Bon Jovi bauð Sigga Hlö og eiginkonu á tónleika

„Þetta er öðlingur. Rosalega fínn gæi og jarðbundinn. Þetta var eins og að hitta frænda sinn á svipuðum aldri," segir útvarpsmaðurinn Sigurður Hlöðversson, eða Siggi Hlö.

John Bon Jovi, söngvari rokksveitarinnar heimsfrægu Bon Jovi, bauð Sigga og eiginkonu hans á tónleika sína á Ólympíuleikvanginum í Barcelona í síðustu viku. Ástæðan var sú að kona Sigga, Þorbjörg Sigurðardóttir sem starfar hjá Nordic Visitor, skipulagði frí Bon Jovi hér á landi fyrr í sumar. Hjónakornin voru uppi við sviðið á tónleikunum, fengu óheftan aðgang baksviðs og voru hreinlega eins og kóngar í ríki sínu. „Þegar mig langaði í bjór á miðjum tónleikum fór ég bara í búningsherbergið hans og sótti mér. Þetta var ótrúlegasta lífsreynsla af þessu tagi sem ég hef lent í. Allir verðirnir færðu sig bara þegar ég kom labbandi. Það vissu allir að við værum „special guests of Mr. John". Þetta var bara eins maður sér í bíómyndum," segir Siggi, enn í skýjunum yfir öllu saman. Hann kom sjálfur færandi hendi baksviðs og gaf Bon Jovi og fjölskyldu hans fatnað frá 66° Norður sem söngvarinn var gríðarlega ánægður með.

Siggi hitti Bon Jovi einnig þegar hann var staddur hér á landi og fór því vel á með þeim í Barcelona „Hann var svo uppnuminn yfir ferðinni hingað að hann talaði ekki um annað," segir hann og bætir við að Bon Jovi dauðlangi að koma aftur til Íslands. „Hann sagði mér hvað konan mín væri frábær. Ég þóttist nú vita það enda búinn að eiga hana í 23 ár," segir hann og hlær. -fb