Fékk tólf tonna lyftara á fótinn á sér og sendur heim í teygjusokk

Óttar Kolbeinsson Proppé skrifar 11. mars 2022 20:30

Nokkur ár eru liðin frá vinnuslysinu en Halldór er nú hættur störfum. Hann hefur síðustu ár sótt sér læknisþjónustu í Reykjavík. vísir/sigurjón

Bæjarfulltrúi Reykjanesbæjar telur að einkarekin heilsugæsla gæti leyst ýmis vandamál svæðisins. Íbúar á Suðurnesjum hafa kvartað sáran undan þjónustu Heilbrigðisstofnunar Suðurnesja sem virðist illa mönnuð og ná illa utan um álagið.

Eins og fréttastofa hefur greint frá undanfarið eru margir íbúar á Suðurnesjum gríðarlega óánægðir með þjónustu HSS.

Þar kvarta þeir helst undan því að rangar greiningar á heilsugæslunni séu allt of tíðar, oft á mjög alvarlegum kvillum.

Halldór Ármannsson er einn þeirra sem lenti í slíku fyrir nokkrum árum eftir vinnuslys þegar lyftari keyrði á fótinn á honum.

„Þegar dekkið spyrnir, þetta eru stór dekk sko, þá er ég fastur hér undir,“ segir Halldór og sýnir hvar lyftarinn fór á fótinn á sér í myndbandinu sem fylgir fréttinni.

„En hann stoppar, sko. Ef hann hefði farið lengra þá hefði löppin bara farið.“

Hann var þá fluttur upp á HSS.

„Það voru ekki teknar neinar myndir af þessu eða neitt heldur settur bara teygjusokkur utan um fótinn. Og ég sendur heim með verkjalyf,“ segir Halldór.

Ekki eins og að verða fyrir reiðhjóli

Þegar verkurinn ágerðist í fætinum ákvað hann að láta skoða hann betur í Reykjavík og reyndist þá þríbrotinn.

„Það er dálítið kjánalegt að þeir hafi ekki einu sinni tekið mynd af þessu þegar þeir vissu að það fór 12 tonna lyftari á fótinn á mér. Það er ekki eins og þetta hafi verið reiðhjól,“ segir Halldór.

Hann er einn þeirra fjölmörgu íbúa Suðurnesja sem fer í dag frekar til læknis í bænum.

„Við hjónin lentum svo í fleiri vandræðum þarna og eftir það létum skrifa okkur inn á lækni í Reykjavík eða heilsugæslu,“ segir hann.

Vill einkarekna heilbrigðisþjónustu á Suðurnes

Jóhann Friðrik Friðriksson, bæjarfulltrúi Reykjanesbæjar og þingmaður kjördæmisins, kannast vel við vandamál HSS.

„Í langan tíma er maður búinn að vera að berjast fyrir betri heilbrigðisþjónustu á Suðurnesjum og svæðið náttúrulega fer ört stækkandi og miðað við viðmiðið sem menn eru að gefa sér á höfuðborgarsvæðinu þá þyrftu að vera þrjár heilsugæslur á Suðurnesjunum,“ segir Jóhann.

Jóhann Friðrik vill að einkageirinn létti undir með opinberri heilbrigðisþjónustu á svæðinu.vísir/einar

Hún er aðeins ein heilsugæslan á svæðinu núna sem fellur undir rekstur HSS.

Jóhann telur réttast að koma á fót einkarekinni heilsugæslu á svæðinu til að létta undir með HSS.

„Þarna ætti bara að vera tækifæri fyrir einkaaðila að manna heilsugæslu og það hefur gengið ágætlega á undanförnum árum að byggja það kerfi upp á höfuðborgarsvæðinu. Og ég veit ekki betur en að það sé mannað þannig við þurfum auðvitað bara að gera betur,“ segir Jóhann.

Heilbrigðisstofnun Suðurnesja Suðurnesjabær Reykjanesbær Grindavík Heilbrigðismál Heilsugæsla

Tengdar fréttir

Kurr í Suðurnesjamönnum vegna HSS

Þingmaður Samfylkingarinnar segir vanda Heilbrigðisstofnunar Suðurnesja skrifast á vanrækslu stjórnvalda gagnvart Suðurnesjum. Kurr og óánægja sé í íbúum sem eigi skilið almennilega heilbrigðisþjónustu eins og aðrir landsmenn.

8. mars 2022 15:42

Fáránlegt að HSS hafi nýtt sér læknaleigu sem yfirlæknirinn rak sjálfur

Formaður bæjarráðs í Reykjanesbæ segir galið fyrirkomulag að Heilbrigðisstofnun Suðurnesja hafi nýtt sér læknaleigu sem yfirlæknir stofnunarinnar rak sjálfur. Hann vill heildarendurskoðun á stjórnun stofnunarinnar.

19. febrúar 2022 18:55

Ósáttir íbúar uppnefna HSS „Sláturhús Suðurnesja“

Íbúar Suðurnesja eru margir orðnir langþreyttir á þjónustu Heilbrigðisstofnunar Suðurnesja (HSS) og kalla hana öllum illum nöfnum. Þeir segja lækna gefa sér lítinn tíma til skoðunar og að rangar greiningar á alvarlegum kvillum séu allt of algengar.

17. febrúar 2022 19:50

Hætt að leita til HSS eftir það sem kom fyrir son hennar

Móðir, sem segir son sinn hafa verið sendan heim frá Heilbrigðisstofnun Suðurnesja með alvarlega blæðingu eftir hálskirtlatöku, er hætt að sækja heilbrigðisþjónustu á svæðinu. Lífi drengsins var bjargað degi síðar með aðgerð eftir að hann fór að æla blóði. Við vörum við myndum sem fylgja fréttinni.

15. febrúar 2022 19:35

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.