Ef hún yrði fjarlægð myndi uppistöðulónið Elliðavatn minnka verulega.Egill Aðalsteinsson

Því vaknar sú spurning. Ef menn ætla sér að færa náttúruna í sitt upprunalega horf, þarf þá ekki jafnframt að fjarlægja Elliðavatnsstíflu? Það myndi þýða mun minna Elliðavatn.

Hér má sjá frétt Stöðvar 2:

Í frétt Stöðvar 2 í nóvember var því velt upp hvort koma ætti Elliðavatni í upprunalegt horf:

Orkumál Vatnsaflsvirkjanir Borgarstjórn Reykjavík Skipulag Umhverfismál

Tengdar fréttir

Bar að stöðva tæmingu Ár­bæjar­lóns tafar­laust

Skipulagsfulltrúa Reykjavíkurborgar bar að stöðva tæmingu Árbæjarlóns tafarlaust er lónið var tæmt haustið 2020. Úrskurðarnefnd umhverfis- og auðlindamála telur ljóst að framkvæmdin hafi verið meiri háttar framkvæmd sem borið hafi að afla framkvæmdaleyfis vegna.

Segir meiri­hlutann í af­neitun um „ó­leyfis­fram­kvæmd“

Borgarfulltrúi Sjálfstæðisflokksins sakar meirihlutann í borgarstjórn Reykjavíkur um að vera í afneitun um það sem hann kallar óleyfisframkvæmd að tæma Árbæjarlón. Meirihluti borgarstjórnar vísaði frá tillögu um að fylla lónið aftur.

Elliðaárstöð stendur ónotuð á tíma raforkuskorts í landinu

Á sama tíma og kvartað er undan raforkuskorti í landinu vekur athygli að heil virkjun skuli standa ónotuð og það innan borgarmarka Reykjavíkur. Þetta er Elliðaárstöðin en forstjóri Orkuveitu Reykjavíkur sagði fyrir ári að engin þörf væri á meiri orku.

Orkuveitan velur skemmtigarð og kaffihús fram yfir raforkuvinnslu

Orkuveita Reykjavíkur er að byggja fjölskyldu- og skemmtigarð ásamt kaffihúsi við Elliðaárstöð á sama tíma og hún telur ekki svara kostnaði að hefja þar raforkuframleiðslu á ný. Forstjóri Orkuveitunnar neitar að svara spurningum um málið en oddviti sjálfstæðismanna í borginni segir enga spurningu að endurskoða eigi lokun rafstöðvarinnar.

Telur mun ódýrara að endurræsa Elliðaárstöð en Orkuveitan áætlar

Einn reynslumesti virkjanamaður landsins á sviði smávirkjana hvetur Orkuveitu Reykjavíkur til að endurskoða ákvörðun sína um að hætta rekstri Elliðaárstöðvar og telur unnt að endurræsa virkjunina fyrir sextíu prósent af þeim kostnaði sem Orkuveitan áætlar.

Orkustjórar í ritdeilu um raforkuskort

Stjórnendur tveggja stærstu orkufyrirtækja landsins, Landsvirkjunar og Orkuveitu Reykjavíkur, eru komnir í opinbera ritdeilu á Vísi um raforkuskort í landinu. Þetta eru þeir Bjarni Bjarnason, forstjóri OR, og Gunnar Guðni Tómasson, framkvæmdastjóri vatnsafls hjá Landsvirkjun. Bæði fyrirtækin eru alfarið í opinberri eigu; Landsvirkjun í eigu ríkisins en Orkuveitan að mestu í eigu Reykjavíkurborgar.

Spurt hvort fjarlægja ætti stíflu Elliðavatns eftir lokun virkjunar

Spurningar hafa vaknað um hvort fjarlægja eigi stíflu Elliðavatns og koma vatninu í upprunalegt horf, eftir að rekstri Elliðaárstöðvar var hætt. Líffræðingur sem vaktar Elliðavatn segir að slíkt þyrfti að hugsa vandlega og að söknuður yrði af vatninu.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið