Enski boltinn

Southgate segir að Trippier sé á undan Alexander-Arnold í röðinni

Ingvi Þór Sæmundsson skrifar
Gareth Southgate, landsliðsþjálfari Englands, virðist vera hrifnari af Kieran Trippier en Trent Alexander-Arnold.
Gareth Southgate, landsliðsþjálfari Englands, virðist vera hrifnari af Kieran Trippier en Trent Alexander-Arnold. getty/Michael Regan

Leiðin í byrjunarlið enska landsliðsins virðist vera býsna löng fyrir Trent Alexander-Arnold, leikmann Liverpool, allavega ef marka má orð landsliðsþjálfarans Gareths Southgate.

Alexander-Arnold sat allan tímann á varamannabekknum þegar England tapaði fyrir Ítalíu í Þjóðadeildinni á föstudaginn og var ekki í leikmannahópnum í 3-3 jafnteflinu gegn Þýskalandi í fyrradag.

Hvorki fleiri né færri en fjórir hægri bakverðir voru í landsliðshópnum sem Southgate valdi síðast. Alexander-Arnold virðist neðst í goggunarröðinni af þeim. Southgate sagði meðal annars að heildarpakkinn sem Newcastle-maðurinn Kieran Trippier byði upp á væri betri en hjá Alexander-Arnold.

„Ég ræddi lengi við alla þá sem spiluðu ekki,“ sagði Southgate er hann var beðinn um að útskýra val sitt.

„Gegn Ítalíu þurftum við ekki auka mann í stöðu vinstri bakvarðar. En við þurftum þess gegn Þýskalandi vegna þess hvernig liðinu var stillt upp. Við þurftum Ben Chilwell á bekknum og við höfum Trippier sem er betri alhliða leikmaður en Alexander-Arnold á þessari stundu.“

Hnn 23 ára Alexander-Arnold hefur verið lykilmaður hjá Liverpool undanfarin ár og unnið allt sem hægt er að vinna með Rauða hernum. Honum hefur hins vegar ekki tekist að vinna sér inn sæti í byrjunarliði Englands. Hann hefur leikið sautján landsleiki og skorað eitt mark.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.