Yfirdráttarlán heimilanna aukist um milljarð á mánuði

Yfirdráttarlán heimilanna hafa aukist um milljarð á mánuði síðastliðna tólf mánuði. Þau bera hærri vexti en þekkjast í öllum vestrænum hagkerfum og greiða íslensk heimili nú um það bil 15 milljarða króna í yfirdráttarvexti á ári. Samkvæmt tölum Seðlabankans nema yfirdráttarskuldir heimilanna nú um það bil sjötíu og tveimur milljörðum króna, sem þýðir að hvert mannsbarn í landinu skuldi 240 þúsund krónur í yfirdrátt.

Þannig skuldar hver fjögurra manna fjölskylda að meðaltali tæpa milljón i yfirdrátt og þar sem þau bera tuttugu og eins prósents vexti , eru mánaðar vextir af þessu um 18 þúsund krónur á mánuði, eða fjórum til fimm sinnum hærri upphæð en rafmagnsreikningurinn er á mánuði, svo dæmi sé tekið.

Í viðtali við Blaðið gagnrýnir Pétur Blöndal, formaður Efnahags- og viðskiptanefndar Alþingis bankana fyrir að halda þessum lánum að fólki og gefa frá sér villandi upplýsingar um þau. Þeir skilgreini til dæmis yfirdrátt sem ráðstöfunarfé á yfirlitum bankareikninga, en ekki sem skuldir. Yfirdráttur sé fyrst og fremst hugsaður fyrir fyrirtæki og ætti í rauninni aldrei að vera í boði fyrir einstaklinga.--