Tónlist

Sól og sumardans ásamt myrkari hliðum tilverunnar

Dóra Júlía Agnarsdóttir skrifar
Tónlistarmaðurinn Benni Hemm hemm var að gefa út lagið Eitthvað leiður.
Tónlistarmaðurinn Benni Hemm hemm var að gefa út lagið Eitthvað leiður. Aðsend

Benni Hemm Hemm var að gefa út lagið Eitthvað leiður í dag, á 17. Júní. Lagið er unnið með hópi öflugs tónlistarfólks sem leika á hin ýmsu hljóðfæri. Blaðamaður tók púlsinn á Benna.

Benni segir lagið smekkfullt af sól og sumardansi en snertir, eins og öll betri popplög, einnig á myrkari hliðum tilverunnar. Eins og þegar gúmmíið klárast og fílíngurinn breytist og verður annar.

Engar tilviljanir

„Sú hugmynd leitaði á mig að gera svona píanóballöðu stuðlag, svo ég prjónaði saman þennan einfalda hljómagang og fann svo næsta texta sem beið í bókinni minni og söng hann ofaná.

Tilviljanirnar eru oftast það sem virkar best og yfirleitt alls engar tilviljanir ef út í það er farið. Ég uppgötvaði eftir söngupptökurnar að ég hafði sungið „gúmmíið“ í staðinn fyrir „lakkið„, sem stóð í upphaflega textanum, en ég er mun sáttari við að gúmmíið sé búið, það er mikið betra fyrir lagið.

Svo fékk ég herskara fólks í stúdíóið mitt til að leika á öll heimsins hljóðfæri, sonur minn söng meira að segja drengjakórs línuna,“ segir Benni. 

Cover mynd lagsins Eitthvað leiður.Aðsend

200 rásir

„Þetta lag sprengdi algjörlega öll mín eldri met í útsetningum og upptökufræðum, sem gerði hljóðblöndun svolítið snúna (með 200 rásir að malla saman). Það gekk svo ágætlega á endanum með hjálp ráðgjafa og sáluhjálpara, en Prins Póló hefur reynst mér best í þeirri deild, enda hefur hann meistaragráðu í hljóðblöndun popplaga. Arnar Guðjónsson hraðaði svo örlítið á laginu og masteraði og smurði kreminu á þessa rjómatertu sem kom út í dag, á 17. júní.“

Lagið er flutt af Benedikt H. Hermanssyni, Bergrúnu Snæbjörnsdóttur, Inga Garðari Erlendssyni, Kára Hólmari Ragnarssyni, Elsu Kristínu Sigurðardóttur, Sturlaugi Jóni Björnssyni, Tuma Árnasyni, Þorláki Benediktssyni og Lornu Gilfedder. Benedikt tók upp og mixaði og Arnar Guðjónsson masteraði.

Texti lagsins:

Held ég sé eitthvað leiður

Var að gera upp gamlar erjur

kannski er ég bara þreyttur

af því að gúmmíið er búið

og fílíngurinn er annar og breyttur


Tengdar fréttir

„Undirmeðvitundin er stundum svo mikið með á nótunum að hún er langt á undan manni“

Tónlistarmaðurinn Benni Hemm Hemm gefur út breiðskífu miðvikudaginn 8. júní. Platan, sem ber titilinn Benni Hemm Hemm & the Melting Diamond Band III, er þriðja platan sem kemur út úr samstarfi hljómsveitarinnar við Mengi Records. Hún kemur út á stafrænu formi og á vínyl en einnig eru gefin út vídeóverk með öllum tónverkunum. Útgáfu plötunnar verður fagnað með tónleikum í Mengi samdægurs, miðvikudagskvöldið 8. júní. Blaðamaður tók púlsinn á Benna.






Fleiri fréttir

Sjá meira


×