Innlent

Enn glímir Jóhann við tónlistarrisana í dómsal

Tryggvi Páll Tryggvason skrifar
 Jóhann Helgason hefur staðið í ströngu gegn erlendum tónlistarrisum í um þrjú ár.
 Jóhann Helgason hefur staðið í ströngu gegn erlendum tónlistarrisum í um þrjú ár. Vísir/Rakel Ósk

Munnlegur málflutningur í máli Jóhanns Helgasonar gegn tónlistarrisunum Warner og Universal hófst í Los Angeles í dag. Jóhann er vongóður um að í þetta skiptið hafi hann betur.

Málið snýr að líkindum Saknaðar, lags Jóhanns, og You Raise Me Up, lags Norðmannsins Rolf Løvland og vill Jóhann meina að um lagastuld sé að ræða. Málinu var vísað frá dómstigi í Los Angeles á síðasta ári en bæði Jóhann og andstæðingar hans áfrýju málinu til áfrýjunardómstóls.

Málflutningur lögmanna í málinu hófst klukkan 19 að íslenskum tíma en að sögn Jóhanns snýr krafa hans um að fá úrskurði dómara um að vísa málinu ekki til kviðdóms hnekkt. Andstæðingar hans krefjast þess hins vegar að fá úrskurði sama dómara um að vísa frá fimmtíu milljóna króna málskostnaðarkröfu á hendur Jóhanni hnekkt.

Jóhann ræddi málið í Reykjavík síðdegis í dag þar sem hann segist vera ósáttur við ákvörðun dómarans sem tók ákvörðun um að vísa því frá á síðasta ári.

„Það sem að við stefndum væri að þetta færi fyrir kviðdóm og að það myndi skera úr um þetta. Þessi eini dómari sem dæmdi í þessu upphaflega kom í veg fyrir að þetta færi fyrir kviðdóm,“ sagði hann.

Þrír dómarar sitja í áfrýjunardómstólnum og fengu lögmenn beggja aðila fimmtán mínútur til að fara yfir helstu atriði þess. Dómararnir hafa þegar kynnt sér málið og fá þeir einnig tækifæri til þess að spyrja lögmennina nánari spurninga. Segir Jóhann að ekki sé reiknað með niðurstöðu fyrr en eftir áramót.

Fengið fyrirframgreiðslu á höfundarlaunum til að standa straum af kostnaði

Hann telur að ekki hafi verið annað hægt en að láta reyna á málið fyrir dómstólum.

„Það var búið að meta þetta hér í upphafi hjá STEF-i að tónskylt efni væri yfir 97 prósent. Það eru svo miklar tengingar hingað sko, það er svo margt í þessu að það var ekkert annað en að láta reyna á þetta. Svo er það alltaf happdrætti hvernig dómara þú lendir á. En við verðum að gera okkar besta í þessu, meira er ekki hægt að gera. Svo kemur bara niðurstaða og við verðum bara að taka henni,“ sagði Jóhann.

Málið hefur þó óneitanlega haft kostnað í för með sér fyrir Jóhann.

„Ég hef þurft að greiða ýmislegt, tónlistarmöt og hitt og þetta í kringum þetta. Ég hef fengið mjög góða fyrirgreiðslu. Hef fengið fyrirframgreidd höfundarlaun út af þessu sérstaka máli.“

Aðspurður hvað hann sæi fyrir sér að fá í hendurnar verði málið dæmt honum í vil mátti skilja á Jóhanni hann hafi ekki reiknað nákvæmlega út.

Tugi milljóna eða hundruð?

„Jájá, í svona máli eru það ákveðnar skaðabætur. Svo er til í dæminu að menn hafa samið um eitthvað en það var ekki aðalmálið. Það var ekki hægt annað en að láta á þetta reyna.“


Tengdar fréttir

Hafna mála­til­búnaði tón­fræðings Jóhanns

Lög­menn fyrir­tækja sem Jóhann Helga­son stefnir í málinu um lagið Söknuð segja mikla galla á mála­til­búnaði tón­listar­fræðings sem vann á­lits­gerð fyrir Jóhann. Þeir krefjast þess að málinu verði vísað frá dómi í Los Angeles.

Máli Jóhanns Helga­sonar vísað frá

Máli tónlistarmannsins Jóhanns Helgasonar gegn tónlistarrisunum Warner og Universal var vísað frá dómi í Los Angeles í Bandaríkjunum á föstudag.

Vitni styðja Jóhann í dómsmálinu

Lögmaður Jóhanns Helgasonar í málinu um hvort lagið You Raise Me Up sé stuldur á laginu Söknuði hefur lagt fyrir dómstólinn í Los Angeles skjöl með yfirlýsingum tiltekinna einstaklinga sem eiga að sýna fram á að Rolf Løvland hafi haft margvísleg tækifæri til að heyra lagið Söknuð áður en hann sendi frá sér You Raise Me Up.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×