Harð­stjórinn Ten Hag bannar á­fengi og mun vigta leik­menn reglu­lega

Man United hefur byrjað undirbúningstímabilið vel og virðist sem nær allir leikmenn liðsins séu að njóta sín ágætlega, allavega þeir sem eru mættir til æfinga. Það er ljóst að Ten Hag mun ekki leyfa mönnum að taka því rólega í svo mikið sem eina sekúndu en hann hefur sett ýmis boð og bönn á leikmenn.

Eftir að hafa fengið að leika nokkuð lausum hala undir stjórn Ole Gunnar Solskjær og Ralf Rangnick þá þurfa leikmenn nú að sýna gríðarlegan aga utan vallar sem innan. Áfengi verður bannað þær vikur sem liðið á leik sem þýðir að áfengi er í raun bannað frá upphafi tímabils og þangað til því lýkur.

Leikmenn verða vigtaðir reglulega og sektaðir ef þeir eru ekki í nægilega góðu ásigkomulagi. Þá mega leikmenn ekki vera með einkakokka lengur en ætlast er til að þeir borði þann mat sem félagið undirbýr fyrir þá. 

„Ég held þetta hafi vantað í dágóða stund. Fyrir mér þarf aga bæði innan vallar sem utan. Ekki vera seinn á fundi, ekki vera seinn í mat. ég held þetta sé mjög mikilvægt fyrir liðið, fyrir mér er mikilvægt að mæta á réttum tíma svo ég sé engin vandamál hvað það varðar,“ sagði Bruno Fernandes um nýtt regluverk félagsins.

Leikmenn hafa verið varaðir við því að leka upplýsingum úr klefanum en það var vandamál á síðustu leiktíð. Félagið er sem stendur að undirbúa komandi tímabil, eftir stuttan tíma í Tælandi var farið til Ástralíu. Hafa leikmenn liðsins þurft að taka armbeygjur ef eitthvað mislukkast á æfingum og þá var MUTV - sjónvarpsstöð félagsins - bannað að taka leikmenn upp á leikmynd Nágranna en sápuóperan fræga kemur frá Ástralíu.

„Þetta hefur verið auðvelt því það vita allir hvað hann vill og hvaða kröfur hann setur á leikmenn. Hugmyndir hans eru skýrar og reglurnar einnig. Við verðum að gera það sem þjálfarinn vill, hann vill það besta fyrir liðið og það sem er best fyrir liðið er best fyrir mig,“ bætti Bruno við.

Manchester United hefur byrjað undirbúningstímabilið vel og unnið alla þrjá leiki sína. Stuðningsfólk liðsins ætti þó að vita að það gefur ekki alltaf góð fyrirheit en Louis van Gaal vann alla sína æfingaleiki eftir að hafa tekið við stjórn liðsins til þess eins að tapa fyrir Swansea City í fyrsta leik. 

Man United hefur tímabilið þann 8. ágúst næstkomandi þegar Brighton & Hove Albion kemur í heimsókn á Old Trafford.