Íslenski boltinn

Öll mörkin úr mánaðarlangri 12. umferð: Skæri Orra klipptu Brkovic niður

Sindri Sverrisson skrifar
Orri Hrafn Kjartansson er kominn með þrjú mörk fyrir Fylki í sumar.
Orri Hrafn Kjartansson er kominn með þrjú mörk fyrir Fylki í sumar. vísir/hulda margrét

Þrjú mörk voru skoruð þegar tólftu umferð Pepsi Max-deildar karla í fótbolta lauk í gærkvöld með tveimur leikjum. Mörkin þrjú voru öll skoruð í Árbæ þar sem Fylkir vann KA 2-1. Öll mörkin úr umferðinni má nú sjá á Vísi.

Orrarnir í liði Fylkis virðast bara vilja skora þegar nafni þeirra er einnig á skotskónum. Líkt og í sigrinum gegn Keflavík fyrr í sumar þá skoruðu þeir báðir í 2-1 sigrinum gegn KA.

Orri Sveinn Stefánsson skoraði fyrra mark Fylkis í gær. Hann „kassaði“ boltann niður fyrir Djair Parfitt-Williams, og skoraði svo úr frákastinu eftir að Steinþór Már Auðunsson hafði varið frá Djair.

Orri Hrafn Kjartansson skoraði svo seinna markið eftir að hafa tekið lagleg skæri og gert Dusan Brkovic alveg ringlaðan. Hallgrímur Mar Steingrímsson minnkaði muninn, einnig eftir að hafa tekið skæri til að reyna að leika á Dag Dan Þórhallsson, en skot Hallgríms fór svo af Orra Sveini í boga yfir Aron Snæ Friðriksson í markinu.

Klippa: Mörkin úr leik Fylkis og KA

Ekkert mark var skorað í hinum leik gærkvöldsins, þar sem HK og Víkingur R. gerðu markalaust jafntefli í Kórnum.

Alls voru tólf mörk skoruð í tólftu umferð og má sjá þau öll í markasyrpunni hér að neðan.

Umferðin hófst reyndar fyrir mánuði þegar liðin sem leika í Evrópukeppnum mættust. Valur vann Breiðablik 3-1 en FH og Stjarnan gerðu 1-1 jafntefli. Á mánudaginn vann Leiknir 2-0 gegn ÍA og KR 1-0 gegn Keflavík.

Klippa: Markaspyrpa 12. umferðar

Næstu leikir í Pepsi Max-deildinni eru um helgina. ÍA og Valur mætast á laugardag og á sunnudag eru þrír leikir. KA tekur á móti HK, KR mætir Breiðabliki og FH mætir Fylki. Á mánudagskvöld mætast annars vegar Keflavík og Víkingur og hins vegar Leiknir og Stjarnan.


Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.




Fleiri fréttir

Sjá meira


×