Hæg norð­læg átt og dá­lítil él norðan- og austan­lands

Á vef Veðurstofunnar segir að reikna megi með talsverðu frosti – fjórum til átján stigum þar sem kaldast verður inn til landsins.

„Þykknar heldur upp á Suðurlandi seinnipartinn og lítilsháttar snjókoma við ströndina seint í kvöld og nótt.

Austankaldi eða strekkingur og víða snjókoma eða él á morgun, aðfangadag, en vestlægari og úrkomulítið eystra. Áfram strekkingsaustanátt á jóladag og él í flestum landshlutum, en dregur heldur úr frosti.

Þeir sem hyggjast aka milli landshluta um jólahelgina ættu að fylgjast vel með veðurspám og ástandi vega áður en lagt er af stað. Hyggilegt er að gera ráð fyrir að færð geti versnað með skömmum fyrirvara,“ segir í hugleiðingum veðurfræðings.

Veðurhorfur á landinu næstu daga

Á laugardag (aðfangadagur jóla): Norðaustan 8-15 m/s norðvestantil, en annars austan og suðaustan 5-13 og víða él eða snjókoma, en úrkomulítið á Austurlandi og Austfjörðum. Frost yfirleitt 4 til 14 stig, kaldast inn til landsins, en frostlaust syðst.

Á sunnudag (jóladagur): Norðaustan og norðan 8-15 m/s, en jafn vel hvassviðri suðaustantil og á Vestfjörðum. Víða él, en mögulega snjókoma sunnanlands. Frost víða 2 til 12 stig.

Á mánudag (annar í jólum): Hæg austlæg átt og skýjað, en yfirleitt úrkomulítið, en 8-15 m/s og dálítil snjókoma við suðurströndina. Frost 2 til 15 stig, minnst syðst.

Á þriðjudag: Útlit fyrir allhvassa eða hvassa austanátt með snjókomu eða skafrenningi víða á landinu, en dregur heldur úr frosti.

Á miðvikudag: Snýst líklega í stífa norðaustanátt með snjókomu, en úrkomulítið sunnan heiða. Talsvert frost.

Á fimmtudag: Búast má við norðanátt með éljagangi og harðandi frosti.