Erlent

Þingmenn deila vegna grímuskyldu: „Hann er svo mikill fáviti“

Samúel Karl Ólason skrifar
Nancy Pelosi og Kevin McCarthy.
Nancy Pelosi og Kevin McCarthy. AP/J. Scott Applewhite

Miklar deilur áttu sér stað í þinghúsi Bandaríkjanna í dag eftir að grímuskyldu var komið á í fulltrúadeildinni aftur, að ráðleggingu læknis þingsins. Repúblikanar hafa fordæmt ákvörðunina og margir þingmenn hafa neitað að vera með grímur, þó þeim hafi verið hótað sektum.

Fregnir hafa borist af því að Nancy Pelosi, forseti fulltrúadeildarinnar, hafi kallað Kevin McCarthy, leiðtoga Repúblikana í fulltrúadeildinni, fávita vegna andstöðu hans við grímuskylduna.

Talsmaður hennar svo gott sem staðfesti það eftir á og sagði Pelosi „í þeirri trú að það að segja að grímuskylda væri ekki ákvörðun byggð á vísindum sé fávitalegt.

McCarthy hefur einnig haldið því fram að frjálslyndir embættismenn séu að reyna að þvinga Bandaríkjamenn til að lifa í ótta, án þess þó að taka fram hvað embættismennirnir frjálslyndu eiga að græða á því.

Grímur til að hægja á dreifingu

Sóttvarnastofnun Bandaríkjanna (CDC) gaf út í vikunni að fólk ætti að byrja að nota grímur aftur til að stemma stigu við útbreiðslu Delta-afbrigðis nýju kórónuveirunnar í Bandaríkjunum. Smituðum hefur farið hratt fjölgandi og að mestu á svæðum þar sem lágt hlutfall íbúa er bólusett.

Yfirmaður CDC sagði í dag að ákvörðunin væri byggð á nýlegum gögnum um að bólusett fólk sem smitist af Covid-19 geti smitað aðra. Það fólk sé með sama magn veirunnar og óbólusettir.

Repúblikanar hafa haldið því fram í dag að það séu þeir sem séu að fylgja vísindunum, ekki vísindamenn. Vísindin sýni að grímur virki ekki.

Samkvæmt Reuters hafa um 57,6 prósent Bandaríkjamann fengið minnst einn skammt af bóluefni. Í fjórum af fimm ríkjum þar sem hlutfallið er lægst eru ríkisstjórar Repúblikanar. Það eru ríkin Mississippi, Idaho, Wyoming og Alaska. Í Louisiana er ríkisstjórinn Demókrati.

Sjá einnig: Staðan í Bandaríkjunum varpar nýju ljósi á Delta-afbrigðið

Allir þingmenn Demókrataflokksins hafa opinberað að þeir séu bólusettir. Nærri því helmingur þingmanna Repúblikanaflokksins hafa ekki gert það, samkvæmt talningu CNN.

Í ræðu sinni á þingi í kvöld sagði McCarthy að um 85 prósent þingmanna væru bólusettir, sem þýðir að um það bil 65 þingmenn Repúblikanaflokksins eru það ekki, samkvæmt útreikningi einnar blaðakonu.

„Skiptu þér ekki af“

Politico vísar í atvik þar sem Demókratinn Jared Huffman, frá Kaliforníu, sá Repúblikanann Byron Donalds, frá Flórída, fara með öðru fólki inn í lyftu án þess að vera með grímu. Huffman skammaði Donalds og kallaði hann eigingjarnan.

„Hér er maður sem kemur frá ríki sem er þungamiðja Delta-afbrigðisins og segir heiminum í sjónvarpsviðtali að hann sé ekki bólusettur,“ sagði Huffman um Donalds við blaðamann Politico.

Donalds, sem fékk Covid-19 síðasta haust, sagði að Huffman ætti ekki að skipta sér af því sem komi honum ekki við. Í samtali við New York Times vildi hann ekki segja hvort hann ætlaði að láta bólusetja sig og sagðist þess í stað í þeirri trú að hann væri enn með mótefni frá því hann smitaðist í haust.

Hann bætti við að honum þætti ákvörðunin um grímuskyldu heimskuleg. Þingmenn hefðu verið í þingsal í rúma tvo tíma í gær og ef Covid-19 væri í dreifingu í þinghúsinu væru allir veikir.


Tengdar fréttir

Delta-afbrigðið veldur usla víða um heim

Delta-afbrigði Nýju kórónuveirunnar er skæðasta afbrigði veirunnar sem veldur Covid-19 og hefur að miklu leyti snúið baráttunni gegn faraldrinum á haus. Afbrigðið dreifist auðveldar manna á milli en bóluefni virðast veita mikla vörn gegn alvarlegum veikindum meðal smitaðra.

Hefur safnað 9,5 milljörðum króna í sjóð sinn

Save America, pólitísk aðgerðanefnd (PAC) Donalds Trump, fyrrverandi forseta Bandaríkjanna, safnaði um 75 milljónum dala á fyrri hluta þessu árs. Það samsvarar tæplega níu og hálfum milljarði króna, lauslega reiknað.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.