Innlent

Undir­búnings­kjör­bréfa­nefnd á vett­vang talningar í Borgar­nesi

Heimir Már Pétursson skrifar
Til skoðunar er talning í þessum sama sal í lok september.
Til skoðunar er talning í þessum sama sal í lok september. Vísir/SigurjónÓ

Undirbúningskjörbréfanefnd Alþingis fundar í dag á hótel Borgarnesi þar sem talning fór fram í Norðvesturkjördæmi í nýafstaðnum alþingiskosningum. Formaður nefndarinnar segir mikilvægt að nefndin vandi til verka þótt æskilegt væri að uppkosning færi fram sem fyrst ef niðurstaðan yrði að endurtaka þyrfti kosningarnar í kjördæminu.

Tólf kærur hafa borist undirbúningskjörbréfanefnd Alþingis vegna alþingiskonsinganna hinn 25. október síðast liðinn. Nefndin kemur saman til fundar á hótel Borgarnesi í hádeginu og fundar fram eftir degi.  

Birgir Ármannsson formaður nefndarinnar segir lengi hafa staðið til hjá nefndinni að fara og skoða aðstæður á hótel Borgarnesi þar sem talning og endurtalning atkvæða fór fram í Norðvesturkjördæmi.

Undirbúningskjörnefnd við upphaf fundar í salnum á Hótel Borgarnesi.Vísir/SigurjónÓ

„Til að skoða vettvang þar sem talning fór fram hinn 26. september. Við fengum auðvitað margvíslegar upplýsingar frá lögreglunni á Vesturlandi núna fyrir og um helgina. Þar á meðal eru út af fyrir sig greinargóðar lýsingar á staðháttum og annað. En það er hins vegar svolítið öðruvísi að sjá þetta með eigin augum,“ segir Birgir.

Nefndin væri enn í gagnaöflun og að púsla saman einstökum atriðum. Fundað yrði stíft í þessari viku til að ná saman þeim upplýsingum sem hægt væri að afla.

„Þá tekur við einhver vinna við úrvinnslu og mat á þeim gögnum sem við höfum fengið.“

Þannig að það mat mun aldrei liggja fyrir fyrr en í fyrsta lagi um miðja næstu viku?

Birgir Ármannsson segir mikilvægt að undirbúningskjörbréfanefnd vandi mjög til verka þótt nefndarfólk geri sér einnig grein fyrir að það væri öllum fyrir bestu að niðurstaða hennar liggi fyrir sem fyrst.Vísir/Vilhelm

„Ég ætla ekki að nefna neina tímasetningu. Held bara að það sé ljóst að það verður ekki í þessari viku,“ segir formaður undirbúningskjörbréfanefndar.

Meginþungi kæranna sem fram hafi komið lúti að sömu atriðunum varðandi framkvæmd talningar í Norðvesturkjördæmi. Í sumum kæranna væru einnig nefndir hnökrar sem fram hefðu komið í öðrum kjördæmum. Þá væri minnst á það fyrirkomulag sem stjórnarskráin gæfi varðandi úrskurð um gildi kosninga. Nefndin muni taka afstöðu til allra kæruefna þegar þar að komi.

Björn Leví Gunnarsson, Birgir Ármannsson, Hanna Katrín Friðriksson, Þórunn Sveinbjörnsdóttir og Vilhjálmur Árnason eru meðal þingmanna í nefndinni.Vísir/SigurjónÓ

„Það er alveg sama að hvaða niðurstöðu við komumst að; hún verður að vera vandlega undirbyggð og byggð á traustum lögfræðilegum og málefnalegum forsendum. Á hinn bóginn vitum við auðvitað að það er betra fyrir alla aðila að það komist niðurstaða í málið sem fyrst,“ segir Birgir.

Samkvæmt minnisblaði dómsmálaráðuneytisins til nefndarinnar yrðu allar forsendur um framboðslista og kjörskrá þær sömu ef til uppkosningar kæmi í Norðvesturkjördæmi. Aðeins atkvæðagreiðslan sjálf og talningin yrðu endurtekin.

„Og fordæmi fyrir um það í sveitarstjórnarkosningum hér á landi og reyndar í kosningum í Danmörku líka ef út í það er farið,“ segir Birgir Ármannsson.


Tengdar fréttir

Ummæli Birgis Ármannssonar óheppileg

Fráfarandi þingmaður segir að hringekja hafi breyst í rússíbana þegar endurtalning breytti jöfnunarsætum með þeim afleiðingum að hún datt út af þingi. Hún gagnrýnir formann kjörbréfanefndar fyrir að lýsa yfir sinni persónulegri skoðun áður en nefndin hefur komist að niðurstöðu um Norðvesturkjördæmi.

Bætist í hóp kærenda Alþingiskosninganna

Lenya Rún Taha Karim, frambjóðandi Pírata í Reykjavíkurkjördæmi norður, kærði í dag  endurtalningu í Norðvesturkjördæmi. Hún hefði náð sæti sem jöfnunarþingmaður hefði niðurstaða upphaflegrar talningar staðið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×