Telja helming Evrópubúa eiga eftir að smitast á næstu vikum

Samúel Karl Ólason skrifar 11. janúar 2022 21:00

Hans Kluge, yfirmaður Alþjóðaheilbrigðisstofnunarinnar í Evrópu. EPA/IDA GULDBAEK ARENTSEN

Sérfræðingar Alþjóðaheilbrigðismálastofnunarinnar (WHO) búast við því að meira en helmingur allra Evrópubúa muni smitast af ómíkron-afbrigði kórónuveirunnar á næstu tveimur vikum. Er það miðað við hvernig faraldurinn gengur nú yfir heimsálfuna.

Á fyrstu viku þessa árs greindust minnst sjö milljónir Evrópubúa með Covid-19, samkvæmt upplýsingum sem komu fram á blaðamannafundi í dag og vitnað er í í frétt Washington Post.

Hans Kluge, yfirmaður WHO í Evrópu, sagði ómíkron-afbrigði kórónuveirunnar eiga mun auðveldara með að hanga á mennskum frumum en önnur afbrigði. Þar að auki smitaði það þá sem hefðu verið bólusettir og þá sem hefðu smitast áður.

At this rate, the Institute for Health Metrics and Evaluation (IHME) @IHME_UW forecasts that more than 50% of the population in the Region will be infected with Omicron in the next 6-8 weeks @hans_kluge
— WHO/Europe (@WHO_Europe) January 11, 2022

Þessi mikla fjölgun smitaðra hefur aukið álag verulega á heilbrigðiskerfi Evrópu. Kluge sagðist óttast að því austar sem afbrigðið færi yfir Evrópu, þar sem hlutfall bólusettra er lægra en í vesturhluta heimsálfunnar gæti ástandið versnað til muna.

Ómíkron-afbrigðið á auðveldar með að komast í gegnum þær varnir sem bóluefnin verja, en þau verja fólk þó gegn alvarlegum einkennum og dauða.

Draga úr aðgerðum til að bæta úr álagi

Í mörgum ríkjum Evrópu hefur verið dregið úr sóttvarnaraðgerðum gagnvart bólusettu fólki til að draga úr áhrifum faraldursins á samfélög. Í öðrum hafa sóttvarnarreglur verið hertar fyrir óbólusetta.

Í mörgum ríkjum þar sem hlutfall bólusettra er hátt hafa yfirvöld dregið úr takmörkunum og lengd sóttkvíar og einangrunar til að minnka álagið á hagkerfum og heilbrigðiskerfum ríkjanna.

Tékkar tilkynntu til að mynda í gær að fólk sem ynni við mikilvæg störf mættu fara til vinnu þrátt fyrir að vera með Covid-19. Þar á meðal eru læknar og kennarar en listinn yfir þá mikilvægu er enn í smíðum samkvæmt frétt Reuters.

Færri bólusettir í Austur-Evrópu

Til marks um áhyggjur Kluge af ástandinu í Austur-Evrópu, þá sögðu ráðamenn í Póllandi frá því í dag að fjöldi þeirra sem dáið hafa vegna Covid-19 þar í landi, svo vitað sé, hafi farið yfir hundrað þúsund. Reuters segir að sé litið til hlutfalls milli dauðsfalla og fólksfjölda sé Pólland með hæstu ríkjum heims.

Samhliða því séu um 55,8 prósent íbúa Póllands fullbólusettir. Til samanburðar við það er hlutfall fullbólusettra í Evrópusambandinu öllu 68,7 prósent. Sérfræðingar sem blaðamenn fréttaveitunnar ræddu við sögðu þetta að hluta til mega rekja til þess að um áratuga skeið hafi kommúnistar farið með völd í Póllandi og það hafi grafið undan trú íbúa á ríkisstofnanir og valdið hægt á þróun heilbrigðiskerfis landsins.

Sérfræðingarnir sögðu einnig að ekki hefði verið gripið til nægjanlegra sóttvarnaraðgerða.

Faraldur kórónuveiru (COVID-19) Evrópusambandið Tékkland Pólland

Tengdar fréttir

Neyðarástandi lýst yfir vegna Covid-19

Almannavarnadeild ríkislögreglustjóra í samráði við sóttvarnalækni hefur lýst yfir neyðarstigi Almannavarna vegna kórónuveirufaraldursins. Þetta er fjórða skiptið sem neyðarstigi hefur verið lýst yfir hér á landi vegna stöðu faraldursins frá því að hann hófst.

11. janúar 2022 16:50

Segir stefna í algjört neyðarástand með óbreyttri þróun

Þórólfur Guðnason sóttvarnalæknir segir að með óbreyttri þróun kórónuveirufaraldursins stefni í algjört neyðarástand í heilbrigðiskerfi landsins og í margvíslegri innlendir starfsemi. Bæði vegna Covid-19 sjúkdómsins sjálfs og afleiddum áhrifum hans.

11. janúar 2022 16:06

Bindur vonir við að hjarðónæmi náist á næstu vikum eða mánuðum

Sóttvarnalæknir segir Íslendinga nú standa á krossgötum með tilliti til faraldursins. Efla þurfi afkastagetu spítalans og ef það tekst ekki þarf að grípa til aðgerða til að draga úr útbreiðslu veirunnar. Hann bindur vonir við að með bólusetningum og útbreiddum sýkingum verði hægt að ná hjarðónæmi á næstunni. Yfirlæknir á Landspítala segir fyrir öllu að ná fjölda smitaðra niður til að Landspítali ráði við álagið.

11. janúar 2022 13:30

Óbreyttar reglur næstu þrjár vikurnar

Gildandi samkomutakmarkanir verða framlengdar óbreyttar um þrjár vikur.

11. janúar 2022 12:10

Bretar sem greinast jákvæðir í hraðprófi þurfa ekki lengur að fara í PCR próf

Bretar með einkenni Covid-19 þurfa ekki lengur að gangast undir PCR próf eftir að hafa fengið jákvæða niðurstöðu úr hrað- eða heimaprófi. Bresk heilbrigðisyfirvöld segja breytinguna mega rekja til mikillar útbreiðslu og nákvæmni hraðprófanna.

11. janúar 2022 10:27

Leyfir sér að vona að hið dramatíska „finale“ sé handan við hornið

Íslenskur læknir sem starfar á sjúkrahúsi í Lundúnum segir stöðuna ágæta á spítalanum, þrátt fyrir uppgang ómíkron-afbrigðis kórónuveirunnar og tiltölulega vægar samkomutakmarkanir. Hann bindur vonir við að dramtískur endapunktur faraldursins sé í nánd.

10. janúar 2022 07:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.