Tónlist

Nýtt lag frá Svölu: Sjálfsvirðing, valdefling og popp tónlist sameinast í eitt

Dóra Júlía Agnarsdóttir skrifar
Svala Björgvinsdóttir var að gefa út lagið Bones.
Svala Björgvinsdóttir var að gefa út lagið Bones. Tinna Magg

Söngkonan Svala Björgvins sendi frá sér lagið Bones fyrr í dag. Svala er nýbúin að skrifa undir plötusamning við Öldu Music og vinnur nú hörðum höndum að nýrri tónlist þar sem öll lögin verða á ensku og leggja áherslu á sjálfsvirðingu og valdeflingu. Blaðamaður tók púlsinn á Svölu og fékk að heyra nánar frá nýju tónlistinni.

Hvaðan sækirðu innblástur fyrir þetta lag?

Ég kynntist Dodda eða Þorsteini Einarssyni tónlistarmanni og við fórum að vinna saman. Ég kom svo með eina af mínum bestu vinkonu, Andreu Ingvars, inn í svokallað writing session með Dodda og Dóri sá um að pródúsera lagið. Það myndaðist bara svakalegt chemistry á milli okkar allra og við höfum verið að vinna saman að þessari nýju tónlist sem ég er að gefa út núna.

Mig langaði að fara aðeins í nýja átt og gera tónlist sem hefur boðskap um sjálfs valdeflingu og að virða sjálfan sig. Ég vil enn þá gera popp tónlist því í kjarnann er ég algjör poppari og ég elska þannig tónlist.

Hefur lagið verið lengi í bígerð?

Lagið hefur verið í vinnslu í nokkra mánuði og það fór í gegnum margar breytingar. Þetta er alltaf frekar langt ferli þegar maður er að skapa tónlist.

Ég er líka mjög ákveðin sem tónlistarkona, veit nákvæmlega hvernig allt á að hljóma og ég verð að tengja 100% við textann líka.

Hvað finnst þér skemmtilegast við að vinna í tónlist?

Óvissan. Vinnan mín er aldrei eins og svo fjölbreytt. Ég vinn við að vera skemmtikraftur, lagahöfundur og söngkona. Svo hef ég líka verið í sjónvarpsþáttum eins og The Voice, þar sem ég var dómari þar í tvö ár. Þannig vinnan mín er mjög fjölbreytt og mismunandi og mér finnst það rosalega gaman. Mér finnst ég líka gríðarlega heppin að fá að vinna við það sem gerir mig hamingjusama og ég er svo þakklát fyrir það. En þetta er líka oft erfitt því ég er sjálfstætt starfandi listamaður og eins og í Covid ástandinu þá var ég bara atvinnulaus, því ég vinn svo mikið við að vera að gigga.

Hvað er á döfinni hjá þér?

Ég var að skrifa undir plötusamning við Öldu Music og er svo spennt að gefa út tónlist með þeim. Öll nýja tónlistin er á ensku. Ég tók alveg tvö ár þar sem öll mín tónlist var á íslensku og mér fannst það alveg ótrúlega gefandi að semja og syngja á móðurmálinu.

En ég á mikið af erlendum aðdáendum sem tala ekki íslensku og vil líka gefa þeim tónlist þar sem þau skilja textann og geta tengt við músíkina.

Ég er að fara gefa út fullt af nýrri tónlist á þessu ári og bara gigga á fullu. Svo er ég að vinna að mjög spennandi verkefni með Haffa vini mínum, eða Haffa Haff eins og fólk þekkir hann.


Tengdar fréttir

Svala setur kærleikann í fyrsta sæti

Svala Björgvins lifir lífi sínu í kærleikanum og gaf hún út lag ásamt myndbandi á föstudaginn 15 okt, sem að heitir Birtunnar Brú og fjallar lagið um um að elska alla þá sem að þú elskar skilyrðislaust og taka þeim eins og þau eru, og öllu sem þeim fylgir. 






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.