Birgitta Haukdal flytur með fjölskylduna til Spánar

„Við förum í ágúst og dveljum í tvö ár,“ segir söngkonan Birgitta Haukdal, en hún og fjölskylda hennar hafa ákveðið að flytja til Barcelona.

Í Barcelona ætlar eiginmaður Birgittu, Benedikt Einarsson, í nám í viðskiptafræði en hann er lögfræðingur að mennt. Birgitta segir að hún verði þó með annan fótinn á Íslandi til að byrja með.

„Ég er með alls konar gigg bókuð hér á landi og er að vinna að því að klára plötuna mína, svo ég verð á flakki á milli Íslands og Spánar fyrsta hálfa árið. Þegar ég klára þessi verkefni, stefni ég bara á að verða eins og innfædd,“ segir Birgitta og hlær, og útskýrir að fyrsta verkefnið í Barcelona verði að skrá sig í spænskuskóla. „Ég er ekki með neinn grunn í spænsku, en maðurinn minn fór í spænskuskóla sem unglingur og hann hefur hjálpað mér að pikka upp eina og eina setningu,“ segir Birgitta.

Fjölskyldan gerði sér ferð til Barcelona fyrir tveimur vikum í leit að húsnæði. „Við fundum okkur íbúð í æðislega góðu hverfi. Það er ótrúlega fallegur garður rétt hjá, með leikvöllum og kaffihúsum og ég er bara orðin rosalega spennt,“ segir Birgitta. Hún segist ekki vita hvort hún ætli sér í frekara nám ytra. „Þetta verður eiginlega bara allt að koma í ljós. Ég þarf bara að klára verkefni mín hér heima, koma syninum á leikskóla og koma fjölskyldunni almennilega fyrir úti. En spænskuskóli er klárlega fyrsta skrefið.“

Áður en Birgitta heldur til Barcelona, ætlar hún að skella sér á Mærudaga á Húsavík undir lok júlímánaðar. Þar ætlar hún að syngja með Greifunum sem eiga aldarfjórðungsafmæli í ár.

„Það verður virkilega gaman að syngja með þeim. Þeir eru frá Húsavíkinni, eins og ég, og við Viddi [Kristján Viðar Haraldsson] höfum þekkst í mörg ár og erum góðir vinir,“ segir Birgitta. Spurð að því hvaða lög verði sungin, gefur Birgitta lítið upp. „Ég mun allavega syngja eitt Greifalag. Annað á eftir að koma í ljós.“kristjana@frettabladid.is