Sport

Spretthlaupari skotinn til bana

Sigurður Orri Kristjánsson skrifar
Alex Quinonez
Alex Quinonez EPA-EFE/ALI HAIDER

Ekvadorinn Alex Quinonez, sem vann til verðlauna á heimsmeistaramótinu í frjálsum íþróttum 2019, var skotinn til bana í borginni Guayaquil í Ekvador síðastliðið föstudagskvöld.

Quinonez var skotinn ásamt öðrum manni fyrir utan verslunarmiðstöð í borginni Guayaquil á föstudagskvöldið. Yfirvöld í Ekvador, þar með talið forsetinn sjálfur, Guillermo Lasso, hafa heitið því að hafa hendur í hári árásarmannsins.

Quinonez vann til bronsverðlauna á heimsmeistaramótinu í Doha í Sameinuðu arabísku furstadæmunum árið 2019 og hefur verið í boðhlaupssveit Ekvadora í bæði 100 og 400 metra hlaupum. Hann er besti spretthlaupari í sögu Ekvador.

Samkvæmt Al Jazeera hefur árið verið erfitt í Ekvador og morðtíðni hefur hækkað mikið í landinu. Yfirvöld kenna uppgangi glæpagengja um, en um 1900 morð hafa verið framin í í Ekvador frá áramótum. Til samanburðar voru framin um 1400 morð í landinu á síðasta almanaksári.

Þetta er annað morðið sem skekur frjálsíþróttaheiminn á stuttum tíma en heimsmethafinn í 10 kílómetra hlaupi kvenna, Agnes Tirop, var myrt í Kenýa fyrr í mánuðinum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.