Fótbolti

HM í Katar „gullgæs“ fyrir Talibana sem græddu milljarða

Valur Páll Eiríksson skrifar
Talibanar græddu á uppbyggingu fótboltavalla og annara innviða í Katar fyrir HM sem nú stendur yfir.
Talibanar græddu á uppbyggingu fótboltavalla og annara innviða í Katar fyrir HM sem nú stendur yfir. vísir/Getty

Hreyfing Talibana í Afganistan græddi andvirði milljarða króna á uppbyggingu Katara fyrir heimsmeistaramót karla í fótbolta sem nú stendur yfir í síðarnefnda ríkinu. Það gerðu þeir fyrir tilstuðlan greiðslna frá katarska ríkinu undir yfirskini friðaviðræðna. 

Breski miðillinn Telegraph greinir frá því að háttsettir aðilar innan Talibanahreyfingarinnar hafi nýtt háar greiðslur fyrir friðarviðræður til þess að fjárfesta í margskonar vinnuvélum sem síðan hafi verið leigðar út til verktaka í Katar.

Stór hluti háttsettra aðila innan hreyfingar Talibana var búsettur í Doha, höfuðborg Katar, frá 2013 þar sem þeir tóku þátt í friðarviðræðum við Sameinuðu þjóðirnar og Bandaríkin.

Katarar hafi fengið leyfi bæði SÞ og Bandaríkjanna til að greiða þeim mánaðarlega þóknun sem nam þúsundum punda, og Katarar með þeim hætti stuðlað að auknum friðarviðræðum við Vesturlönd.

Samkvæmt heimildamönnum Telegraph fór stór hluti þess fjár í fjárfestingar á búnaðinum sem hafi svo strax verið leigður katörskum verktökum. Gríðarleg uppbygging á bæði knattspyrnuvöllum og hvers kyns innviðum hefur átt sér stað í Katar frá því að ríkið tryggði sér gestgjafahlutverk HM 2022 árið 2010.

„Talibanar fjárfestu ríkulega í uppbyggingunni fyrir HM og mótið var gullgæs. Þeir græddu milljónir,“ er haft eftir heimildamanni Telegraph.

„Einhverjir meðlimir Talibana áttu á bilinu sex til tíu stór vinnutæki í Doha og græddu tugi þúsunda punda fyrir hverja vél á mánuði,“ er haft eftir honum enn fremur.

Ekkert bendir til misgerða katarskra yfirvalda eða að þau hafi tekið þátt í aðgerðum Talibana.

„Opið leyndarmál“

Haji Ahmad Jan, fyrrum ráðherra mála tengd jarðolíu og námum í Afganistan frá 1996 til 2001, er sagður hafa verið milliliður útleigu vélanna til verktaka og byggingarfyrirtækja.

„Það var opið leyndarmál í afganska ráðuneytinu í Doha að talibanska viðræðnateymið og pólitískur armur þess fengi vel greitt frá katörskum yfirvöldum og að þeir fjárfestu þeim greiðslum í vinnutæki fyrir HM,“ er haft eftir ónefndum fyrrverandi afgönskum diplómata í Doha.

Talibanar voru við völd í Afganistan frá 1996 til 2001, en misstu völd það ár þegar Bandaríkin réðust inn í landið. Eftir að Bandaríkjamenn hófu að draga herafla sinn burt frá ríkinu á síðasta ári hertóku Talibanar fjölda héraða í Afganistan á ný og sneru aftur til valda í ágúst þegar þeir hertóku höfuðborgina Kabúl.


Tengdar fréttir

Á bak við tjöldin á HM í Katar: Mann­réttinda­brot, í­þrótta­þvottur og spilling

Tuttugasta og annað heimsmeistaramót karla í knattspyrnu, sem hefst í Katar í dag, er ef til vill það umdeildasta sem fram hefur farið hingað til. Mannréttindabrot, dauðsföll verkafólks og spilling er meðal þess sem vakin hefur verið athygli á í tengslum við mótið en umdeild saga þessa móts hófst árið 2010. Ekki í Katar heldur í fundarherbergi í Zurich í Sviss.

Átti að hreinsa upp skítinn en fær nú hæli í Katar

„Einbeitið ykkur að fótboltanum“ sagði Gianni Infantino, forseti FIFA, í bréfi til þátttökuþjóða á HM í Katar tæpum þremur vikum fyrir upphafsflaut mótsins sem hefst á sunnudaginn kemur. FIFA hefur dregið í land með ýmis loforð fyrir mótið og lítið pláss virðist vera fyrir mannréttindamál hjá forseta sem á nú hæli í gestgjafaríkinu.

„Hefði þetta gerst fyrir ári hefði ég lík­lega verið hand­tekinn“

Danskur fréttamaður, sem varð fyrir því að vera stöðvaður í beinni útsendingu af katörskum öryggisvörðum, segist hafa verið mjög meðvitaður um afleiðingarnar sem orðið gætu af atburðinum. Katarar verði að sætta sig við fjölmiðlaumfjöllun, góða og slæma, þar sem þeir hafi opnað dyr sínar fyrir umheiminum. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.