Dramatískar ballöður í kvöld

Þá er komið að því: fyrsta Eurovision-undankeppnin er í kvöld. Eftir frækilegan árangur Jóhönnu Guðrúnar virðast fleiri vilja reyna fyrir sér með dramatíska ballöðu, að minnsta kosti eru þrjú af lögum kvöldsins skyld „Is it true". Öll lögin í kvöld eru á ensku.

Fyrst kemur „You Are The One", strengja- og píanóknúin ballaða með miklu risi sem endar í flugeldasýningu. Lagið gerði Haraldur G. Ásmundsson og er þetta fyrsta lagið sem hann sendir í keppnina. Textann samdi Kolbrún Eva Viktorsdóttir, sem syngur lagið. Þau eru hjón og saman í hljómsveitinni Myst, sem gerði plötu árið 2006.

Næst er hreinræktuð Eurovision-ballaða, „The One". Lagið er eftir Birgi Jóhann Birgisson. Hann var í hljómsveitunum Upplyftingu, Þúsund andlitum og Sálinni hans Jóns míns á frumskeiði hennar. Textann gerði Ingvi Þór Kormáksson en Íris Hólm úr hljómsveitinni Bermuda syngur lagið af öryggi.

Matti Papi er ekki í neinu ballöðustandi heldur syngur kántrírokklagið „Out of Sight" með trukki. Hann samdi sjálfur textann. Lagið er eftir annan Matthías, Matthías Stefánsson, sem leikur með Pöpum og South River Band. Líflegur fiðluleikur er áberandi í laginu enda höfundurinn fiðluleikari og kennir á fiðlu.

Jóhannes Kári Kristinsson mætir galvaskur með tvö lög í keppnina í ár - bæði ástarljóð til konunnar í lífi mínu, segir hann. Það fyrra er í kvöld og heitir „You Knocked Upon My Door" - mikil dramaballaða sem Sjonni Brink syngur. Hitt lag Jóhannesar verður í þriðja og síðasta undankvöldinu og er sungið af Arnari Jónssyni.

Fimmta og síðasta lag kvöldsins heitir „In the Future" og er sungið af hinni bráðungu Karen Pálsdóttir. Það er „nútímalegasta" lag kvöldsins og liggur einhvers staðar á milli Ruslönu og Britney Spears. Höfundar lagsins eru hjónin Bryndís Sunna Valdimarsdóttir og Daði Georgsson, sem bæði hafa fengist lengi við tónlist, voru til að mynda saman í hljómsveitinni 8-villt.

Tvö lög fara áfram eftir símakosningu og verða meðal þeirra sex laga sem berjast í lokakeppninni 6. febrúar. drgunni@frettabladid.is