Tónlist

Völdu Andrés plötusnúð mánaðarins

Tinni Sveinsson skrifar
Andrés plötusnúður að störfum í hljóðveri X977.
Andrés plötusnúður að störfum í hljóðveri X977.

Dansþáttur þjóðarinnar, PartyZone, útnefnir plötusnúð mánaðarins í vetur og mun hann setja saman eitt eða fleiri "mixteip" með danstónlist. Hann hefur frjálsar hendur og setur saman sett með tónlist sem hann er með í spilun þá stundina og einkennir hann eða hana tónlistarlega.

Nú í september varð reynsluboltinn og stemmingsplötusnúðurinn DJ Andrés fyrir valinu. Hann tók góðan tíma í að undirbúa settið, endurnýjaði meira að segja græjurnar og setti þær upp í nýuppgerðu stúdíói í bílskúrnum heima hjá sér. 

Settið er ferðalag

„Ég kýs að horfa á settið sem ferðalag. Finnst sjálfum skemmtilegt að tengja saman ólík efni og búa þannig til aðra heild sem hangir saman á einhverjum óskilgreindum þræði,“ segir Andrés en hann lenti í basli með að koma öllum lögunum sem hann hafði í huga í tveggja klukkustunda sett. „Ég fann ekki út úr því. En það jákvæða er að nú hef ég ástæðu til að byggja upp annað mix.“

Í settinu má heyra í tónlist eftir Durand Bernarr, Common Saints, Dan Kye, Donnell Knox, Eric B & Rakim, Khruangbin, Mikron, Mitski, Sault, Slang, Stefan Ringer og fleiri. 

„Þetta er allt tónlist sem ég hef verið að grúska í undanfarið. Í sumarfríinu hef ég líka verið að ræða tónlist við stelpurnar mínar, Þórdísi Unu og Guðrúni Gná. Mér fannst frábært að þær náðu að kynna mér fyrir nýrri tónlist sem ég laumaði inn í settið, allavega eitt eða tvö lög.“

30 ár í bransanum

Andrés heldur upp á 30 ára afmæli sem plötusnúður um þessar mundir.

„Ég spilaði fyrst árið 1991 á þeim ágæta stað Laugarvegi 22 (í dag Bravó). Fyrsta heimsókn mín í PartyZone hefur líklega verið sumarið 1992 þegar þeir félagar leigðu útvarpsstöðina Útrás og þátturinn var einskonar samkomustaður fyrir plötusnúðana. Hrikalega skemmtilegur tími og suðupottur sem enn hefur ekki kólnað í raun. Síðan þá hef ég verið reglulegur gestur þar, komið fram á PZ kvöldum og svo má ekki gleyma safndisknum PartyZone´97 sem ég og Margeir settum saman á sínum tíma.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.