Enski boltinn

Engin illindi en nauðsynlegt að refsa leikmönnum fyrir að brjóta reglur

Sindri Sverrisson skrifar
James Maddison með boltann á lofti á æfingu Leicester.
James Maddison með boltann á lofti á æfingu Leicester. Getty

Brendan Rodgers, knattspyrnustjóri Leicester, segir ekki annað hafa verið í boði en að refsa leikmönnunum þremur sem brutu sóttvarnareglur með því að halda partý. Þeir megi þó spila bikarleikinn mikilvæga næsta sunnudag.

LBesti maður Leicester í vetur, James Maddison, og þeir Hamza Choudhury og Ayoze Perez, brutu sóttvarnareglur á sunnudagskvöld fyrir rúmri viku þegar þeir héldu partý. Samkvæmt The Sun voru um 20 manns í gleðskapnum.

Rodgers ákvað að skilja þríeykið eftir utan hóps þegar Leicester mætti West Ham í mikilvægum leik í ensku úrvalsdeildinni í gær, sem Leicester tapaði 3-2. Hann sá ekki eftir því þegar hann ræddi málið í Match of the Day á BBC.

„Við sem félag erum með okkar gildi. Ef við förum á svig við þessi gildi þá fylgja því afleiðingar,“ sagði Rodgers og bætti við að „annars lærðu leikmenn ekki“.

„Það eru engin illindi í gangi en við erum með gildi um það hvernig við högum okkur dags daglega og hvernig við undirbúum okkur fyrir leiki. Ef einhverjir fara ekki eftir þeim þá verðum við að halda áfram án þeirra,“ sagði Rodgers.

Tapið í gær hefur mikil áhrif á möguleika Leicester á meistaradeildarsæti en liðið er nú með 56 stig í 3. sæti, stigi fyrir ofan West Ham og tveimur stigum fyrir ofan Chelsea sem er í 5. sæti. Fjögur efstu liðin komast í Meistaradeild Evrópu á næstu leiktíð.

Leicester mætir Southampton næsta sunnudag í undanúrslitum enska bikarsins.

Maddison hefur skorað 11 mörk og lagt upp 10 í öllum keppnum fyrir Leicester á þessari leiktíð. Hann er í baráttunni um sæti í EM-hópi Englendinga. Perez hefur skorað þrjú mörk í 27 leikjum og Choudhury eitt mark í 20 leikjum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.