Mudryk búinn að semja við Chelsea til ársins 2031

Mykhailo Mudryk hefur verið töluvert í fréttunum síðustu vikurnar og lengi vel leit út fyrir að hann væri á leið til Arsenal sem höfðu verið að eltast við hann í töluverðan tíma.

Á föstudag bárust síðan skyndilega fréttir af því að Chelsea væri komið í bílstjórasætið og væri við það að stela Mudryk af nágrönnum sínum í Lundúnum.

Sú frétt var síðan staðfest í dag. Mudryk er búinn að skrifa undir hjá Chelsea en þessi rúmlega tvítugi Úkraínumaður gerði átta og hálfs árs samning við Chelsea og er því samningsbundinn þeim þar til í júní 2029.

Mudryk skoraði níu mörk í tuttugu og níu leikjum fyrir Shaktar Donetsk og hefur þar að auki leikið átta landsleiki fyrir Úkraínu.

Mudryk er fimmti leikmaðurinn sem Chelsea fær til liðs við sig í janúarglugganum. Joao Felix, Benoit Badiashile, David Fofana og Andrey Santos eru hinir fjórir og ljóst að nýir eigendur ætla sér stóra hluti þó svo að gengið hafi verið dapurt að undanförnu.