Veður

Gengur í suð­austan­storm með tals­verðri rigningu

Atli Ísleifsson skrifar
Veðurstofan spáir miklu hvassviðri í kvöld og í nótt. Svona er vindaspáin fyrir klukkan 1 næstu nótt.
Veðurstofan spáir miklu hvassviðri í kvöld og í nótt. Svona er vindaspáin fyrir klukkan 1 næstu nótt. Veðurstofan

Lægðardrag gengur norðaustur yfir landið með morgninum og ber þar með sér hvassa suðaustanátt, slyddu eða rigningu sunnan og vestan til, en snjókomu inn til landsins. Í kvöld gengur svo í suðaustanstorm með talsverðri rigningu sunnantil. Gular viðvaranir hafa verið gefnar út víða um land.

Á vef Veðurstofunnar segir að skyggni geti orðið lítið á Hellisheiði um tíma í dag vegna snjókomu og skafrennings. Mun hægara og úrkomulítið norðaustan til, og hiti á landinu núll til fimm stig.

„Langt suðvestur í hafi er ört vaxandi lægð, sem nálgast hröðum skrefum, en lægðin fer fyrst að láta finna fyrir sér síðla kvölds þegar gengur í suðaustanstorm eða -rok með talsverðri rigningu sunnan til. Hvessir enn um tíma í nótt, en fer síðan að draga úr vindi og úrkomu.

Gular veðurviðvaranir eru í gildi og eru ferðalangar beðnir um að kynna sér þær, ásamt færð á vegum, áður en lagt er af stað. Óveðrið veldur einnig hárri sjávarstöðu og talsverðu brimi og eru menn beðnir um að fara varlega nærri ströndinni sunnan og vestan til.

Allhvöss eða hvöss suðaustanátt og rigning eða slydda með köflum eftir hádegi á morgun, jafn vel stormur við austurströndina, en lægir heldur og rofar til um kvöldið. Hiti 1 til 6 stig,“ segir í hugleiðingum veðurfræðings.

Gular viðvaranir eru í gildi á sunnan og vestanverðu landinu í nótt og til morguns.

Gular viðvaranir:

  • Suðurland. Suðaustan stormur eða rok. 5. janúar kl. 21:00 til 6. janúar kl. 4:00
  • Faxaflói. Suðaustan stormur. 5. janúar kl. 22:00 til 6. janúar klukkan 11:00.
  • Breiðafjörður. Suðaustan stormur eða rok. 6. janúar kl. 01:00 til 6. janúar kl. 13:00
  • Miðhálendið. Suðaustan rok. 5. janúar kl. 21:00 til 6. janúar kl. 08:00

Veðurhorfur á landinu næstu daga

Á fimmtudag: Sunnan og suðaustan 18-25 m/s og rigning eða slydda með köflum, en talsverð úrkoma SA-lands. Hiti 1 til 6 stig. Dregur úr vindi seinnipartinn með skúrum eða slydduéljum S- og V-til, en kólnar og styttir upp fyrir norðan.

Á föstudag: Suðaustlæg átt, 8-15 m/s, rigning eða slydda með köflum á S- og V-landi og hiti 1 til 5 stig. Þurrt um landið NA-vert og hiti við frostmark. Hvassviðri eða stormur S-til um kvöldið með aukinni rigningu.

Á laugardag: Allhvöss eða hvöss suðaustanátt með talsverðri rigningu eða slyddu A-lands í fyrstu, en snýst síðan mun hægari suðlæga átt með lítilsháttar rigningu eða snjókomu. Hiti kringum frostmark.

Á sunnudag: Gengur í suðaustanhvassviðri eða -storm með talsverðri rigningu eða slyddu S- og A-lands og hlýnandi veður.

Á mánudag: Útlit fyrir norðanátt með snjókomu á N-verðu landinu, en bjartviðri syðsta og talsverðu frosti um land allt.

Á þriðjudag: Líklega stíf suðvestanátt með rigningu eða slyddu og hlýrra veðri.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.