Endanlega ljóst að Gylfi leikur ekki meira með Everton á þessu tímabili

Óskar Ófeigur Jónsson skrifar 4. febrúar 2022 08:31

Gylfi Þór Sigurðsson með fyrirliðabandið sem hann bar oft hjá Everton á síðustu leiktíð. EPA-EFE/PETER POWELL

Íslenski knattspyrnumaðurinn Gylfi Þór Sigurðsson mun ekki spila einn einasta leik á þessu tímabili en það varð endanlega ljóst eftir að Everton sendi inn listann yfir þá leikmenn sem verða gjaldgengir í liðið seinna hluta tímabilsins í ensku úrvalsdeildinni.

Gylfi var handtekinn á heimili sínu um miðjan júlí vegna gruns um kynferðisbrot gegn ólögráða einstaklingi en var seinna látinn laus gegn tryggingu. Málið hefur verið í rannsókn síðan og tryggingin hefur verið framlengd nokkrum sinnum. Nú síðast var hún framlengd fram í apríl.

Gylfi hefur ekkert spilað fótbolta síðan í júní hvorki með Everton né með íslenska landsliðinu þar sem hann var auðvitað líka algjör lykilmaður.

Breskir fjölmiðlar mega ekki nefna Gylfa á nafn og Everton hefur aðeins gefið það upp að leikmaður hafu verið settur í leyfi vegna rannsóknar lögreglu. Gylfi hefur sjálfur ekkert tjáð sig um málið og íslenskir fjölmiðlar hafa jafnframt fengið litlar upplýsingar frá lögreglunni.

Ensku úrvalsdeildarliðin þurftu að senda inn 25 manna lista til ensku úrvalsdeildarinnar í kjölfarið á því að félagsskiptaglugginn lokaði í þessari viku. Það má sjá alla þessa lista hér.

Það hefur verið mikið í gangi hjá Everton síðan að málið með Gylfa kom upp en Rafael Benítez tók við stjórastöðunni af Carlo Ancelotti í sumar en var svo rekinn í janúar. Frank Lampard var ráðinn í staðinn fyrir Rafa í byrjun þessarar viku.

Everton brást meðal annars við fjarveru Gylfa með því að bæta við tveimur miðjumönnum í janúaglugganum en liðð keypti þá Dele Alli frá Tottenham og fékk Donny van de Beek á láni frá Manchester United.

Everton skilaði inn 25 manna lista til ensku úrvalsdeildarinnar og eru eftirtaldir leikmenn á honum.